Fin facluh nohfohn, tiac oacna sie nuhnak luhn mwet uh ke wain, beer, ac mwe nihm kuh. Oasr mwet luhngse in nihm kais kuhtuh pacl wi kawuck lal. Kuhtuh sruhnga in nihm mwe nihmnihm. Ac oasr kuhtuh pac suc nihmnihm nwe ke na eltahl sruhilac. Meac Bible uh fahk ke orekmakihnyen mwe nihmnihm?

1. Yac koluk in nihm mwe nihmnihm?

Bible uh tiac fahk lah koluk in nihm wain. Pwacyeiye uh pa, “wain in ahkenganye” insiacn mwet uh weacng nuhke mwe sang luhn God nuh sesr. (Psalm 104:14, 15) Bible uh sruhmuhn kuhtuh mukul ac muhtwacn oaru suc nihm wain.​—1 Timothy 5:23.

2. Kahs in kahsruh fuhkah Bible uh sang nuh sin mwet suc sulaclah in nihm wain?

Jeova el nuhnuhnkuh mwet suc nihm wain ahluhkwelah ma fal ac sruhilac. (Galatia 5:21) Bible uh fahk: “Nimet kuhpahsr nuh sin mwet nihm wain yohklac.” (Soakas 23:20) Pwacnacng kuht fin sulaclah in nihm, wi mwet sahyac kuh kuht muhkwena, kuht in tiac nihm yohklac ac kuht in ahkpwacyeye lah kuht srackna kuh in nuhnak, kahskahs, orekma wo. Kuht in liye lah ma inge tiac ahkkulukye mahnosr. Tuhsruhktuh, kuht fin tiac kuh in kutongkuhti in tiac nihm wain yohklac, wo kuht in tiac nihm wain.

3. Kuht ac suhnakihn fuhkah sulaclah luhn mwet sahyac ke nihm wain?

Sulaclah luhn kais sie mwet lah el ac nihm wain kuh tiac. Kuht ac tiac nuhnuhnkuh mwet suc sulaclah in nihm kuhtuh srihsrihk wain, ac kuht ac tiac pahtok mwet se suc sruhnga in nihm. (Rome 14:10) Kuht ac sulaclah in tiac nihm fin ma inge ahktihkuhlkuhlye mwet sahyac. (Riti Rome 14:21.) Kuht suk tiac ‘ma ac wo nuh sesr sifacna, a kuht in suk ma ac wo nuh sin mwet ngiac.’​—Riti 1 Corinth 10:23, 24.

 AHKYOHKYE LUTLUT LOM

4. Nuhnkuh meet liki kom nihm

Meac nuhnak lal Jesus ke wain uh? In etuh top nuh kac uh, liye mwenmwen se emeet ma el oraclah. Riti John 2:1-11, ac tohkohyang sramsramkihn kihsen siyuck inge:

• Ke mwenmwen se inge, meac kuht kuh in lotwelah ke nuhnak lal Jesus ke wain ac ke mwet suc nihm ma inge?

• Ke srihpen Jesus el tiac nuhnuhnkuh mwet suc nihm wain, meac nuhnak luhn sie mwet Christian ke sie mwet suc sulaclah in nihm wain?

Tuhsruhktuh, finne sie mwet Christian el kuh in nihm wain, ma inge tiac kalmackihn muh wo in nihm wain pacl nuhkewa. Riti Soakas 22:3, ac tohkohyang sramsramkihn lah fuhkah ohiyac ekahsr inge ac kahsre kom in oruh sulaclah kom fin ac nihm kuh tiac:

• Kom ac utuck sitosah, kuh orekma ke machine.

• Kom pihtuctuc.

• Taktuh el fahk nuh sum in tiac nihm wain.

• Kom tiac kuh in kutongkowi in nihmnihm ahluhkwelah ma fal.

• Oasr masap in tiac nihm wain ke acn sum uh.

• Oasr mwet suc wi kom ma sruhnga in nihm wain mweyen upac nuh sel in kutongyel sifacna in nihmnihm ahluhkwelah ma fal in pacl somlah ah.

Yac kom ac fah kihtakat wain nuh sin mwet ke party se kuh ke kuhfwen macruht se? In kahsre kom in oruh sulaclah, liye VIDEO se.

Riti Rome 13:13 ac 1 Corinth 10:31, 32. Tukun ritiyuck kais sie ma suhmuhslah, sramsramkihn kihsen siyuck se inge:

• Kahs in kahsruh inge kuh in kahsre kom fuhkah in oruh sulaclah ma ac fah ahkinsewowoyacl Jeova?

 5. Sulaclah lah luhpah fuhkah kom ac nihmyac

Kom fin ac nihm wain, esam ma inge: Jeova el tiac fahk muh koluk in nihm wain, a el fahk lah koluk in nihmnihm ahluhkwelah ma fal. Efuh? Riti Hosea 4:11, 18, ac tohkohyang sramsramkihn kihsen siyuck se inge:

• Meac kuh in sikyak ke pacl se sie mwet el nihm wain yohklac?

Meac kuht ac oruh tuh kuht in tiac nihm wain yohklac? Kuht enenuh in etuh luhpah ma fal nuh sesr ac tiac nihm yohklac. Riti Soakas 11:2, ac tohkohyang sramsramkihn kihsen siyuck se inge:

• Efuh kuh wo kom in sulaclah tari luhpah ma kom ac nihmyac?

6. Ma kuh in oruh tuh sie mwet in tui ke nihm wain yohklac

 MA KUHT LOTWELAH

Jeova el acse wain in oruh kuht in engan. Tuhsruhktuh, el sruhnga mwet uh in nihm wain yohklac ac sruhilac.

Kalweni

• Meac Bible uh fahk ke mwe nihm wain?

• Meac kuh in sikyak nuh sin mwet suc nihm wain yohklac?

• Kuht ac suhnakihn fuhkah sulaclah luhn mwet sahyac ke orekmakihnyen mwe nihm wain?