LUFUNJISHO 43
Baibolo Waambapo’mba ka pa Kutoma Maalwa?
Mwaya ntanda, bantu bamba bintu byapusana pusana bingi pa mambo a kutoma maalwa. Bamo batomatu maalwa inge baji pamo na bakwabo. Kabiji bakwabo nabo kechi bakeba kutoma maalwa nangwa pachechetu ne. Pakuba bakwabo batoma maalwa avula kuba’mba bapendwe. Nanchi Baibolo waambapo’mba ka pa kutoma maalwa?
1. Nanchi kyatama kutoma maalwa nyi?
Baibolo kechi wakanya kutoma maalwa ne. Pano bino, kwamba pa bintu byawama byavula bitupa Lesa, Baibolo wanungapo’mba “binyu bilengela muchima wa muntu kusangalala.” (Salamo 104:14, 15) Baibolo watongolapo banabalume ne banabakazhi bamo bakishinka batomenepo maalwa.—1 Timoti 5:23.
2. Baibolo waambapo’mba ka pa bantu batoma maalwa?
Yehoba washikwa kutoma maalwa avula nangwa kya kuba muntu kechi ubena kumweka’mba wapendwa ne. (Ngalatiya 5:21) Baibolo waamba’mba: “Kange wikale pa boba batoma binyu byavula ne.” (Byambo bya Maana 23:20) Onkao mambo, inge ketukebe kutoma maalwa nangwa kya kuba tuji kwa bunke bwetu, kechi twafwainwa kutoma maalwa avula kya kuba twaleka ne kulanguluka bulongo ne. Maalwa kechi afwainwa kwitulengela kwikala na ñambilo yatama ne kumwesha byubilo byatama nangwa kubula kutwajijila kwikala na butuntulu bwa mubiji bwawama ne. Inge tukankalwa kwikanya kutoma maalwa acheche, twafwainwa kuleka kutoma maalwa.
3. Twakonsha kunemeka byepi byafuukulapo bakwetu pa kutoma maalwa?
Muntu yense uji na luusa lwa kwifuukwilapo kutoma maalwa nangwa ne. Kechi twafwainwa kuzhachisha muntu utoma maalwa mu kwesakanya ne. Kabiji kechi twafwainwa kukanjikizha muntu ubula kutoma maalwa kuba’mba atendeke kutoma ne. (Loma 14:10) Tufuukulapo kuleka kutoma maalwa inge twayuka’mba kuba bino kubena kutuntwisha bakwetu. (Tangai Loma 14:21.) Onkao mambo, ‘kechi tukebengatu bintu bituwamina ne, poso bintu byawamina ne bakwetu.’—Tangai 1 Kolinda 10:23, 24.
FUNJILAIPO BIKWABO
Langulukaipo mafunde amo a mu Baibolo afwainwa kwimukwasha kuyuka umvwe mwafwainwa kutoma maalwa ne kuyuka po mwafwaimwa kupelela. Kabiji monai byo mwafwainwa kuba inge kimukatazha kutoma maalwa mu kwesakanya.
4. Fuukulaingapo bulongo inge mwafwainwa kutoma maalwa nangwa ne
Yesu wamonanga byepi kutoma maalwa? Pa kuba’mba tutaane mukumbu, monai kya kukumya kitanshi kyo aubile. Tangai Yoano 2:1-11, ne kwisamba ano mepuzho:
-
Ñanyi kintu kyo twafwainwa kufunjilako ku kino kya kukumya kyaubile Yesu pa byo amonanga bantu batoma maalwa?
-
Byo kiji kuba’mba Yesu kechi walengulwile bantu batoma maalwa ne, nga mwina Kilishitu wafwainwa kumonanga byepi bantu batoma maalwa?
Nangwa kya kuba mwina Kilishitu wakasuluka kutoma maalwa, akino kechi kibena kulumbulula’mba wafwainwa kwikala kitomi ne. Tangai Byambo bya Maana 22:3. Monai mashinda aji panshipo byo afwainwa kwimukwasha kufuukulapo inge mwafwainwa kutoma maalwa nangwa ne:
-
Mubena kwendesha motoka, kukyofwa nkinga nangwa kulungisha munkinyi.
-
Mwaimita.
-
Dokotala wimubuula kuleka kutoma maalwa.
-
Kimukatazha kutoma maalwa mu kwesakanya.
-
Mizhilo imukanya kutoma maalwa.
-
Muji na mukwenu ye kyakatezhe bingi kuleka kutoma maalwa pano wafuukulapo kwialeka.
Nanchi mwafwainwa kunengezha maalwa pa masongola nangwa pa bijiilotu bikwabo nyi? Pa kuba’mba muyuke bya kuba, tambai VIDYO.
Tangai Loma 13:13 ne 1 Kolinda 10:31, 32. Inge mwapwisha kutanga kila kinembelo, isambai buno bwipuzho:
-
Nanchi kwingijisha jino jifunde jiji mu kino kyepelo kwafwainwa kwimukwasha byepi kuba bintu bitokesha Yehoba ku muchima?
Mwina Kilishitu yense wafwainwa kwifuukwilapo mwine kutoma maalwa nangwa ne. Nangwa kya kuba bimye bimo utoma maalwa, kimye kikwabo wakonsha kubula kukeba kutoma
5. Yukai po mwafwainwa kupelela kutoma maalwa
Inge mwasalapo kutoma maalwa, vulukainga kino kishinka: Nangwa kya kuba Yehoba kechi wakanya kutoma maalwa ne, bino wakanya kukizhamo kutoma maalwa. Mambo ka o akainya? Tangai Hoseya 4:11, 18, ne kwisamba buno bwipuzho:
-
Ñanyi kintu kimweka inge muntu watoma maalwa avula?
Ñanyi kintu kyafwainwa kwitukwasha kubula kukizhamo kutoma maalwa? Twafwainwa kwiyuka bulongo ne kuyuka pa kupelela kutoma maalwa. Tangai Byambo bya Maana 11:2, ne kwisamba buno bwipuzho:
-
Mambo ka o kyawamina kuyuka pa kupelela kutoma maalwa?
6. Bintu byafwainwa kukwasha muntu kubula kukizhamo kutoma maalwa
Monai bintu byakwashishe muntu umo kuleka kutoma maalwa. Tambai VIDYO, ne kwisamba ano mepuzho.
-
Mu vidyo ye mwatamba, ñanyi bintu byaubanga ba Dmitry inge bapendwa?
-
Nanchi ba Dmitry kibapeelejile kuleka kutoma maalwa nyi?
-
Ñanyi kintu kibakwashishe kuleka kutoma maalwa?
Tangai 1 Kolinda 6:10, 11, ne kwisamba ano mepuzho:
-
Baibolo waambapo’mba ka pa kupendwapendwa?
-
Ñanyi bishinka byamwesha’mba muntu wajinga kala kitomi wakonsha kuleka kutoma maalwa?
Tangai Mateo 5:30, ne kwisamba buno bwipuzho:
-
Yesu byo aambile pa kishimpi kya kuchiba kuboko walumbulwilenga’mba twafwainwa kusankilapo bintu bimo pa kuba’mba tutokeshenga Yehoba ku muchima. Mwafwainwa kuba byepi inge kimukatazha kuleka kutoma maalwa avula? a
Tangai 1 Kolinda 15:33, ne kwisamba buno bwipuzho:
-
Ñanyi kintu kikafumamo inge ke mupwanañane na bantu batemwa kutoma maalwa avula?
BANTU BAMO BEPUZHA’MBA: “Nanchi Baibolo waamba’mba kutoma maalwa kwatama nyi?”
-
Mwafwainwa kwibakumbula’mba ka?
ÑANYI BISHINKA BYO MWAFUNDA?
Yehoba wabikileko binyu kuba’mba bitusangajikenga. Pano bino, wakanya kukizhamo kutoma maalwa avula ne kupendwapendwa.
Mepuzho a kupitulukamo
-
Baibolo waambapo’mba ka pa kutoma maalwa?
-
Makatazho ka aji mu kukizhamo kutoma maalwa?
-
Twafwainwa kumwesha byepi amba twanemeka bifuukulapo bakwetu pa mambo a kutoma maalwa?
KEBAI BISHINKA BIKWABO
Banyike bafwainwa kumonanga byepi kutoma maalwa?
Monaipo mashinda amo o mwakonsha kwingijisha pa kuba’mba muleke kutoma maalwa.
“Kuyuka pa Kupelela na Maalwa” (Kyamba kya Usopa, July 1, 2010)
Nanchi mwina Kilishitu wafwainwa kwivwanga mu kisela kya kwipakisha mitumwa ya maalwa nyi?
“Mepuzho Kufuma ku Batanga” (Kyamba kya Usopa, February 15, 2007)
Mu jishimikila ja kuba’mba “Najinga Shenyenye ku Maalwa,” monai uno muntu byo alekele kukizhamo kutoma maalwa.
“Baibolo Upimpula Bwikalo bwa Bantu” (Kyamba kya Usopa, May 1, 2012)
a Bantu bo kikatazha kuleka kutoma maalwa, bafwainwa kukeba bukwasho kuba’mba baleke. Ba dokotala bavula bamba’mba bonse bo kyakatazhanga kala kuleka kutoma maalwa bino luno baleka, kechi bafwainwa kutendeka jibiji kutoma ne.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
