DILONGI 43
Yinki mutindu Baklisto fueti tadila malavu?
Na yinza, mutindu bantu ketadilaka malavu mesuasana. Bantu mingi kezolaka kunua kintuadi na baninga ntangu bamekutana. Bayankaka meponaka kubika kunua malavu. Bayankaka diaka kekunuaka malavu mingi tii bakekolua. Yinki Biblia metuba na yina metadila malavu?
1. Yakele yimbi kunua malavu?
Biblia pekisa ve kunua malavu. Kutu, na kutanga makabu mingi yina mekatuka na Nzambi, Biblia mekotisa mpe ‘vinu yina kepesaka ntima ya muntu kiese.’ (Nkunga 104:14, 15) Ndambu ya bantu ya kukuikama yina Biblia metubila, bavuandaka kunua malavu.—1 Timoteo 5:23.
2. Yinki dilongi Biblia mepesa bayina mepona kunua malavu?
Yehova kezolaka ve kifu ya kunua malavu mingi mpe kukolua. (Bagalatia 5:21) Mpova na yandi metuba : ‘Kuvuanda ve na kati ya bantu yina kekunuaka vinu mingi.’ (Bingana 23:20) Na yau, kana beto mepona kunua malavu—ata na kisika na beto mosi—beto fueti kunua ve mingi tii na kitezo ya kukanisa diaka mbote ve, ya kukuma kutubatuba mpe ya kusala mambu ya buzoba, to kubebisa mavimpi na beto. Kana beto kelenda ve kukipekisa ntangu beto kena kunua malavu, yakevuanda mbote beto lemba kunua.
3. Yinki mutindu beto lenda zitisa banzengolo ya bantu yankaka na yina metadila malavu?
Muntu na muntu fueti baka nzengolo kana yandi kekunua malavu to ve. Beto fueti vueza ata muntu mosi ve yina mepona kunua malavu na bukatikati, mpe beto lenda kuika muntu ve na kunua kaka kana yandi zola na yandi ve. (Baroma 14:10) Beto keponaka kubika kunua kana yalenda natina bantu yankaka mambu. (Tanga Baroma 14:21.) Beto kesosaka ‘mambote na [beto] mosi ve, kasi ya muntu yankaka.’—Tanga 1 Bakorinto 10:23, 24.
KOTA NA MPINDA
Tadila bansikudukusu ya Biblia yina lenda sadisa nge na kubaka nzengolo ya kunua to ve mpe kitezo yina nge fueti kunua. Sosa diaka yina nge lenda sala kana nge kele na kifu ya kukolua malavu.
4. Baka nzengolo kana nge kekunua malavu
Yinki mutindu Yesu vuandaka tadila kunua malavu? Samu na kubaka mvutu, tadila kimangu ya ntete yina yandi salaka. Tanga Yoane 2:1-11, mpe na manima tadila biuvu yayi:
-
Na kutadila kimangu yango, yinki dilongi beto lenda baka na yina metadila mutindu Yesu vuandaka tadila malavu mpe bantu yina kekunuaka yau?
-
Lokola Yesu pekisaka ve kunua malavu, yinki mutindu Muklisto fueti tadila muntu yina mepona kunua?
Kasi, lokola Muklisto kele na kimpuanza ya kunua malavu, yazola monisa ve ti yakevuanda ntangu nionso diambu ya nduenga samu na yandi na kunua malavu. Tanga Bingana 22:3, mpe na manima tadila mutindu mambu yayi melanda lenda sala ti nge kunua to ve:
-
Nge zola nata ntomabilu to mashine.
-
Nge kele na buemba.
-
Munganga pekisaka nge kunua malavu.
-
Nge kena kulenda ve kukipekisa na yina metadila kitezo ya kunua.
-
Nsiku ya buala pesa nge ve nzila ya kunua malavu.
-
Nge kele kintuadi na muntu mosi yina meponaka kunua ve samu yandi vuandaka koka ve kukipekisa na ntama.
Nge fueti pesa bantu malavu na feti ya dikuela to na bafeti yankaka na bankundi? Samu na kumona yina lenda sadisa nge na kubaka nzengolo, tula VIDEO.
Tanga Baroma 13:13 mpe 1 Bakorinto 10:31, 32. Na manima ya kutanga verse mosi mosi, tadila kiuvu yayi:
-
Yinki mutindu kusadila nsikudukusu yayi lenda sadisa nge na kubaka nzengolo yina kesepedisa Yehova?
Konso Muklisto kebaka nzengolo samu na yandi mosi kana yandi kekunua malavu to ve. Ata kana na bantangu yankaka yandi kekunuaka malavu, na bantangu yankaka yandi lenda pona kumanga yau
5. Baka nzengolo ya kitezo ya malavu nge kekunua
Kana nge mepona kunua malavu, zaba diambu yayi: Atako Yehova pekisa ve kunua malavu, yandi mepekisa kunua mingi. Samu na yinki? Tanga Ozea 4:11, 18, mpe na manima tadila kiuvu yayi:
-
Yinki lenda salama kana muntu mekunua malavu mingi?
Yinki lenda sadisa beto na kunua mingi ve? Beto fueti zaba bandilu na beto, to kuzaba kitezo ya malavu yina beto kekoka kunua. Tanga Bingana 11:2, mpe na manima tadila kiuvu yayi:
-
Samu na yinki yakele dibanza ya mbote kutula ndilu ya kitezo yina beto fueti kunua?
6. Yinki lenda sadisa muntu na kubika kunua malavu mingi
Tala diambu yina sadisaka muntu mosi na kubika kunua malavu mingi. Tula VIDEO, mpe na manima tadila biuvu yayi melanda.
-
Na video yango, Dmitry vuandaka sala mambu ya yinki mutindu ntangu yandi vuandaka kunua malavu?
-
Yandi kokaka kubika kunua malavu na mbala mosi?
-
Yinki mutindu nsuka nsuka yandi nungaka kukatuka na kinanga ya kunua malavu mingi?
Tanga 1 Bakorinto 6:10, 11, mpe na manima tadila biuvu yayi:
-
Kukolua malavu kele mpenza diambu ya yimbi?
-
Yinki kena kumonisa ti muntu yina kekunuaka malavu mingi lenda soba?
Tanga Matayo 5:30, mpe na manima tadila kiuvu yayi:
-
Ntangu Yesu mesadila kifuani ya kuzenga diboko, yandi zolaka tuba ti beto fueti sala ngolo samu na kusala diambu yina kesepedisa Yehova. Yinki nge lenda sala kana nge kena kunuana samu na kukatuka na kinanga ya kunua malavu mingi? a
Tanga 1 Bakorinto 15:33, mpe na manima tadila kiuvu yayi:
-
Yinki bupusi bankundi na nge lenda vuanda na yau samu na mutindu na nge ya kunuina malavu?
MUNTU YANKAKA LENDA YUVUSA: “Kunua malavu kele mpenza yimbi?”
-
Yinki mvutu nge kepesa?
BUNKUFI
Yehova mepesa beto malavu samu na kiese na beto, kasi yandi mepekisa kunua mingi mpe kukolua malavu.
Mvutukulu
-
Yinki Biblia metuba na yina metadila malavu?
-
Yinki kele bivonza ya kunua mingi?
-
Yinki mutindu beto lenda zitisa banzengolo ya bantu yankaka na diambu metadila kunua malavu?
SOSA
Yinki mutindu bantuenia lenda baka banzengolo ya mbote na yina metadila malavu?
Mona mambu nge lenda sala samu na kununga kinanga ya kunua malavu.
“Tiká masanga na esika na yango” (Linɔ́ngi ya Mosenzeli ya 1 Janvier 2010)
Muklisto lenda nanguna mpe kututisa dikopo ya malavu na yandi na ya muntu yankaka na kiese nionso (toast)?
“Mituna ya batángi” (Linɔ́ngi ya Mosenzeli ya 15 Février 2007)
Na disolo “Nazalaki momeli monene ya masanga,” tala mutindu muntu mosi bikaka kunua malavu mingi.
“Biblia ebongolaka bato” (Linɔ́ngi ya Mosenzeli ya 1 Mai 2012)
a Bayina kele na kinanga ya kunua malavu, balenda vuanda na nsatu ya lusadusu ya bantu yina mezaba kisalu ya kusadisa bantu samu na kukatuka na kinanga yango. Minganga mingi kezabisaka na bantu yina vuandaka na kinanga ya kunua malavu na kubaka nzengolo ya kunua diaka ve ata fioti.
