MURU 43
Kodi Baibulo Linaonga N’ni Vakhani ya Walwa?
Athu vailambwela kanokaana maganizo o-iyana-iyana vakhani ya walwa. Amo-iwa kanosakula ng’wa walwa kawaledanga na afwiwa. Koma amo-i kanosakula ira kating’wenga walwa. Athu amo-iwa teto kanong’wecha walwa fiya volezela. Ndiye kodi Baibulo linaonga n’ni vakhani ya walwa?
1. Kodi ng’wa walwa kuchimwa?
Baibulo kalinaonga ira ng’wa walwa kuchimwa. M’malo mwiwa, laonganga vya vyongo vyapama vinjinji vyevyo Mulungu univa-ile liye linoromola teto “vinyu unoyo unasangalasa murima wa muthu.” (Salimo 104:14, 15) Teto alombwana na a-iyana amo-iwa ororomeleya oromoliwa m’Baibulo koong’wa walwa. — 1 Timoteyu 5:23.
2. Kodi Baibulo linapeleka malangizo oyi avi wa athu anayo kasakulile ng’wa walwa?
Yehova unokoondi-a ng’wa walwa vinjinji koma teto lezela. (Agalatiya 5:21) Mawaye kanaonga ira: “Kukale vaari va athu ong’wa vinyu vinjinji.” (Miyambo 23:20) Eeno nasakula ng’wa walwa ngakale nangali vaeki-u kan’nafuneela ng’wa vinjinji fiya volepela ganiza pama, lepela onga noira vyongo vyazelu kapena fiya voononga thanzi li-u. Komave akala vinanirucha ng’wa walwa moviruni-a, ninopanga pama keda iya.
3. Kodi ninatonyi-ede avi ira ninolemekeza vyevyo athu amo-iwa kasakulileathu vakhani ya walwa?
Muthu uliwetene unafuneela sakula akala unafuna ng’wa walwa kapena oong’wa. Muthu m’mo-iwa asakula ng’wa walwa mookwaranya malile, kanimuweluze koma teto akala m’mo-iwa usakulile ira kang’wenga walwa kanimukanyi-ede ira aambeele ng’wa. (Aroma 14:10) Komave iyo ninokoza sakula oong’wa akala athu amo-iwa kanakumudwe kapena akala ng’wa walwa unazi-e mavuto wa athu amo-iwa. (Welengani Aroma 14:21.) Ninoesaesa pewa panga vyongo ‘vyopinduli-a iyo eki-u,’ koma ninoira teto ‘vyopinduli-a athu amo-iwa.’ — Welengani 1 Akorinto 10:23, 24.
FUNJEDANI VYOWENJEDELEYA
Onani makundo a m’Baibulo anayo kanaukami-eni sakula ng’wa walwa kapena oong’wa, koma teto injiva wa walwa unoyo munang’we nyo. Teto onani vyevyo munaire nyo akala mun’na vuto long’wa walwa mooviruni-a.
4. Nyo munokoza sakula ng’wa kapena oong’wa walwa
Kodi maganizo a Yesu kali woi avi vakhani ya walwa? Ira nisomede yofuka inela, tiyemoni nione yodabwi-a yowambeela ineyo Yesu airile liye. Welengani Yohani 2:1-11, era eeno tapanyani vyofuka vyo-arelavi:
-
Malinga na vyevyo niwelengile iyo, kodi maganizo a Yesu mboi avi vakhani ya walwa? Nanga unaaona avi athu anayo kanasakula ng’wa walwa?
-
Voi Yesu kaaona ira ng’wa walwa kuchimwa, kodi Mkiristu unafuneela muona avi muthu unoyo usakulile ng’wa walwa?
Ngakale ira Mkiristu ukaana ufulu wosakula ng’wa walwa, vathawi dimo-i chinakale zelu panga vyevi. Welengani Miyambo 22:3, era eeno onani mwemo makundo o-arelala kanaukami-edeleniathu iziwa akala munafuneela ng’wa walwa kapena oong’wa:
-
Akala munafuna endi-a galimoto kapena indi-eda chito machini amo-iwene.
-
Akala muli woembekezela.
-
Akala dokokotala uwongile ira kamung’wenga walwa.
-
Akala munang’wa walwa mooviruni-a.
-
Akala lamulo lailambwinyu linakoondi-a ng’wa walwa.
-
Akala muli na muthu unoyo usakulile ira kang’wenga walwa chifukwa yoi mundulimu oong’wa walwa mooviruni-a.
Kodi chin’ni inaukami-eni iziwa akala pivyofwaneelela kaana walwa va pwando laukwati kapena vavyoireya vimo-i? Ira muiziwe vyofwaneelela panga, onelani VIDIYO.
Welengani Aroma 13:13 na 1 Akorinto 10:31, 32. Mwawelenga lemba lililetene, tapanyani yofuka yo-arelela:
-
Kodi indi-eda chito makundo a mulembali unanikami-e avi sakula vyongo vyevyo vinaomeli-e Yehova?
Mkiristu uliwetene unosakula yeka ng’wa walwa kapena oong’wa. Ngakale Mkiristu unoyo unang’wa walwa, thawi dimo-i unokoza sakula oong’wa
5. Ganizelani injiva wa walwa unoyo munang’we nyo
Akala musakulile ng’wa walwa, muumbuwelenga likundo li: Ngakale ira Yehova kanakoondi-a ng’wa walwa, koma unokoondi-a ng’wa walwa vinjinji. Chifukwa n’ni vyevi vili eeno? Welengani Hoseya 4:11, 18, era eeno tapanyani yofuka yo-arelela:
-
Chin’ni inaireye akala muthu unang’we walwa unjinji?
Chin’ni inanikami-e ira kaning’we walwa unjinji? Ninafuneela iziwa malile nopewa ng’wa walwa mokwaranya malile. Welengani Miyambo 11:2, era eeno tapanyani yofuka yo-arelela:
-
Chifukwa n’ni munafuneela vi-elela malile a walwa unoyo munafuneela nyo ng’wa?
6. Chin’ni ineyo inakami-e muthu iya ng’wa walwa mokwaranya malile?
Onani vyevyo vyamukami-ile muthu m’mo-iwa ira a-iye ng’wa walwa mokwaranya malile. Onelani VIDIYO, era eeno tapanyani vyofuka vyo-arelavi.
-
Kodi Dmitry aira n’ni alezela?
-
Kodi ookwakwani-a iya ng’wa walwa wandila imo-ive?
-
Chin’ni yamukami-ile ira a-iye ng’wa walwa vinjinji?
Welengani 1 Akorinto 6:10, 11, era eeno tapanyani vyofuka vyo-arelavi:
-
Kodi Baibulo linaonga n’ni vakhani yong’wa walwa vinjinji?
-
Chin’ni inatonyi-eda ira muthu unoyo unag’wa walwa mokwaranya malile unokoza chenja?
Welengani Mateyu 5:30, era eeno tapanyani yofuka yo-arelela:
-
Yesu aonga liye vyodula ndanda atapulela ira ninafuneela lolela iya panga vyongo vimo-i nayolinga yoi niomeli-e Yehova. Kodi munaire avi akala vinauruchani iya ng’wa walwa vinjinji? a
Welengani 1 Akorinto 15:33, era eeno tapanyani yofuka yo-arelela:
-
Kodi chin’ni inauireeleni akala munawaleda na athu anayo kanaomeliwana ng’wa walwa vinjinji?
KODI MUTHU M’MO-IWA ANGAUFUKILENI IRA: “Kodi ng’wa walwa kuchimwa?”
-
Munamusomede avi?
VYEVYO NIFUNJEDILE IYO
Walwa chimphaso ineyo Yehova aniva-ile liye ira nisangalalenga, koma liye kanafuna ira ning’wenga walwa vinjinji kapena lezela.
Vyofuka Vyoweli-eda
-
Kodi Baibulo linaonga n’ni vakhani ya walwa?
-
Kodi ng’wa walwa vinjinji unazi-a mavuto aavi?
-
Kodi ninatonyi-ede avi ira ninolemekeza vyevyo athu amo-iwa kasakulileathu vakhani ya walwa?
ONANI VIMO-I
Kodi anyamata kanasakule avi vyongo mwazelu vakhani ya walwa?
Onani ndila dedo munafuneela nyo arela ira mumali-e vuto long’wa walwa mooviruni-a.
“Khalani ndi Maganizo Oyenera Pankhani ya Kumwa Mowa” (Nsanja ya Olonda, January 1, 2010)
Kodi Mkiristu unofuneela irana mwambo oombani-a mabotolo kapena matambula avyong’wa?
“Mafunso Ochokera kwa Owerenga” (Nsanja ya Olonda, February 15, 2007)
Mukhani yoi “Ndinali Mbiyang’ambe,” onani vyevyo vyakami-ile muthu mo-iwa ira a-iye ng’wa walwa vinjinji.
a Athu anayo walwa waanyowele vinjinji kanokoza funeela tandizo lauchipatala ira kakwakwanni-e iya. Moi madokotala anjinji kanoonga ira athu anayo kan’na vuto leli katinafuneela ng’wa walwa olo vang’ono.
