DILONGESHA DIA 43
Mmunyi mudi bena Kristo ne bua kumona dinua dia maluvu?
Pa buloba bujima, bantu batu ne mmuenenu mishilangane bua dinua dia maluvu. Bamue batu baanua mu mpukampuka padibu ne balunda babu. Bakuabu kabatu nansha basue kuanua to. Banga batu bobu baanua too ne padibu bakuatshika. Kadi Bible yeye udi wamba tshinyi bua dinua maluvu?
1. Mbibi bua kunua maluvu anyi?
Bible ki mmukandike dinua dia maluvu to. Utu mene uleja ne: mu bintu bimpe bivule bidi Nzambi mutupeshe mudi “mvinyo udi usankisha muoyo wa muntu.” (Misambu 104:14, 15) Ndambu wa balume ne bakaji ba lulamatu badi Bible utela bavua pabu banua maluvu.—1 Timote 5:23.
2. Mmibelu kayi idi Bible upesha badi basue kunua maluvu?
Yehowa mmukandike dinua maluvu mapite bungi ne dikuatshika. (Galatiya 5:21) Dîyi diende didi diamba ne: “Kuikadi munkatshi mua bantu badi banua mvinyo wa bungi.” (Nsumuinu 23:20) Nanku tuetu tunua maluvu, nansha mu bantu anyi pa nkayetu, katuena ne bua kuanua mapite a katutshiyi mua kuela meji bimpe anyi kudikanda mu ngakuilu wetu peshi mu bienzedi bietu, anyi a mafuane kutukebela masama to. Tuetu katuyi tukokesha mua kudikanda mu nnuinu wetu wa maluvu, mbitambe buimpe tuetu kulekela nansha dinua tuluvu tukese.
3. Mmunyi mutudi mua kunemeka mapangadika a bakuabu mu bualu bua maluvu?
Muntu yonso udi ne bua kudiangatshila dipangadika dia kunua maluvu anyi kubenga kuanua. Katuena ne bua kubipisha muntu udi munange kuanua pa nnuinu anyi kusuisha udi kayi musue kuanua bua aanue anu kuanua nansha. (Lomo 14:10) Bakuabu bobu balenduka bua dinua dietu dia maluvu, mbimpe tuetu kualekela. (Balayi Lomo 14:21.) Katuena tukeba ‘anu diakalenga dietu nkayetu, kadi tukebe dia bakuabu’ kabidi.—Balayi 1 Kolinto 10:23, 24.
BUELA MU BUONDOKE
Tumone mêyi manene a mu Bible akuambuluisha bua kumanya ni udi ne bua kunua maluvu, ne bungi buudi mua kuanua biwikala muasue. Neumone kabidi tshia kuenza biwikala uluangana bua kusuluka ku bupika bua bukanuayi.
4. Manya ni bikala bimpe bua wewe kunua maluvu
Yezu uvua umona dinua maluvu bishi? Bua kupeta diandamuna, konkononayi tshishima tshia kumpala tshivuaye muenze. Balayi Yone 2:1-11, pashishe nuandamune nkonko eyi:
-
Tshishima etshi tshidi tshitulongesha tshinyi bua mudi Yezu umona maluvu ne badi baanua?
-
Bu muvua Yezu kayi mubipishe dinua dia maluvu, mmushindu kayi udi muena Kristo ne bua kumona muntu udi uanua?
Wamanya! Nansha mudi muena Kristo ne budikadidi bua kunua maluvu, kabiena biumvuija ne: mbia meji misangu yonso bua kuanuaye to. Balayi Nsumuinu 22:3, pashishe nuyukile bua muwatumikila dîyi dinene didimu bua kunua anyi kubenga kunua maluvu mu nsombelu idi ilonda eyi:
-
Paudi ne bua kuendesha mashinyi anyi tshiamu tshikuabu.
-
Paudi ne difu.
-
Padi doktere mukukandike maluvu.
-
Pawikala kutshiyi mumanye mua kudikanda mu bungi buudi uanua.
-
Padi mbulamatadi kayi mukuanyishile bua kunua maluvu.
-
Panudi ne muntu udi udikanda bua kuanua bua lutatu luvuaye nalu kale lua bukanuayi.
Mbimpe wewe kuelela bantu maluvu mu difesto dia dibaka anyi dia bualu bukuabu anyi? Bua kumanya mua kuangata dipangadika, tangilayi FILME.
Balayi Lomo 13:13 ne 1 Kolinto 10:31, 32. Panyima pa dibala mvese ne mvese yonso idi muaba eu, nuandamune lukonko elu:
-
Mmunyi mudi kutumikila kua dîyi dinene dia mu mvese eu mua kukuambuluisha bua kuangata dipangadika diasankisha Yehowa?
Muena Kristo yonso udi udiangatshila dipangadika dia kunua maluvu anyi kubenga kuanua. Nansha yeye unua maluvu bimue bikondo, udi mua kubenga kuanua bikondo bikuabu
5. Dikosela bungi bua maluvu awikala unua
Biwasungula bua kuikala kunua maluvu, wamanya ne: nansha mudi Yehowa kayi uabipisha, mmukine dinua bipitshisha. Bua tshinyi? Balayi Hoshea 4:11, 18, pashishe nuandamune lukonko elu:
-
Ntshinyi tshidi mua kuenzekela muntu udi unua maluvu mapite bungi?
Mmushindu kayi utudi mua kuepuka kunua kua maluvu mapite bungi? Mbimpe tuikale bena bupuekele badi bamanye mikalu yabu. Balayi Nsumuinu 11:2, pashishe nuandamune lukonko elu:
-
Bua tshinyi mbimpe wewe kudikosela bungi bua maluvu awikala unua?
6. Mua kutshimuna bunuavi
Mona tshiakambuluisha muntu mukuabu bua kulekela bunuavi bua maluvu mapite bungi. Tangilayi FILME, pashishe nuandamune nkonko idi ilonda.
-
Mmalu kayi atudi bamone mu filme eu avua maluvu enzeja Dmitry?
-
Uvua mukokeshe diakamue bua kulekela kunua anyi?
-
Mmunyi muakafikaye ku disuluka mu bupika bua bukanuayi bua maluvu?
Balayi 1 Kolinto 6:10, 11, pashishe nuandamune nkonko eyi:
-
Bua tshinyi dikuatshika dia maluvu ndibi menemene?
-
Tshidi tshileja ne: muena bunuavi bua maluvu a bungi udi mua kushintuluka ntshinyi?
Balayi Matayi 5:30, pashishe nuandamune lukonko elu:
-
Kukosa kua tshianza kuvua Yezu muambe eku kudi kumvuija kudipangisha amue malu bua kusankisha Yehowa. Ntshinyi tshiudi mua kuenza biwikala uluangana bua kulekela bunuavi bua maluvu a bungi? a
Balayi 1 Kolinto 15:33, pashishe nuandamune lukonko elu:
-
Balunda badi mua kukufikisha ku dikala unua maluvu mushindu kayi?
MUNTU YEYE MUKUEBEJE NE: “Kunua maluvu nkubi anyi?”
-
Udi mua kumuambila tshinyi?
TSHIA KUKUATA
Yehowa mmutupeshe maluvu bua kusankisha muoyo wetu, kadi mmukandike bunuavi ne dikuatshika.
Diambulula
-
Ntshinyi tshidi Bible wamba bua maluvu?
-
Kunua maluvu mapite bungi kudi ne njiwu kayi?
-
Mmunyi mutudi mua kunemeka mapangadika a bakuabu mu bualu bua dinua maluvu?
BIA KUTANGILA KABIDI
Mmunyi mudi bansonga ba bitende mua kumanya tshimpe tshia kuenza mu bualu bua maluvu?
Mona malu a kuenza bua kufika ku disuluka ku bupika bua maluvu.
“Tshia kuenza bua kuteka maluvu pa muaba wawu” (Tshibumba tshia Nsentedi, 1/7/2010)
Bena Kristo badiku mua kukumakaja vere yabu bajingilangana diakalenga kumpala kua kunua maluvu anyi?
Bala tshitupa tshia “Mvua kanuayi ka dikema!” umone muvua munuavi wa maluvu a bungi mulekele kuanua nanku.
“Bible udi ushintulula bantu” (Tshibumba tshia Nsentedi, 1/5/2012)
a Bua kusuluka ku bupika bua bukanuayi bua maluvu, bakanuayi badi pamuapa mua kukeba diambuluisha dia badoktere badi bapiluke mu bualu ebu. Badoktere ba bungi badi bamba ne: bantu bakavua bapika ba maluvu ki mbimpe bobu kulabula tukese to.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
