Khawvêl puma mite chuan zû chungchângah thlîr dân hrang hrang an nei a. Ṭhenkhat chuan engemaw chânga ṭhiante nên in-ho chu an thlang a. Mi dangte chuan in miah loh an thlang a ni. Mahse, mi dang lehte erawh chuan a lutukin an in thung. Zu chungchânga Bible thlîr dân chu eng nge ni?

1. Zu in hi a sual sual em?

Bible chuan zu in a khap lo va. Chumi nêna inkalh takin, Pathian min pêk thil ṭha tam takte zînga mi niin Bible chuan a sawi: “Mihring thinlung tihlâwmna uain,” tiin. (Sâm 104:14, 15) Bible-a târ lan mi rinawm a hmei a pa ṭhenkhat chuan zû an in a ni.—1 Timothea 5:23.

2. Zu in thlangtute tân Bible-in eng thurâwn nge a pêk?

Jehova chuan a lutuka zu in leh ruih chu a dem a. (Galatia 5:21) Bible chuan: “Uain heh mite zîngah . . . tel suh,” a ti. (Thufingte 23:20) Chuvângin, zu in kan thlang a nih chuan—mahni chauhva kan awm pawhin—kan ngaihtuahna a fîm loh thleng, kan thusawi leh thiltihte kan thunun theih loh thleng, a nih loh leh kan hrisêlnain a zawh loh thlengin kan in tûr a ni lo. Kan inthunun thei lo a nih chuan, inhuam takin kan nghei hmak tûr a ni.

3. Engtin nge zû nêna inkûngkaiha mi dangte thu thlûkna kan zahsakzia kan lantîr theih?

Mi tinin zû an in dâwn leh dâwn lohvah thu tlûkna an siam tûr a ni a. A âwm tâwka zu in thlangtute chu kan sawisêl tûr a ni lo va, a in duh lote pawh in tûrin kan nawrlui tûr a ni hek lo. (Rom 14:10) Zu kan innain mi dangte tân harsatna a thlen dâwn a nih chuan in loh kan thlang ang. (Rom 14:21 chhiar rawh.) “Mahni ṭhatna tûr zawng lovin, mi dang ṭhatna tûr” kan zawng zâwk a ni.—1 Korinth 10:23, 24 chhiar rawh.

 ZIR BELHIN HMUH BELH RAWH

4. I in dâwn leh dâwn lohvah thu tlûkna siam rawh

Engtin nge Isua’n zu in chungchâng a thlîr? A chhânna hriat nân, a thilmak tih hmasak ber lo ngaihtuah ta ila. Johana 2:1-11 chhiarin, hêng zawhnate hi sawiho vang che u:

• He thilmak tih aṭang hian Isua’n zu chungchâng leh a intute a thlîr dân eng nge kan hriat?

• Isua’n zu in a dem loh avângin, engtin nge Kristian chuan zu in thlangtu chu a thlîr ang?

Mahse, Kristianin zû a in thei tih avâng maiin, engtik hunah pawh a in thei tihna a ni lo. Thufingte 22:3 chhiarin, a hnuaia dinhmunte hian zû i in dâwn leh dâwn loh chunga nghawng a neih dân ngaihtuah ang che:

• Motor i khalh, a nih loh leh khâwl thil i khawih dâwn a nih chuan.

• Nau i pai a nih chuan.

• Doctor-in zû in lo tûra thurâwn a pêk che chuan.

• Inthunun thei lova i in ṭeuh zêl a nih chuan.

• Dânin zu in a khap chuan.

• A inthunun theih loh avânga zû lo nghei tawh tuemaw bula i awm chuan.

Mo lawmnaah, a nih loh leh intihhlimna dangah zû i chhawp ang em? Thu tlûkna siam tûra ṭanpui theitu che hriat nân, VIDEO chu chhuah rawh.

Rom 13:13 leh 1 Korinth 10:31, 32 chhiar rawh. Bible châng târ lan pakhat in chhiar zawh apiangin, he zawhna hi sawiho vang che u:

• Engtin nge he thu bul nunpuina hian Jehova tilâwmtu thu tlûkna siam tûra a ṭanpui theih che?

 5. In zât tûr bituk chin nei rawh

Zu in i thlang a nih chuan, hei hi hre reng rawh: Jehova chuan zu in khap lo mah se, a lutuka in chu a dem a ni, tih hi. Engvângin nge? Hosea 4:11, 18 chhiarin, he zawhna hi sawiho vang che u:

• Miin a in tam lutuk hian eng thil nge thleng thei?

Engtin nge a lutuka zu in chu kan pumpelh theih? A âwm tâwk, a nih loh leh kan zawh tâwk kan hre tûr a ni. Thufingte 11:2 chhiarin, he zawhna hi sawiho vang che u:

• I in zât tûr bituk chin neih chu engvângin nge thil ṭha tak a nih?

6. Zu hman sualna do hneh rawh

 KHAIKHAWMNA

Jehova chuan zû chu kan hlimna atân min pe a; mahse, a lutuka in leh zu ruih chu a dem a ni.

Ennawnna

• Zu chungchânga Bible thlîr dân chu eng nge ni?

• A lutuka zu in hlauhawmna chu eng nge ni?

• Engtin nge zu in chungchânga mi dangte thu tlûkna siam kan zahsak theih?