Twitz tkyaqil Txʼotxʼ, at junxichaq kyximbʼetz xjal tiʼjju tuʼn t-xi qkʼaʼn qʼeʼn moqa traw. Ateʼ junjun in xi kykʼaʼn chʼin qʼeʼn junjun maj kyukʼil kyamiw. Atzun junjuntl o bʼaj kyximen tuʼn miʼn t-xi kykʼaʼn nix chʼin. Ex ateʼ junjuntl nimxix qʼeʼn in xi kykʼaʼn tzmaxi aj kytxʼujti moqa aj kyok te bol. Pero, ¿tiʼ in tzaj tqʼamaʼn Tyol Dios tiʼj qʼeʼn?

1. ¿Jun ilpe tuʼn t-xi qkʼaʼn qʼeʼn?

In tzaj tqʼamaʼn Biblia qa nya jun il qa ma txi qkʼaʼn chʼin qʼeʼn. ¿Tiquʼn? Tuʼnju aj tyolin kyiʼj oyaj o tzaj tqʼoʼn Dios qe, in tzaj tqʼamaʼn qa a vino jun kyxol qe oyaj lu ex in tzalaj qanmi tuʼn (Salmo 104:​14, 15). Ax ikx, in yolin Biblia kyiʼj junjun tmajen Dios xi kykʼaʼn chʼin qʼeʼn (1 Timoteo 5:​23).

2. ¿Tiʼ consej in tzaj tqʼoʼn Tyol Dios kye qeju in kubʼ kyximen tuʼn t-xi kykʼaʼn qʼeʼn?

Nya oʼkx in tzaj tqʼamaʼn Jehová tuʼn miʼn qtxʼujti, sino ax ikx tuʼn miʼn t-xi qkʼaʼn nim qʼeʼn (Gálatas 5:​21). In tzaj tqʼamaʼn Tyol Dios jlu: «Miʼn tzʼok tukʼin tibʼa kyukʼil qe xjal kʼal qʼeʼn» (Proverbios 23:​20). Tuʼntzunju, qa ma kubʼ qximen tuʼn t-xi qkʼaʼn chʼin qʼeʼn qjunalx moqa kyukʼil txqantl, bʼaʼn tuʼn miʼn qikʼ tibʼaj tuʼntzun miʼn tnaj qnabʼil, tuʼn miʼn tten nya bʼaʼn qmod ex tuʼn miʼn ttzaj yabʼil qiʼj. Qa mlay bʼant tuʼn qjakʼunte qibʼ tiʼj jlu, maslo bʼaʼn tuʼn miʼn t-xi qkʼaʼn chʼin qʼeʼn.

3. ¿Tzeʼn jaku tzʼok qqʼoʼn toklen aju in bʼant kyuʼn junjuntl?

Teyele te junjun kbʼel t-ximen qa kxel tkʼaʼn chʼin qʼeʼn moqa miʼn. Qa at jun o bʼaj t-ximen tuʼn t-xi tkʼaʼn chʼin qʼeʼn, mintiʼ tuʼn qyolin nya bʼaʼn tiʼj. Ax ikx, qa at jun o kubʼ t-ximen tuʼn miʼn txi tkʼaʼn nix chʼin qʼeʼn, mintiʼ tuʼn qok ten obligarilte tuʼn t-xi tkʼaʼn (Romanos 14:​10). Ex tbʼanel tuʼn miʼn t-xi qkʼaʼn chʼin qʼeʼn qa nya bʼaʼn in nela toj kywitz txqantl (uʼjinktza Romanos 14:​21). In tzaj tqʼamaʼn Tyol Dios jlu qe: «Mya noq oʼkx tuʼn kyximane tiʼj ju bʼaʼn te kyeye, ax ikx tuʼn kyximane tiʼj alkyeju bʼaʼn kye txqantl» (uʼjinktza 1 Corintios 10:​23, 24).

 QO JYON MAS TQANIL

4. Bʼaʼn tuʼn tkubʼ t-ximana qa kxel tkʼaʼna chʼin qʼeʼn moqa miʼn

¿Tiʼ t-ximbʼetz Jesús ten tiʼj qʼeʼn? Tuʼn ttzaqʼwet xjel lu quʼn, qo xnaqʼtzan tiʼj tnejel milagr bʼant tuʼn. Kyuʼjinktze Juan 2:1 a 11 ex che yoline kyiʼj xjel lu:

• ¿Tiʼ in tzaj tyekʼin txʼolbʼabʼil lu qe tiʼj alkye t-ximbʼetz Jesús ten tiʼj qʼeʼn ex kyiʼj qeju in xi kykʼaʼn chʼin?

• Kyaj tyekʼin Jesús qa bʼaʼn tuʼn t-xi tkʼaʼn jun okslal chʼin qʼeʼn. Tuʼntzunju, ¿alkye t-ximbʼetz jun okslal ktel tiʼj juntl okslal o bʼaj t-ximen tuʼn t-xi tkʼaʼn chʼin qʼeʼn?

Maske nya jun il tuʼn t-xi tkʼaʼn jun okslal qʼeʼn, nya a t-xilen jlu qa jaku bʼant tuʼn t-xi tkʼaʼn toj alkyexku ambʼil. Kyuʼjinktze Proverbios 22:3 ex che yoline tiʼj qa bʼaʼn tuʼn t-xi tkʼaʼn jun xjal chʼin qʼeʼn moqa miʼn kyoj ambʼil ik tzeʼn jlu:

• Aj tmanejarin tiʼj jun kar moqa tiʼj jun máquina.

• Aj tok ten tal jun xuʼj.

• Aj ttzaj tqʼamaʼn doctor te tuʼn miʼn t-xi tkʼaʼn qʼeʼn.

• Aj tkubʼ t-ximen qa kwest tuʼn tjakʼunte tibʼ tiʼj qʼeʼn.

• Aj mintiʼ in tzaj tqʼoʼn ley ambʼil kye xjal tuʼn t-xi kykʼaʼn qʼeʼn.

• Aj tten tukʼil jun xjal o kubʼ t-ximen tuʼn miʼn t-xi tkʼaʼn chʼin qʼeʼn tuʼnju kwest ela toj twitz tuʼn tkyaj ttzaqpiʼn toj ambʼil ojtxe.

¿Bʼaʼnpe tuʼn t-xi tqʼoʼna chʼin qʼeʼn kye xjal in che pon toj jun boda moqa kye qeju in nok kychmon kyibʼ tuʼn kytzalaj jun rat? Tuʼn tel kynikʼe tiʼj, kyqʼonke kywitze tiʼj VIDEO.

Kyuʼjinktze Romanos 13:​13 ex 1 Corintios 10:​31 ex 32. Otoqxi jaw kyuʼjine teyele junjun texto, jaku che yoline tiʼj xjel lu:

• ¿Alkye tten jaku tzʼonin nabʼil lu tiʼja tuʼn tjaw tjyoʼna aju mas bʼaʼn toj twitz Jehová?

 5. Bʼaʼn tuʼn tbʼaj t-ximana jniʼ qʼeʼn kxel tkʼaʼna

In tzaj tqʼoʼn Jehová ambʼil tuʼn t-xi tkʼaʼna chʼin qʼeʼn, noqtzun tuʼnj, bʼaʼn tuʼn ttzaj tnaʼna qa nya taj tuʼn t-xi tkʼaʼna nim. ¿Tiquʼn? Kyuʼjinktze Oseas 4:​11 ex 18 ex che yoline tiʼj xjel lu:

• ¿Tiʼ jaku tzaj tiʼj jun xjal qa in xi tkʼaʼn nimxix qʼeʼn?

¿Tiʼ jaku tzʼonin qiʼj tuʼn miʼn t-xi qkʼaʼn nim qʼeʼn? Il tiʼj tuʼn tok qxqʼuqin qibʼ ex tuʼn tel qnikʼ tiʼj jniʼ jaku bʼaj quʼn. Kyuʼjinktze Proverbios 11:2 ex che yoline tiʼj xjel lu:

• ¿Tiquʼn bʼaʼn tuʼn tbʼaj t-ximana jniʼ qʼeʼn kxel tkʼaʼna?

6. ¿Tiʼ jaku tzʼonin tiʼj jun xjal tuʼn ya miʼn tkʼan qʼeʼn?

 TOJ CHʼIN YOL

O tzaj tqʼoʼn Jehová qʼeʼn tuʼn qtzalaj, pero nya bʼaʼn in nela toj twitz tuʼn ttxʼujti jun xjal moqa tuʼn t-xi tkʼaʼn nim qʼeʼn.

Aju ma qo yolin tiʼj

• ¿Tiʼ in tzaj tqʼamaʼn Tyol Dios tiʼj qʼeʼn?

• ¿Tiʼ nya bʼaʼn jaku tzaj tiʼj jun xjal qa ma txi tkʼaʼn nim qʼeʼn?

• ¿Alkye tten in kubʼ qyekʼin qa in nok qqʼoʼn toklen kyximbʼetz txqantl at tiʼj qʼeʼn?