MPANTTA 43

Ibiiblya inooluma isiyani nhina uwurya mapha?

TOCAR

Ntuninyani motheene atthu arina moopuwelelo oovirikana nhina uwurya mapha. Ahaavo unaacivela ikwaha ikhwaawe uwurya naasimpwanaaya, akiinaayo khampheela uwurya wenenwo ni ahaavo akiina anwurya mpaka uhapaliya. Isiyani inhimyaaya Ibiiblya nhina uwurya mapha?

1. Niireke uwurya mapha ikhanle itthu yootakhala?

Ibiiblya khineera wiira uwurya mapha ikhanle itthu yootakhala. Uhiya commo, iyo ineera wiira “iviinyu intteeliha nrima wa pinaatamu” inaapanka mphantte wotthuvo cinci cinivahilyaawe Nluku. (Isaalimu 104:14, 15) Alopwana ni athiyana akhwaawe anromoliya mbiiblyani yanwuryaka mapha.—1 Timotiyu 5:23.

2. Ikanoni Ibiiblya inaavahaaya ale anwurya mapha?

Yehova neera wiira ikhanle itthu yoonanara uwurya cinene ni uhapaliya. (Akalasiya 5:21) Ibiiblya ineera: “Nhikhaleni wamoca naale anwurya iviinyu venci.” (Miruku 23:20) Phimaana, napheelaka uwurya nihaana niivaracaka wiira nihiwurye pusya hataa ukhalaka wiira niri veekha. Uwurya cinene pooti umwiiriha ntthu uhuupuwela saana, uhiivaraca nhina wo citthu cinoolumaawe ni hataa cimpankaawe. Uhiya commo, uwurya cinene ciicammo pooti umpanka pusya ntthu mwiirutthuni wawe. Wakhalaka wiira khaninkhitiri wiivaraca nhina mananna cinwuryeehu mapha, nihaana nikupaleelaka uhiya uwurya wenennwo.

3. Manannani cinlamuliyeehu woonihera uhisima ile ilakenlyaaya akhunanihu?

Uwurya mapha ikhanle itthu inlakelaawe khula ntthu mwaaneennyaawe. Phimaana, hiivano khaninlamuliya umuuluma pusya ntthu alakelaka uwurya nimananna omaana. Ciicammo khaninlamuliya unkhanyereriha ntthu uwurya. (Arooma 14:10) Noonaka wiira hiiva nawuryaka ninaahala waawaanela masakha akhunanihu ni ahaavo uhinhala waacivela, nihaana nilakelaka uhiwurya. (Nsome Arooma 14:21.) Hi nineekurumica upanka “kahi itthu inniphwanyiha ifayita, masi itthu inomphwanyiha ifayita nkhunanihu.”—Nsome 1 Akorintu 10:23, 24.

MUNCERERE WIITTHUCA WINYU

Moone mattharelelo o mbiiblyani anhala wuukaviherani ulakela wakhala wiira nhaana nwuryaka awula mena, ni ucuwela wiihelela mpika mwalakelaka uwurya. Ni ciicammo moone itthu inlamuliyeenyu upanka wakhala wiira uwurya unawuuwaanelani masakha.

4. Nlakele wakhala wiira nnaahala uwurya awula mena

Yesu oonela cani uwurya iviinyu? Mwiiriirya waapacerihilyaawe upanka unaanikavihera ucuwela waakhuliya waya nna nikohonna. Nsome Joau 2:1-11, ni mwamalihaka usoma, moopele mwaha ala makohwaala:

Mwiiriirya waapankilyaawe Yesu unnikavihera cani ucuwela (1) mananna uyova cinweheraawe mapha ni (2) mananna cinaaweheraawe ale anlakela uwurya?
Ukhala wiira Yesu khenre wiira uwurya mapha ikhanle itthu yootakhala, vano manannani makristau cinlamuliyaaya waawehera ale anlakela uwurya?

Nlattu Ibiiblya woohiira wiira nkristau khanlamuliya uwurya, kahi wiira iyo phi itthu yooreera upanka ukati wotheene. Nsome Miruku 22:3, ni mwamalihaka usoma, moopele mwaha ipontu ciri vathi cinhala wuuthoonyerani wiira unaareerana uwurya mapha awula mena, wakhalaka wiira:

Nnopheela urwaa weettiha ikaaro awula uvarana nteko maakina moolupale.
Nri niirukulu.
Meetiku howiirelani wiira nhiwurye.
Unawuurikarikani wiivaraca nhina inanna cinlamuliyeenyu uwurya.
Malamulo o ncoko unkhaleenyu anawuukhottiihani uwurya.
Nri nintthu lakenle uhiwurya kontha ahopaca umphwanya masakha nlattu woowurya.

Niireke nyuuva pooti waavaha mapha atthu yaalattunleenyu wakacamentuni awula nipuro nikhwaawe? Isiyani inhala wuukaviherani ucuwela itthu yooreera upanka? Moone IVIDIYU.

IVIDIYU: Miiva pooti waavaha mapha atthu yaalattunlyaaka? (2:41)

Nsome Arooma 13:13 ni 1 Akorintu 10:31, 32. Mwamalihaka usoma iveerusu cotheenennya, moopele mwaha nna nikohonna:

Manannani weettela ala mattharelelwaala cinhalaaya wuukaviherani ulakela upanka itthu inoncivela Yehova?

Uwurya mapha ikhanle itthu inlakelaawe ntthu veekha cawe. Nkristau ikwaha ikhwaawe naalakelaka uwurya, masi ikwaha ikhwaawe mena.

5. Wakhala wiira nholakela uwurya mapha, mwiihelele mpika

Wakhalaka wiira nyuuva nnaalakela uwurya mapha, nhiliyale ila itthwiila: Yehova khanaateeliha uwurya mapha, masi uyo naateeliha uwurya cinene. Kontha isiyani? Nsome Oseiya 4:11, 18, ni mwamalihaka usoma, moopele mwaha nna nikohonna:

Isiyani immwiirannyeela ntthu awuryaka cinene?

Isiyani inhala unikavihera uhiwurya cinene? Nihaana niivaracaka awula nihaana niihelelaka mipika. Nsome Miruku 11:2, ni mwamalihaka usoma, moopele mwaha nna nikohonna:

Kontha isiyani unaareera wiihelela mpika nhina inanna cinlamuliyeenyu uwurya mapha?

6. Citthu cinhala unkavihera ntthu nowurya cinene

Moone itthu yankavihenre nlopwana mmoca uhiya iviisiyu yaarinaawe yoowurya cinene nipha. Moone IVIDIYU ni mwamalihaka woona, moopele mwaha ala makohwaala:

IVIDIYU: ‘Makhalelwaaka yahokitosa’ (6:32)

Ividiyu imalihileehu woona, nlopwana neehaniya Dmitry isiyani yaapankaawe awuryaka?
Niireke ikwaha yoopacera yaalakenlyaawe uhiya uwurya mapha ahokhitiri?
Vano manannani caakhitinryaawe uhiya iyo iviisiyu yaarinaaweeyo?

Nsome 1 Akorintu 6:10, 11, ni mwamalihaka usoma, moopele mwaha ala makohwaala:

Niireke uhapaliya unanwaanela masakha ntthu nowuryooyo?
Isiyani inthoonyihera wiira ntthu oohapaliya cinene wanaakhitirya uhiya?

Nsome Matewus 5:30, ni mwamalihaka usoma, moopele mwaha nna nikohonna:

Nhina ntakihero naapankilyaawe Yesu ninooluma uthikila moono, uyo aapheela uhimya wiira nihaana niikurumicaka venci cinene wiira nintteelihe nrima Yehova. Isiyani inlamuliyeenyu upanka wakhala wiira nneera mwiikurumicaka wiira nhiye uhapaliya? a—Moone niwehero.

Nsome 1 Akorintu 15:33, ni mwamalihaka usoma, moopele mwaha nna nikohonna:

Wakhala wiira nyuuva nhaana asimpwaniinyu anhapaliya cinene, isiyani inhala uwiirannyeelani?

NTTHU AKOHAKA: “Uwurya ikhanle itthu yootakhala?”

Nyuuva mwaahala waakhula cani?

UTHIKILELA

Mapha anaapanka mphantte wotthuvo cinci cinivahilyaawe Yehova. Masi uyo nawaateeliha uwurya venci ni uhapaliya.

Wuupuwela

Isiyani Ibiiblya inoolumaaya nhina mapha?
Masakhani anomphwanya ntthu nohapaliya ni nowurya cinene?
Manannani cinlamuliyeenyu uhisima ile ilakenlyaaya akhunaninyu?

Kimalihile usoma ula mpanttoola nihuku:

Itthu yoohala upanka

Mwalakelaka uwurya mpace wuupuwela citthu cinhala wuukaviherani woona wiira pooti wanwuryeenyu awula mena, ni mwiihelele mpika.

Itthu ikhwaawe:

Itthu ikhwaawe

MWAPHEELAKA UCUWELA CITTHU CIKIINA

Manannani amirawo cinlamuliyaaya ulakela itthu yomaana nhina uwurya mapha?

Wuupuweleke itthu inrwaa ukhumelela uhinatthi uwurya (2:31)

Moone isiyani inlamuliyeenyu upanka wakhalaka wiira khannokhitiri wiivaraca nhina mananna cinwuryeenyu.

“Nhihoolelihere uwurya mapha muukumini winyu” (Ukhalenla, 1 yo Janeiro yo 2010)

Niireke nkristau pooti wanaattakanihaawe ikoophu ukati woowurya iviinyu?

“Makoho Aanamasoma” (Ukhalenla, 15 yo Fevereiro yo 2007)

Nsome ihantisi irina muru uneera “Mi kaari ‘nttooka noothaala’” wiira moone mananna nlopwana mmoca cihiilyaawe uwurya venci.

“Ibiiblya inaarukunusa makhalelo aatthu” (Ukhalenla, 1 yo Maio yo 2012)

a Niwehero: Ale ammananiha uhiya uwurya mapha masi ahinkhitiri, atthunaka ahaana akaviheriyaka nimameetiku. Ukhala wiira mameetiku enci aneera wiira ale ahinkhitiri wiivaraca mananna cinwuryaaya mapha, atthunaka ahaana uhiya uwurya wenenwo.

MPHWANYE UTTEELIYA!—MWIITTHUCE IBIIBLYA