Уло тӱня мучко еҥ-влак алкогольым йӱмӧ нерген тӱрлӧ семын шонат. Иктышт, йолташ-влак дене пырля погынен, алкогольым йӱаш тореш огытыл. Весышт йӧршеш йӱаш огыл шонен пыштеныт. Южышт утымешке йӱыт. А Библийыште алкоголь нерген мом возымо?

1. Библий алкоголь йӱмым чара мо?

Библий алкогольым йӱаш огеш чаре. Мӧҥгешла, Библийыште йошкар арака Юмо деч еҥ-влаклан пуымо пӧлек семын палемдалтын. Тушто возымо: «Йошкар арака еҥын шӱмжым йывыртыкта» (Псалом 103:14, 15). Юмылан ӱшанле южо пӧръеҥ ден ӱдырамаш-влакат, кудышт нерген Библийыште возымо, алкогольым йӱыныт (1 Тимофейлан 5:23).

2. Библий алкоголь шотышто мо деч шекландара?

Иеговалан алкогольым утыждене йӱмаш ок келше (Галат-влаклан 5:21, УТ). Тудын Мутыштыжо возымо: «Шуко йошкар аракам йӱшӧ-влак... коклаште ит лий» (Притчи 23:20). Шкетын але иктаж-кӧ дене йӱаш шонен пыштенда гын, теве мом шотыш налза: шонымашда раш кодшаш, йылмыдам кучен моштышаш да ыштымашдам эскерен кертшаш улыда, тыгак мыняр йӱмыда тазалыклан эҥгекым кондышаш огыл. Тыланда мыняр йӱмым эскераш йӧсӧ гын, тунам алкогольым йӧршеш йӱаш огыл сайрак лиеш ыле.

3. Весе-влакын решенийыштым кузе пагалаш?

Кажне айдеме алкогольым йӱаш але уке решенийым шке лукшаш. Иктаж-кӧ алкогольым йӱаш тореш огыл гын, тыгай айдеме нерген удан шонышаш огынал. А иктажше йӱаш огыл шонен пыштен гын, ме тудым темдышаш огынал (Римлян-влаклан 14:10). Йӱмашна весе-влаклан проблемым конда манын шонена гын, лучо йӧршеш йӱаш огыл. (Римлян-влаклан 14:21 лудын лекса.) Ме шкаланна огыл, а весе-влаклан пайдам кычалшаш улына. (1 Коринфян-влаклан 10:23, 24 лудын лекса.)

 КЕЛГЫНРАК ШЫМЛЕН НАЛЗА

4. Йӱаш але уке решенийым лукса

Алкогольым йӱмаш нерген Иисус мом шонен? Тидым пален налашлан айста тудын икымше чудыжым шарналтена. Иоаннын 2:1—11 лудын лекса да вашмутым пуыза:

• Тиде каласкалымаш дене келшышын, алкоголь да тудым йӱшӧ-влак нерген Иисус мом шонен?

• Иисус алкогольым йӱмылан тореш лийын огыл гын, тугеже, алкогольым йӱшӧ христиан-влак нерген могай шонымашна лийшаш?

Христиан-влаклан алкогольым йӱаш лиеш гынат, улыт тыгай ситуаций-влак, кунам тидым ышташ огеш кӱл. Притчи 22:3 лудын лекса да шоналтыза, кузе нине фактор-влак алкогольым йӱаш але уке решенийым лукташ полшен кертыт:

• те машинам вӱдаш але вес технике дене пашам ышташ шонеда;

• те мӱшкыран улыда;

• врач тыланда алкогольым йӱаш огыл каласен;

• тыланда мыняр йӱмым эскераш йӧсӧ;

• закон дене келшышын, алкогольым йӱаш ок лий;

• те тыгай айдеме дене жапым эртареда, кудыжо аракам ом йӱ манын ойла, вет ожно тудын йӱмаш шотышто проблеме лийын.

Сӱаныште але йолташ-влак дене пырля погынымо годым алкоголь лийшаш але уке? Решенийым лукташ тиде видеоролик полшен кертеш. ВИДЕОРОЛИКЫМ ончалза.

Римлян-влаклан 13:13 да 1 Коринфян-влаклан 10:31, 32 лудын лекса. Кажне ужашым лудын лекме деч вара вашмутым пуыза:

• Кузе тиде принцип тыланда Иеговалан келшыше решенийым лукташ полша?

 5. Шкаланда йӱмӧ нормым палемдыза

Иегова алкоголь йӱмым ок чаре гынат, тудо утыждене йӱмым чара. Молан? Осия 4:11, 18 лудын лекса да вашмутым пуыза:

• Айдеме утыждене йӱын гын, мо лийын кертеш?

Кузе утыжым йӱаш огыл? Айдеме йӱмӧ нормыжым палышаш. Притчи 11:2 лудын лекса да вашмутым пуыза:

• Молан шкаланна йӱмӧ нормым палемдыман?

6. Алкогольым утыждене йӱаш привычкым кузе сеҥаш?

 ТӰҤ ШОНЫМАШ

Иегова еҥ-влаклан алкогольым куанашлан пуэн. Но алкогольым утыждене йӱмаш тудлан огеш келше.

Ушештарымаш

• Библийыште алкоголь нерген мом возымо?

• Алкогольым утыждене йӱмаш мо дене лӱдыкшӧ?

• Алкоголь шотышто весе-влакын решенийыштым кузе пагалаш?