Mu mavu ose vantu ve ku mona vuala mu vifua via ku liseza-seza. Vamo va lema ku makelako tumo nga vali na vavusamba, vakuavo co ka ve ku nua. Kaha kuli vamo ve ku nua noho va na pende. Vika ya handeka Mbimbiliya ku tuala ha vuala?

1. Vuno ku nua vuala ca pua vupi ni?

Mbimbiliya ka ya vindikile ku nua. Vunoni omo ya tandanga vuana vua ku liseza-seza vua tu hana Njambi, ya vuezako nguayo: “Na viniu via ku zolesa mutima ua muntu.” (Visamo 104:14, 15) Vamo vampuevo na vamala vakua lutsilielo, va va tumbula mu Mbimbiliya navo va nuine vuala.—1 Timoteo 5:23.

2. Vimamuna vika vi ya hana Mbimbiliya kuli vaze ve ku hangula ku nua vuala?

Yehova ua vindika ku nua mua kama na ku penda. (Ngalata 5:21) Lizi lieni ngualio: “Kati u kale ha kati ka vaka ku nua viniu via vingi.” (Visimo 23:20) Ngeci mukemuo, nga tu hangula ku nua, cipue vene kua lika lietu ka tua pandele ku hianesamo mu cifua ca ku linga, ka tu hasa ku singanieka, ku handeka, ni ku linga viuma via ku-sua. Ni vene ku nua mu cifua ci pihisa cihindu cetu. Ku tsiha mpanga, nga ka tue ku hasa ku nua mu ku puisamo, tua pande ku likela mu vutuntu.

3. Vati tu hasa ku singimika vihangula via vakuetu ku tuala ha ku nua?

Muntu ku muntu na pande ku lihanguila nga a nua vuala ni kuahi. Ka tua pandele ku paya uze ue ku nua mu ku puisamo, ni ku sindiya muntu ke ku nua a putuke ku lingamo. (Loma 14:10) Ci pua ca cili ku viana ku nua nga ku lingamo ci hasa ku kokela vakuetu visoti. (Tandenu Loma 14:21.) Tua pande ku lengeya ‘[kati ku vezika cetu vavene] vunoni ca mukuetu.’—Tandenu 1 Kolintu 10:23, 24.

 TANTEKEYENU VIKUAVO

4. Ku hangula nga mu pua na ku nua ni kuahi

Vati Yesu ua kele na ku muenamo vuala? Linga mu tantekeye cikumbululo, hilulenu cikomoueso ca katete ca lingile. Tandenu Yoano 2:1-11, kaha simutuilenu ha vihula evi:

• Kuliya neci cikomoueso, vika tua lilongesa ku tuala ha cifua ce ku muenamo Yesu vuala na vaze ve ku vu nua?

• Mu ku linga Yesu ka vindikile ku nua vuala, vati Mukua Kilistu na pande ku muenamo vaze ve ku hangula ku nua?

Vunoni ku zituka mu ku nua, ka ca lombolokele ngecize Mukua Kilistu na pande ku nua ha ntsimbu yose-oyo ya tonda, houe. Tandenu Visimo 22:3, kaha simutuilenu vati viuma vi na hatako vi hasa ku mi kuasa ku hangula nga citava mu nue ni kuahi:

• Nga mu endesa limo liendelo ni mu pangesa limo likina.

• Nga muli na mivila ivali.

• Nga vandotolo va na mi mamuna nguavo kati mu nue.

• Nga ka mue ku hasa ku nua mu ku puisamo.

• Nga masiko a cifuti a mi vindika ku nua.

• Nga muli na umo ali na citanga ca ku likela ku nua.

Vuno citava ku cilika cenu ca vulo ku ka kale vuala ni? Tantekeyenu vika vi hasa ku mi kuasa ku linga cihangula caco, talenu VIDEO.

Tandenu Loma 13:13 na 1 Kolintu 10:31, 32. Kaha mu nima ya ku tanda nkala mukanda simutuilenu ha cihula eci:

• Vati ku pangesa eci citume ci hasa ku mi kuasa ku hangula kuya Yehova ku mutima?

 5. Ku hangula seteko ya vuala

Nga mu hangula ku nua vuala, vulukenu evi: Vutuhu Yehova ka vindikile ku nua vuala vunoni ua vindika ku penda. Omo li vika? Tandenu Hoziya 4:11, 18, kaha simutuilenu ha cihula eci:

• Vika vi hasa ku soloka nga muntu a nua mua kama?

Vati tu hasa ku liniunga ku ku nua mua kama? Tua pande ku tantekeya ha lengela vuhasi vuetu. Tandenu Visimo 11:2, kaha simutuilenu ha cihula eci:

• Vika ca puila ca cili ku hangula mpundu seteko ingahi tu pua na ku nua?

6. Vulenu citanga ca ku nua mua kama

 VI MU NA LILONGESA

Vutuhu Yehova ua tavesa ku nua vuala, vunoni ua vindika ku nua mua kama na ku penda.

Mpupulule

• Vika ya handeka Mbimbiliya ku tuala ha vuala?

• Vusonde vuka vua kala ha ku nua mua kama?

• Vati tu hasa ku singimika vi hangula via vakuetu ku tuala ha vuala?