Maseualmej amo sanse kiitaj tlaili. Sekij kiijij se kentsi kema itstokej ininuaya ininuampoyouaj. Sekij amo kiijij yon se kentsi. Uan sekij tlauel moiuintiaj. ¿Tlake kiijtoua Biblia tlen nopa tlaili?

1. ¿Amo kenijki tlaj tikijisej tlaili?

Biblia amo kiijtoua tlaj amo uelis tikijisej tlaili. Nopaya kiijtoua tlaili kichiua ma yolpakikaj maseualmej, uan nopa eli se tlamantli tlen toTeotsij techmakatok (Salmo 104:14, 15). Nojkia, Biblia kiijtoua uejkajkia itstoyaj se keskij toTeotsij itekipanojkauaj katli nojkia kiijiyayaj se kentsi tlaili (1 Timoteo 5:23).

2. ¿Tlake kiijtoua Biblia kema se akajya kineki kiijis tlaili?

Jehová amo kipaktia kema se akajya moiuintia, uan nojkia kema kiiji miak tlaili (Gálatas 5:21). Biblia kiijtoua: “Amo ximosansejkotili ininuaya tlen kiijij miak xokomekaatl” (Proverbios 23:20). Uajka, tlaj tijnekisej tikijisej tlaili kema tiitstosej toselti o ininuaya sekinok, moneki amo tikijisej miak pampa nopa ueliskia kichiuas san tlemach ma tijchiuakaj, ma tikijtokaj tlen amo kinamiki uan ayokmo kuali timoiljuisej tlen tijchiuasej. Nojkia, tlaj tikijisej miak, uelis kichiuas ma timokokokaj. Tlaj tijmatij ouij tikijisej san se kentsi tlaili, uajka moneki amo tikijisej yon se kentsi.

3. ¿Kenijkatsa uelis tijnextisej tijtlepanitaj tlen sekinok kitlapejpeniaj?

Sejse tlen tojuantij moneki kitlapejpenis tlaj kiijis tlaili o amo. Tlaj se akajya kineki kiijis se kentsi, amo kinamiki timoiljuisej kichijtok se tlamantli tlen amo kuali. Nojkia, amo kinamiki tijchiualtisej se akajya ma kiiji tlaj amo kineki kiijis (Romanos 14:10). Uan nojkia amo tikijij tlaili tlaj sekinok amo kuali kiitaj (xijpoua Romanos 14:21). Biblia kiijtoua: “Axaka ma kitemo tlen kuali para ya iselti, pero ma tijchiuakaj tlen kinpaleuis sekinok” (xijpoua 1 Corintios 10:23, 24).

 KUALI XIMOMACHTI

4. Kuali ximoiljui tlaj tikijis tlaili

¿Kiijtok Jesús amo kuali tlaj tikijisej tlaili? Tlaj tijneki tijmatis, ma tikitakaj nopa achtoui ueyi tlamantli tlen Jesús kichijki. Xijpouakaj Juan 2:1-11 uan xijnankilikaj ni tlajtlanili:

• ¿Kenijkatsa ni tlapoualistli techpaleuia ma tijmatikaj kenijkatsa kiitayaya Jesús tlaili uan katli kiijiyayaj?

• Jesús amo kiijtok amo kuali tlaj tikijisej tlaili. Yeka, ¿kenijkatsa kinamiki tikinitasej katli kiijij tlaili?

Maske se Cristo itokilijka kena uelis kiijis se kentsi tlaili, nopa amo kiijtosneki uelis nochipa kiijis. Xijpouakaj Proverbios 22:3 uan xikitakaj tlaj ipan ni tlamantli uelis inkiijisej tlaili:

• Tijnemiltia se carro o titekiti ika se tepostli tlen mauilili.

• Titlanemiltia.

• Tepajtijketl mitsiljuia amo xikiji.

• Amo tijneki tikijis san se kentsi.

• Ipan moaltepe nopa tlanauatili kiijtoua ayamo uelis tikijis tlaili.

• Tiitstok iuaya se akajya katli amo kineki kiijis tlaili pampa achtouia tlauel tlaiyaya.

¿Uelis titemakas tlaili kema timosenkauas o ipan seyok iljuitl? Tlaj tijneki tijmatis tlake uelis tijchiuas, xikitakaj nopa VIDEO.

Xijpouakaj Romanos 13:13 uan 1 Corintios 10:31, 32. Kema inkipojtiasej sejse texto, xijnankilikaj ni tlajtlanili:

• ¿Kenijkatsa ni textos uelis mitspaleuis kuali xijtlapejpeni tlen tijchiuas uan kiampa tijyolpakiltis Jehová?

 5. Kuali ximoiljui keski imiaka tikijis

Tlaj tijneki tikijis tlaili, xikilnamiki maske Jehová amo kenijki kiita tlaj tikiji se kentsi, kena amo kuali kiitas tlaj tikijis miak. ¿Kenke amo kuali kiitas? Xijpouakaj Oseas 4:11, 18 uan xijnankilikaj ni tlajtlanili:

• ¿Tlake ueliskia panos tlaj se akajya kiiji miak tlaili?

¿Tlake techpaleuis amo ma tikijikaj miak tlaili? Moneki kuali timoixmatisej uan kiampa tikitasej tlaj techpaktia tikijisej miak tlaili o san se kentsi. Xijpouakaj Proverbios 11:2 uan xijnankilikaj ni tlajtlanili:

• ¿Kenke tlauel mitspaleuis tlaj ya tijmajtos keski imiaka tlaili tikijis?

6. ¿Tlake mitspaleuis ayokmo timoiuintis?

 TLEN TIMOMACHTIJKEJ

Maske Jehová techmakatok tlaili uan amo kenijki kiita tlaj tikijij, ya amo kuali kiita kema se akajya tlauel moiuintia o kiiji miak.

¿Tlake tijyekok?

• ¿Kenijkatsa kiijtoua Biblia moneki ma tikitakaj tlaili?

• ¿Tlake uelis kinpanos katli kiijij miak tlaili?

• ¿Kenijkatsa uelis tijnextisej tikintlepanitaj katli kiijij se kentsi tlaili uan katli amo kinekij kiijisej?