Sekimej mokuayejyekouaj uelis koniskej alcohol pero oksekimej amo. Sekimej ualeua konij alcohol ijkuak katej inmiuan akinmej mouikaj. Oksekimej amo konij itlaj tlen kipia alcohol pero oksekimej tlauanaj. Tlen kijtoua Biblia, ¿uelis tikoniskej alcohol?

1. ¿Tlajtlakoli tikoniskej alcohol?

Biblia amo ijkon kijtoua. Ijkuak Biblia techiluia nochi tlen Jehová otechmakak noijki kijtoua Jehová techmaka vino tlen kichiua matiyolpakikan (Salmo 104:​14, 15). Biblia kijtoua sekimej tlen okitekichiuiliayaj Jehová noijki okoniayaj tepitsin alcohol (1 Timoteo 5:​23).

2. ¿Tlen kijtoua Biblia uan moneki makilnamiktokan akinmej konij alcohol?

Jehová amo kipaktia matitlauanakan nion matikonikan miak alcohol (Gálatas 5:​21). Biblia kijtoua: “Amo ximouika iuan akinmej sapanoua konij vino” (Proverbios 23:​20). Ikinon tla tiknekij tikoniskej alcohol ijkuak tikatej iuan oksekimej noso toselti, amo miak matikonikan hasta ayakmo tikmatiskej tlen tikijtoskej. Noijki timomaluiaj uan amo tikonij miak alcohol para amo timokokoskej. Tla ijkuak tikonij tepitsin alcohol tiknekij okachi tikoniskej, okachi kuali amitlaj matikonikan.

3. ¿Ken tikteititiaj tiktlakaitaj tlen oksekimej kichiuaj?

Tisejse moneki tikpejpenaskej kox tikoniskej alcohol. Amo matikteneuakan tla ikaj kineki konis amo miak alcohol uan tla ikaj yokijto amo konis alcohol, amo matikchiualtikan makoni (Romanos 14:​10). Noijki ijkuak tikitaj ikaj amo kuali momachilia ijkuak oksekimej konij alcohol, okachi kuali amo matikonikan (xiktlajtolti Romanos 14:​21). Biblia kijtoua ‘matikchiuakan tlen kinpaleuis oksekimej uan amo san tlen tejuan techpaleuis (xiktlajtolti 1 Corintios 10:​23, 24).

 MATIMOMACHTIKAN

4. Xikpejpena kox tikonis alcohol noso amo

¿Ken okitaya Jesús ijkuak ikaj okoniaya alcohol? Techpaleuis tikmatiskej tla tiktlajtoltiaj achto milagro tlen okichi. Xiktlajtoltikan Juan 2:​1-​11 uan satepan xikitakan tlen namechmachtia.

• Ijkon ken otiktlajtoltijkej, ¿ken kita Jesús ijkuak ikaj koni alcohol?

• Jesús amo okitaya tlajtlakoli ijkuak ikaj okoniaya alcohol, ikinon ¿ken moneki mokuayejyekos se tokni tla kita ikaj koni alcohol?

Maski ikaj uelis konis tepitsin alcohol, amo kijtosneki uelis nochipa ijkon kichiuas. Xiktlajtoltikan Proverbios 22:3 uan satepan xikitakan kox ikaj uelis konis alcohol tla:

• Kiuika se carro noso tekipanos.

• Kipias ikonetsin.

• Tepajti okilui amo makoni alcohol.

• Kineki konis miak alcohol.

• Tekiuajkej amo kitekauiliaj makonikan alcohol.

• Kajki iuan akin amo koni alcohol porque achto otlauanaya.

Tla ikaj iluichiuas, ¿uelis kitemakas alcohol? Para tikmatis tlen tikchiuas, xikitakan VIDEO.

Xiktlajtoltikan Romanos 13:​13 uan 1 Corintios 10:​31, 32 uan satepan xikitakan tlen namechmachtia.

• Ijkon ken kijtouaj ninmej textos, ¿tlen moneki tikchiuas para tikyolpaktis Jehová?

 5. Xikilnamikto uelis tikonis alcohol pero amo miak

Xikilnamikto Jehová amo kita tlajtlakoli tla tikonis tepitsin alcohol pero amo kipaktia matitlauanakan. ¿Tleka ijkon tikijtouaj? Xiktlajtoltikan Oseas 4:​11, 18 uan satepan xikitakan tlen namechmachtia.

• ¿Tlen uelis kipanos akin tlauana?

¿Tlen techpaleuis amo matikonikan miak alcohol? Matikilnamiktokan, moneki timomaluiskej. Xiktlajtoltikan Proverbios 11:2 uan satepan xikitakan tlen namechmachtia.

• ¿Tleka moneki tikilnamiktos uelis tikonis alcohol pero amo miak?

6. Uelis ayakmo titlauanas

 XIKILNAMIKTO

Alcohol techtliokolia Jehová, pero ye amo kipaktia matitlauanakan nion matikonikan miak alcohol.

Matikojpauikan

• ¿Kijtoua Biblia tlajtlakoli matikonikan alcohol?

• ¿Tlen techpanos tla titlauanaskej?

• ¿Ken tikteititiaj tikintlakaitaj akinmej kijtouaj kox koniskej alcohol noso amo?