Ta azi zu ndo du na dangɔ bɛ lɛni kɔi na ndo nyɔngɔ samba ma. Ngoi mɛndɛ̃ ambanga azi ndo ye nyɔngɔ samba ndoni kɔi na akwa la. Ta azi mɛndɛ̃ ndo nyɔ tɛ la samba ma. Ambanga ndo nyɔ tɛ la tee agbɔ̃ la. Kanda tɛnɛ mɛ Ngbangɔ tɛnɛ na ndo nyɔngɔ samba nɛ?

1. Nyɔngɔ samba du siɔni?

Ta Ngbangɔ gbanzi nyɔngɔ samba ma. Na popo ti nzɔ̃ ye zu mɛ Nzapa hɛ̃ e ko, Ngbangɔ tɛnɛ ya “samba ndo hɛ̃ zo dengɔ bɛ.” (Nzembo 104:14, 15) Adi tɛnɛ nga ya ambanga awakwa tɛ Nzapa ti mbilimbili ndo nyɔ ngandó samba.​—1 Timɔte 5:23.

2. Wangɔ mɛ Ngbangɔ hɛ̃ azi ko la ye nyɔngɔ samba nɛ?

Yehova kɛ̃ nyɔngɔ samba ɔngɔ nyɔ kpɔ̃ ni nga na nyɔngɔ samba gbɔ̃ngɔ zo. (Galatia 5:21) Ngbangɔ tɛnɛ ya: “Ta mɔ du na popo tɛ azi mɛ ndo nyɔ samba ɔ nyɔ kpɔ̃ ni ma.” (Masese 23:20) Abɛse du ngoi mɛ mɔ ndo nyɔ samba mɔ kɔi ko, li kpengbani ti nɛngɔ ya ta ni gbɛ̃ bingangɔ li tɛ mɔ, se tɛ mɔ ti tɛnɛngɔ na tɛnɛ, kwa tɛ mɔ, bere sãte tɛ mɔ ma. Se ati kpengbani ti nɛngɔ ya mɔ hĩnga ndo mɛ ngunu tɛ mɔ ti nyɔngɔ samba ndo suka na ni ko, kɛ̃ nyɔngɔ ni.

3. Ngasia la elengbi ti tɔndɔngɔ ekateli tɛ azi mɛndɛ̃ na ndo samba nɛ?

Nyɔngɔ samba bere kɛ̃ngɔ nyɔngɔ ni adu ekateli mɛ ba zo na zo. Ni la se zo pɔna nyɔngɔ samba zangangɔ ɔngɔ nyɔ kpɔ̃ ni ko, ayɔ ya e tɔndɔ ekateli tɛ lo, se zo mu ekateli ti kɛ̃ngɔ nyɔngɔ samba ko, ta elengbi ti tongɔ lo na ndo ngunu ya lo nyɔ ma. (Roma 14:10) Elengbi ti kɛ̃ngɔ nyɔngɔ samba se du ya azi mɛndɛ̃ ndo hũ ni siɔni. (Di Roma 14:21.) Ale “ta zo kɔi agi ya, ni li ye mɛ nzɔ̃ni bo na lo tɛ ni nvɛni ma, kanda ale lo gi ya, ni li ye mɛ nzɔ̃ni na lo tɛ afɔ̃ ni.”​—Di 1 Kɔrinto 10:23, 24.

 GI HĨNGANGƆ LO MƐNDƐ̃

4. Ba bere mɔ lengbi ti nyɔngɔ samba bere ta mɔ nyɔ ni ma

Yezo ndo bandó nyɔngɔ samba ngasia? Ti nɛngɔ ya e lua gbinya ni, zia e ba kpɛ̃nɛ ti kɔzoni mɛndó lo li. Di Yoanɛ 2:1-11, wa na pɛni hɛ̃ gbinya ti ahũnda olo mɛ:

• Na lége ti kpɛ̃nɛ mɛ, ye mɛ e manda na se mɛndó Yezo ndo ba na nyɔngɔ samba nga na azi mɛ ndo nyɔ ni nɛ?

• Na lo mɛ ya ta Yezo gbanzi nyɔngɔ samba ma, ngasia la wakristo lengbi ti bangɔ zo mɛ pɔna tɛ lo nyɔngɔ samba nɛ?

Abɛse du ya ta Ngbangɔ gbanzi nyɔngɔ samba ma ko, ta du ye ti ndara nyɔngɔ ni ngoi zu ma. Di Masese 22:3, wa na pɛni ba bere mɔ lengbi ti nyɔngɔ samba na ngoi mɛ:

• Mɔ ndo kpɛ na kamiɔ̃ bere mɔ ndo li kwa na masini kɔi.

• Mɔ na ngɔ.

• Monganga gbanzi mɔ na nyɔngɔ samba.

• Ta mɔ ndo hĩnga ndo mɛ ngunu tɛ mɔ ti nyɔngɔ samba suka na ni ma.

• Ndia ti kɔdɔrɔ mɛ mɔ ka da gbanzi nyɔngɔ samba.

• Mɔ ndoni kɔi na zo mɛ kɛ̃ nyɔngɔ samba na lo mɛ ya ta lo ndo hĩnga ndo mɛ ngunu tɛ lo ti nyɔngɔ samba suka na ni ma.

Mɔ lengbi ti hɛ̃ngɔ azi samba ka fɛtɛ ti libala bere fɛtɛ mɛndɛ̃? Ti nɛngɔ ya mɔ hĩnga ye mɛ lengbi ti zangɔ mɔ ya mɔ mu ekateli ko, ba VIDEO.

Di Roma 13:13 nga na 1 Kɔrinto 10:31, 32. Na pɛ dingɔ vɛrsɛ kɔi kɔi hɛ̃ gbinya ti hũnda olo mɛ:

• Ngasia la vɛrsɛ mɛ lengbi ti zangɔ mɔ ya mɔ mu ekateli mɛ lengbi ti hɛ̃ngɔ Yehova dengɔ bɛ nɛ?

 5. Hĩnga ndo mɛ ngunu tɛ mɔ ti nyɔngɔ samba suka na ni

Se mɔ pɔna nyɔngɔ samba ko, ta bɛ mɔ li na ni ma ya bɛ Yehova ndo kɛ̃ nyɔngɔ samba ɔngɔ nyɔ kpɔ ni. Na lo nɛ? Di Hosea 4:11, 18, wa na pɛni hɛ̃ gbinya ti hũnda olo mɛ:

• Ye mɛ lengbi ti singɔ na zo mɛ ndo hɛ̃ tɛrɛ lo gba na nyɔngɔ samba nɛ?

Ngasia la elengbi ti kɛ̃ngɔ hɛ̃ngɔ tɛrɛ e gba na nyɔngɔ samba nɛ? Ayɔ ya e hĩnga ndo mɛ ngunu tɛ e ti nyɔngɔ samba ndo suka na ni. Di Masese 11:2, wa na pɛni hɛ̃ gbinya ti hũnda olo mɛ:

• Nda mɛ du nzɔ̃ni ya mɔ hĩnga ndo mɛ ngunu tɛ mɔ ti nyɔngɔ samba suka na ni nɛ?

6. Ye mɛ lengbi ti zangɔ zo ya ta lo nyɔ samba ɔ ndo lo ma

 NA NDUNU NI

Yehova hɛ̃ e samba ti nɛngɔ ya a hɛ̃ e dengɔ bɛ, kanda lo kɛ̃ nyɔngɔ samba gba nga na nyɔngɔ samba ɔngɔ nyɔ kpɔ̃ ni.

Bozongeli

• Tɛnɛ mɛ Ngbangɔ tɛnɛ na ndo samba nɛ?

• Siɔ lo mɛ nyɔngɔ samba gba ndo si na ni nɛ?

• Ngasia la elengbi ti tɔndɔngɔ ekateli mɛ azi mɛndɛ̃ mu na ndo samba nɛ?