MSOLO 43
Ko Akhrisitu achadekana kuwuwona tani mowa?
Padziko yose yapasi, wanthu anamaganizo yosiyanasiyana pankhani ya mowa. Anango achakondwa maninge kukhala pabodzi na azishamwali nkumbamwa. Pomwe anango achasalula kusamwa olo pang’ono. Anango achamwa mpakana kuledzera. Ko Baibolo ichalewa tani pankhani ya mowa?
1. Ko nkuphonya kumwa mowa?
Baibolo ichalambizalini kumwa mowa. M’malo mwake ichafotokoza madaliso yazinji yomwe Mulungu adatipasa, Baibolo ichafotokoza va ‘vinyu omwe uchakondweresa mtima wa munthu.’ (Salimo 104:14, 15) Amuna na akazi anango omwe achagumiwa m’Baibolo ambamwa mowa.—1 Timoteyo 5:23.
2. Ko ni malangizo yaponi yomwe Baibolo ichapereka kwa wale omwe achasalula kumwa mowa?
Baibolo ichalambiza kumwa mwauchidakwa. (Agalatiya 5:21) Mawu yake yachalewa kuti: ‘Ayi kukhala pakati pa wale omwe achamwa maninge vinyu.’ (Miyambo 23:20) Ndipomwapa peno tasalula kuti timbamwe olo patekha, tichadekanalini kumwa maninge mpakana kufika pakukangira kuganiza bwinobwino, kukanga kudziwa vomwe tinkuyankhula panango vomwe tinkuchita. Tikaleka kusamala tikambamwa, tingafike pakukhala chidakwa.
3. Ko tingalemekeze tani vosalula va anango omwe achasalula kuti ambamwe mowa?
Munthu aliyese achadekana kusalula yekha peno achada panango neye kumwa mowa. Tichadekanalini kuweruza munthu yemwe wasalula kumwa mowa koma mwachikatikati. Ndipo tichadekanalini kulimbikisa munthu munango kuti ambamwe pomwe iye achadalini kuti ambamwe. (Aroma 14:10) Tichasalula kusamwa tikaona kuti tikamwa tichabweresa mabvuto kwa anango. (Lewengani Aroma 14:21.) Tichafagafaga ‘osati kudzikondweresa tekha, koma tichachita vinthu vomwe vingakondweresembo anango.’ —Lewengani 1 Akorinto 10:23, 24.
PFUNZIRANI VIZINJI
Onani mpfundo za m’Baibolo zomwe zingakuthandizeni kusaina kumwa na momwe mungamwere peno muchamwa. Ndipo dziwani pomwe vomwe mungachite peno muchashupika mukamwa mowa.
4. Onani peno mungadzamwe
Ko Yesu angamuwona tani mowa? Kuti tidziwe mdawiro wake onani chodabwisa choyamba chomwe iye adachita. Lewengani Yohane 2:1-11, ndipo patsogolo pake kambiranani mibvunzo aya:
-
Kuchokera pa chodabwisa chimwechi, ko tingapfunzire chani pa nkhani ya momwe Yesu angauwonera mowa na wale omwe angamwa?
-
Pakuti Yesu alibe kulambiza kumwa mowa, ko Mkhrisitu achadekana kumuwona tani munthu yemwe wasalula kuti ambamwe?
Olo kuti Mkhrisitu aliyese anaufulu pankhani ya mowa, mwevi vinkuthandauzalini kuti nthawe zose ni vanzeru kwa iye kuti ambamwe. Lewengani Miyambo 22:3, patsogolo pake kambiranani mpfundo izi zomwe zingakuthandizeni kuwona peno mungadzamwe:
-
Mukakhala kuti munkufambisa mashini.
-
Mukakhala namimba.
-
Peno amediko adakuwuzani kuti ayi kudzamwa pomwe mowa.
-
Imwepo muchashupika kudziwa malire yanu yakumwa mowa.
-
Malamulo yakwanu yachakubvumizanilini imwepo kumwa mowa.
-
Imwepo munamunthu munango yemwe kalekale angashupika maninge na momwa ndawa yakuti angakangira kudziwa malire yake yomwera mowa.
Ko imwepo mungapereke mowa kwa wanthu ninge paukwati panango pakugumana kulikose? Onani chomwe chingakuthandizeni kudziwa chochita, wonesani VIDIYO.
Lewengani Aroma 13:13 na 1 Akorinto 10:31, 32. Mukamaliza kulewenga lemba iliyose, kambiranani mbvunzo uyu:
-
Ko kuphatisira basa mpfundo mwezi kungakuthandizeni tani imwepo kusalula vinthu vomwe vingakondwerese Yahova?
Mkhrisitu aliyese achadekana kusalula yekha peno angamwe mowa panango neye. Olo kuti iye angasalule kuti ambamwe nthawe zinango, pana nthawe zinango zomwe iye angamwelini mowa
5. Dziwani kuwanda kwa mowa omwe mungamwe
Peno imwepo mwasalula kuti mumbamwe mowa kumbukirani ivi: Olo kuti Yahova achalambizalini kumwa mowa, koma iye achalambiza kumwa mwauchidakwa. Ndawa chani? Lewengani Hoseya 4:11, 18, patsogolo pake kambiranani mbvunzo uyu:
-
Nchani chomwe chingachitike munthu akamwa maninge mowa?
Ko ni chani chomwe chingatithandize kuti tipewe kumwa maninge mowa? Tichadekana kukhala wodzichepesa na kuzindikira malire yathu. Lewengani Miyambo 11:2, patsogolo pake kambiranani mbvunzo uyu:
-
Ndawa chani ni nzeru yabwino kukhala na malire yomwera mowa?
6. Mungakwanise kupirira bvuto yakumwa mowa mwauchidakwa
Onani chomwe chidathandiza mwamuna munango kuleka kumwa mowa mwauchidakwa. Wonesani VIDIYO, patsogolo pake kambiranani mibvunzo aya.
-
Mu vidiyo, ko Dmitry angachitatani akamwa mowa?
-
Ko iye adakwanisa kuleka kumwa panthawe mweyo?
-
Ko iye adakwanisatani kuleka chizolowezi chake chakumwa mowa mwauchidakwa?
Lewengani 1 Akorinto 6:10, 11, patsogolo pake kambiranani mibvunzo aya:
-
Ko kumwa maninge ni koipa tani?
-
Ni chani chomwe chinkuonesa kuti munthu yemwe adadjaira kumwa mwauchidakwa angakwanise kuchinja?
Lewengani Mateyu 5:30, patsogolo pake kambiranani mbvunzo uyu:
-
Chitsanzo chakudzigwata djanja chichawonesa kuti munthu achadekana kuchita khama maninge kuti akondwerese Yahova. Ko ni chani chomwe imwepo mungachite peno munkushupika kuti muleke kumwa mwauchidakwa? a
Lewengani 1 Akorinto 15:33, patsogolo pake kambiranani mbvunzo uyu:
-
Imwepo mukambamwa maninge mowa ko mwevi vingakhudzetani azishamwali wanu?
WANTHU ANANGO ACHATI: ‘Nkuphonya kumwa?’
-
Imwepo mungadawire tani?
CHIGWATO
Yahova adapereka mowa kuti timbakondwa nawo, koma iye achalambiza kumwa mwauchidakwa.
Kubwerezera
-
Ko Baibolo ichalewa chani pa nkhani ya mowa?
-
Ko ngozi ichakhala iponi tikambamwa mwauchidakwa?
-
Ko tingalemekeze tani vosaina va anango pa nkhani yakumwa?
KUTI MUDZIWE VIZINJI
Ko alumbwana angasalule tani bwino pankhani yakumwa mowa?
Njira zomwe mungatewedze kuti mulimbane nabvuto yakumwa mowa mwauchidakwa.
“Ikhani mowa pamalo yake” (Nsanja ya Olonda, ya 1 Janeiro, 2010)
Ko Mkhrisitu achadekana kumenyeserana makhapu?
‘Mibvunzo yochokera kwa olewenga’ (Nsanja ya Olonda ya 15 Fevereiro, 2007)
Onani momwe mwamuna munango adalekera kumwa mwauchidakwa. Mu nkhani yakuti “Nenze chidakwa.”
‘Babibolo ichachinja moyo’ (Nsanja ya Olonda ya 1 Maio, 2012)
a Wale omwe mowa udawangena m’magazi angafunike thandizo ya kushipitali kuti akwanise kuleka kumwa. Ndipo kazinjikazinji mamediko yachalewa kuti wale omwe anabvuto yakumwa mowa angachite bwino kulekeratu nakumwa.
