سبق نمبر 43
کیہہ بائبل چ شراب پین توں منع کیتا گیا اے؟
پوری دُنیا چ شراب بارے لوکاں دی سوچ فرق فرق اے۔ کجھ لوک کدی کدار اپنے دوستاں نال شراب پینا پسند کردے نیں۔ کجھ بالکل نئیں پیندے تے کجھ اینی زیادہ پیندے نیں کہ ٹن ہو جاندے نیں۔ پر بائبل چ شراب پین بارے کیہہ دَسیا گیا اے؟
1. کیہہ شراب پینا غلط اے؟
بائبل چ شراب پین توں منع نئیں کیتا گیا سگوں ایہدے چ دَسیا گیا اے کہ مے انسان دے دل نُوں خوش کردی اے۔ (زبور 104:14، 15) ایس توں پتہ چلدا اے کہ شراب وی اوہناں نعمتاں وچوں اِک اے جیہڑیاں خدا نے سانوں دِتیاں نیں۔ بائبل چ خدا دے کجھ ایہو جہے بندیاں دا ذکر کیتا گیا اے جنہاں نے شراب پیتی۔—1-تیمُتھیُس 5:23۔
2. بائبل چ شراب پین والیاں نُوں کیہہ نصیحت کیتی گئی اے؟
یہوواہ خدا اوہناں لوکاں نُوں بالکل پسند نئیں کردا جیہڑے حدوں ودھ شراب پیندے نیں یاں جنہاں نُوں شراب پین دی عادت پے گئی اے۔ (گلتیوں 5:21) بائبل چ دَسیا گیا اے کہ شرابیاں چ شامل نہ ہووو۔ (امثال 23:20) سو جے اَسی کلّے یاں دُوجیاں نال مِل کے پینے آں تے سانوں اینی زیادہ نئیں پینی چاہی دی کہ سانوں کوئی ہوش ای نہ رہوے تے سانوں پتہ ای نہ چلے کہ اَسی کیہہ کہہ رہے آں تے کیہہ کر رہے آں۔ نالے سانوں اینی وی نئیں پینی چاہی دی کہ ساڈی صحت خراب ہو جائے۔ جے سانوں شراب پیندے ویلے اپنا ہتھ روکنا مشکل لگدا اے تے فیر سانوں شراب چھڈ دینی چاہی دی اے۔
3. اَسی شراب پین بارے دُوجیاں دے فیصلے لئی عزت کیویں وکھا سکنے آں؟
شراب پینا یاں نہ پینا ہر بندے دا اپنا فیصلہ اے۔ جے کوئی بندہ حد چ رہ کے شراب پیندا اے تے سانوں اوہنوں گلاں نئیں سُنانیاں چاہی دِیاں تے نہ ای سانوں کسے نُوں شراب پین لئی مجبور کرنا چاہی دا اے۔ (رومیوں 14:10) جے ساڈے شراب پین دی وجہ توں دُوجیاں نُوں ٹھوکر لگدی اے تے فیر سانوں شراب توں دُور ای رہنا چاہی دا اے۔ (رومیوں 14:21 نُوں پڑھو۔) سانوں اپنے ای فائدے بارے نئیں سگوں دُوجیاں دے فائدے بارے وی سوچنا چاہی دا اے۔—1-کُرنتھیوں 10:23، 24 نُوں پڑھو۔
ہور سوچوچار لئی
بائبل دے کجھ ایہو جہے اصولاں تے غور کرو جنہاں دی مدد نال تُسی فیصلہ کر سکو گے کہ توانوں شراب پینی چاہی دی اے کہ نئیں تے جے تُسی پیو گے تے کِنّی پیو گے۔ نالے جے توانوں شراب پین دی عادت پے گئی اے تے فیر تُسی ایہنوں چھڈن لئی کیہہ کر سکدے او۔
4. فیصلہ کرو کہ تُسی شراب پیو گے یاں نئیں
شراب پین بارے یسوع دی سوچ کیہہ سی؟ ایہدا جواب جانن لئی یسوع دے پہلے معجزے تے غور کرو۔ یوحنا 2:1-11 نُوں پڑھو تے فیر ایہناں سوالاں تے گل بات کرو:
-
تواڈے خیال چ شراب تے شراب پین والیاں بارے یسوع دی سوچ کیہہ سی؟
-
جے یسوع نے شراب پین توں منع نئیں کیتا تے فیر سانوں شراب پین والیاں بارے کیہو جہی سوچ رکھنی چاہی دی اے؟
ایہہ سچ اے کہ مسیحیاں نُوں شراب پین توں منع نئیں کیتا گیا پر ایہدا ایہہ مطلب نئیں کہ اوہناں نُوں شراب توں کدی وی کوئی نقصان نئیں ہوئے گا۔ امثال 22:3 نُوں پڑھو تے فیر سوچو کہ کیہہ تھلے دِتیاں گئیاں صورتاں چ کسے بندے یاں عورت لئی شراب پینا صحی ہوئے گا . . .
-
اوہ گڈی یاں کوئی مشین چلان لگا اے۔
-
اوہ ماں بنن والی اے۔
-
اوہنوں ڈاکٹر نے شراب پین توں منع کیتا اے۔
-
اوہنوں حد چ رہ کے شراب پینا مشکل لگدا اے۔
-
اوہدے ملک چ شراب پینا منع اے۔
-
اوہ کسے ایہو جہے بندے نال اے جنہے بڑی مشکل نال شراب پین دی عادت نُوں چھڈیا اے۔
کیہہ توانوں شادی یاں ہور پارٹیاں چ پروہنیاں لئی شراب رکھنی چاہی دی اے؟ ویڈیو چلاؤ۔
رومیوں 13:13 تے 1-کُرنتھیوں 10:31، 32 نُوں پڑھو۔ فیر ہر ایت نُوں پڑھن دے بعد ایس سوال تے گل بات کرو:
-
ایتھے دِتے گئے اصول دے مطابق تُسی یہوواہ خدا نُوں خوش کرن والا فیصلہ کیویں کر سکدے او؟
شراب پینا یاں نہ پینا ہر مسیحی دا اپنا فیصلہ اے۔ جے اِک مسیحی کدی کدار پیندا اے تے شاید کجھ موقعیاں تے اوہ نہ پین دا فیصلہ کرے۔
5. فیصلہ کرو کہ جے تُسی شراب پیو گے تے کِنّی پیو گے
ایہہ گل یاد رکھو کہ یہوواہ نے شراب پین توں منع تے نئیں کیتا پر اوہ حدوں ودھ پین توں منع ضرور کردا اے۔ ایہدی کیہہ وجہ اے؟ ہوسیع 4:11، 18 نُوں پڑھو تے فیر ایس سوال تے گل بات کرو:
-
جے اِک بندہ بوہت زیادہ شراب پیندا اے تے کیہہ ہو سکدا اے؟
اَسی حدوں ودھ پین توں کیویں بچ سکنے آں؟ ایہدے لئی ضروری اے کہ سانوں اپنی حد دا پتہ ہووے۔ امثال 11:2 نُوں پڑھو تے فیر ایس سوالتے گل بات کرو:
-
سانوں شراب پین دی اِک حد کیوں ٹھہرانی چاہی دی اے؟
6. شراب پین دی عادت تے قابو پاؤ
ویکھو کہ شراب پین دے عادی اِک بندے نے اپنی ایس عادت تے قابو کیویں پایا۔ ویڈیو چلاؤ تے فیر ایہناں سوالاں تے گل بات کرو:
-
ویڈیو چ وکھائے گئے بندے دی زندگی تے شراب دا کیہہ اثر ہویا؟
-
کیہہ اوہنے فوراً ای شراب پینا چھڈ دِتا؟
-
اوہنے شراب پین دی عادت تے اخیر کیویں قابو پایا؟
1-کُرنتھیوں 6:10، 11 نُوں پڑھو تے فیر ایہناں سوالاں تے گل بات کرو:
-
حدوں ودھ شراب پینا ایناں سنگین معاملہ کیوں اے؟
-
کیس گل توں پتہ چلدا اے کہ شراب پین دے عادی لوک ایس عادت نُوں چھڈ سکدے نیں؟
متی 5:30 نُوں پڑھو تے فیر ایس سوال تے گل بات کرو:
-
اپنے ہتھ نُوں وڈھن دا مطلب اے کہ اَسی اوہ قربانیاں دین لئی تیار رہیے جنہاں توں یہوواہ خوش ہوندا اے۔ سو جے توانوں شراب پین دی عادت نُوں چھڈنا مشکل لگ رہیا اے تے تُسی کیہہ کر سکدے او؟ a
1-کُرنتھیوں 15:33 نُوں پڑھو تے فیر ایس سوال تے گل بات کرو:
-
شراب پین والیاں دی سنگت دا تواڈے تے کیہہ اثر ہو سکدا اے؟
شاید کوئی پچھے: ”کیہہ شراب پینا غلط اے؟“
-
تُسی ایس سوال دا کیہہ جواب دَوو گے؟
خلاصہ
شراب اوہناں چنگیاں چیزاں وچوں اِک اے جیہڑیاں یہوواہ نے انسان دی خوشی لئی دِتیاں نیں۔ پر اوہنوں ایہہ گل بالکل پسند نئیں کہ اَسی حدوں ودھ شراب پیئے یاں فیر ایہدے عادی بن جائیے۔
دہرائی
-
بائبل چ شراب دے استمال بارے کیہہ دَسیا گیا اے؟
-
حدوں ودھ پین دا کیہہ نقصان ہو سکدا اے؟
-
اَسی شراب پین بارے دُوجیاں دے فیصلے لئی عزت کیویں وکھا سکنے آں؟
ہور جانن لئی
ایس ویڈیو چ ویکھو کہ نوجوان شراب پین دے معاملے چ چنگے فیصلے کیویں کر سکدے نیں۔
ایس مضمون چ پڑھو کہ تُسی شراب پین دی عادت نُوں چھڈن لئی کیہہ کر سکدے او۔
شراب کے بارے میں مناسب نظریہ اپنائیں (مینارِنگہبانی، 1 فروری 2010)
ایس مضمون چ پڑھو کہ کیہہ مسیحیاں نُوں شراب دے گلاس آپس چ ٹکرا کے ”چیئرس“ کہنا چاہی دا اے۔
آپبیتی ”مَیں ایسا گڑھا تھا جو کبھی نہیں بھرتا تھا“ چ پڑھو کہ اِک بندے نے شراب پین دی عادت کیویں چھڈی۔
پاک کلام کی تعلیم زندگی سنوارتی ہے (مینارِنگہبانی دا مضمون)
a شراب دے عادی لوکاں نُوں ایہہ عادت چھڈن لئی ڈاکٹر کولوں مدد لینی پے سکدی اے۔ بوہت سارے ڈاکٹر کہندے نیں کہ شراب دا عادی اِک بندہ جدوں شراب پینا چھڈ دیندا اے تے فیر اوہنوں بالکل وی شراب نئیں پینی چاہی دی۔
ایہہ وی ویکھو
اوہ سوال جیہڑے لوک اکثر ساڈے بارے پچھدے نیں
یہوواہ دے گواہ بائبل کورس کیویں کراندے نیں؟
یہوواہ دے گواہواں نال بائبل کورس کردے ویلے تُسی جیہڑا وی بائبل ترجمہ چاہوو استمال کر سکدے او۔ نالے تُسی اپنے سارے گھر والیاں یاں اپنے دوستاں نُوں وی ایہدے چ شامل ہون لئی کہہ سکدے او۔
