Reʼ taqeh kʼachareel chi jun suut i akʼal maʼ jenaj ta wach inkikapaaj chi riij i bʼanaj haʼ. Juʼjun xa nikʼ inkibʼan kikʼah laj haʼ ruchʼihil taqeh kamigo eh juʼjun maʼ inkaaj ta kukʼem. Wilik taqeh kʼachareel maʼ inkipaj ta i nakukʼem eh kixohkʼrik. ¿Chajariik iruqʼor i Santo Laj Huuj chi riij i bʼanaj haʼ?

1. ¿Maʼ atoobʼ ta na i bʼanaj haʼ?

Reʼ Santo Laj Huuj maʼ iruqʼor ta chi maʼ atoobʼ ta. Iruqʼor laʼ chi reʼ Jehová iruyeew chi kikooch taqeh kʼachareel i riis uva reh chi ne insuqbʼik kikʼux (Salmo 104:​14, 15). Inqʼorik woʼ chi kiij taqeh winaq eh ixoq korik wach kikʼux chi inkibʼan naq kivino (1 Timoteo 5:​23).

2. ¿Chajariik iruqʼor i Santo Laj Huuj keh inkaaj kibʼanam kikʼah laj haʼ?

Reʼ Jehová maʼ imponik ta chuwach i xohkʼrik ni xa ta imponik chuwach noq maʼ inpajarik ta i narukʼjiik (Gálatas 5:​21). Reʼ Santo Laj Huuj iruqʼor: «Maʼ tiwihʼik chi kixilak i maʼ inkipaj ta i vino inkukʼej» (Proverbios 23:​20, TNM). Jeʼ reʼ noq mi inqakapaaj chi naqabʼanam qahaaʼ chi qutkeel oon ruukʼ tokoom, maʼ qikʼsaj naah i bʼanaj haʼ reh chi maʼ ne ta insahchik i qakapebʼaal jeʼ reʼ qehtʼal i ne inqaqʼor eh i ne inqabʼan. Ko ruman chi naqapajam i naqukʼem reh chi maʼ ne ta inqajotʼ i qakʼachariik. Mi maʼ qojchol rupajariik i naqukʼem maʼ qabʼan rukʼjiik, qakanaaʼ laʼ chi jun pech.

3. ¿Nikʼwach inqayeew kiloqʼil taqeh kʼachareel ruukʼ inkichih?

Chi kijuʼjunaal nakichihiim mi nakibʼanam i haʼ oon maʼchih. Maʼ na ta qaqʼatam qʼorik chi kinaah taqeh kʼachareel noq ne inkipaj i nakukʼem eh maʼ na ta qaminim reh jenoʼ kʼachareel i kʼah laj haʼ mi qehtʼal chi rukanaam chik (Romanos 14:​10). Eh maʼ inqabʼan ta woʼ i kʼah laj haʼ mi maʼ suq ne rubʼan reh i tokoom (chawil Romanos 14:​21). Ruum aj reʼ i hoj ajnimaneel «maʼ inqasikʼ xa reʼ i holohik chi qeh, qasikʼ laʼ i holohik chi keh i tokoom» (chawil 1 Corintios 10:​23, 24, TNM).

 CHATZʼIR RIIJ I KʼAHCHIʼ ATIJEM

4. Chachih mi naʼawukʼem i kʼah laj haʼ oon maʼchih

¿Chajariik naq irukapaaj i Jesús chi riij i rukʼjiik i kʼah laj haʼ? Reh chi ne inqanabʼeej qil i peet sachbʼal kʼuxliis xubʼan. Chawil taq i Juan 2:​1-​11 eh tiqʼoroq taq chi riij:

• ¿Chajariik irukʼuhtaaj qeh i ehtalil wilih noq reʼ Jesús xukorsaj i haʼ chi vino eh jeʼ woʼ chi kiij i kiʼukʼinik reh?

• Ruum chi reʼ Jesús maʼ xuqʼor ta chi mahk rukʼjiik i kʼah laj haʼ oon vino, ¿chajariik naq ne rukapaaj jenoʼ ajnimaneel chi riij ajwach irukʼej i kʼah laj haʼ?

Jeʼ reʼ noq, mi jenoʼ ajnimaneel irukʼej i kʼah laj haʼ maʼ iraaj ta ruqʼorom chi juneliik atoobʼ rubʼanariik. Chawil taq i Proverbios 22:3 eh chatzʼir taq riij mi atoobʼ rukʼjiik i kʼah laj haʼ noq:

• Naʼabʼehsam jenoʼ carro, jenoʼ camión oon tokoom chik.

• Wach kʼacharik wilkaat.

• Reʼ doctor xuqʼor aweh chi maʼ ne ta awukʼem i kʼah laj haʼ.

• Ma tichol ta rupajariik i kʼah laj haʼ naʼawukʼem.

• Reʼ rukʼuhbʼaal i tinamit maʼ ruyeew ta qʼabʼ aweh.

• Wilkaat ruukʼ jenoʼ kʼachareel rukanaam chik i bʼanaj haʼ.

¿Ne na irubʼan chi ne nayeew vino oon tokoom chik pan jenoʼ kaxarohiil oon pan jenoʼ chik ninqʼiij? Reh runabʼjiik chajariik naʼakojom pan ruman, chawil taq i VIDEO.

Chawil taq i Romanos 13:​13 eh 1 Corintios 10:​31, 32. Noq awilom taq chik i juʼjun chi texto, tiqʼoroq taq chi riij:

• ¿Nikʼwach ne tirutobʼeej i naʼojbʼal wilih reh chi ne nasuqbʼisaj rukʼux i Jehová ruukʼ i naʼachihiim?

 5. Chapaj nikʼ kʼihaal i naʼawukʼem

Mi nakapaaj chi naʼawukʼem i kʼah laj haʼ kʼoloq pan akʼux chi reʼ Jehová maʼ imponik ta chuwach chi ne nawikʼsaj naah i naʼawukʼem. ¿Chaaj woʼ reet? Chawil taq i Oseas 4:​11, 18 eh tiqʼoroq taq chi riij:

• ¿Chajariik ne inkʼuljik mi jenoʼ kʼachareel ne irikʼsaj naah i bʼanaj haʼ?

¿Chajariik ne qojrutobʼeej reh chi ne inqapaj i naqukʼem? Ko ruman chi ne inqakoj rehtaal taqeh kʼaxkilal ne inchalik mi xqikʼsaj naah. Chawil taq i Proverbios 11:2 eh tiqʼoroq taq chi riij:

• ¿Chaaj woʼ reet ko ruman chi naʼapajam nikʼ kʼihaal i haʼ naʼawukʼem?

6. Tiʼeloq pan qʼabʼ i bʼanaj haʼ

 KʼOLOQ PAN AKʼUX

Reʼ Jehová ruyeʼem qeh i vino eh tokoom chik haʼ reh chi ne inqasuqkileej xa reʼ laʼ, maʼ imponik ta chuwach i xohkʼrik eh maʼ imponik ta woʼ chuwach chi ne inqikʼsaj naah i bʼanaj haʼ.

Reʼ xkahnik pan akʼux

• ¿Chajariik iruqʼor i Santo Laj Huuj chi riij i bʼanaj haʼ?

• ¿Chajariik taqeh kʼaxkilal irukʼam cho mi xqikʼsaj naah i bʼanaj haʼ?

• ¿Nikʼwach ne inqakʼuhtaaj chi inqayeew ruloqʼil inkichih i tokoom chi riij i bʼanaj haʼ?