Ikuwɨtyi naxyukmɨ ity jaʼyan̈ jempɨk tsaam ukyajpa, pero tun̈gakyaj dyaʼ ikusuʼnɨyyajpa. Weeñi ukyajpa kun iamigojyaj pero dyaʼ juchixkej ukyajpa. Tun̈gakyaj dyaʼ ukyajpa ni uxan̈. Y ityyajtyim jempɨk tsaam pɨɨmi ukyajpa. Pero, ¿tyi in̈kejpa jeʼm Biblia?

1. ¿Malo siiga taukpa?

Jeʼm Biblia dyaʼ nɨmpa iga malo siiga taukpa uxan̈. Jeʼm Dios In̈maatyi nɨmpa iga jeʼm vino jeʼ tuum xaajaʼ tachiʼiñewɨʼɨp Dios «iga tamaymaywadaʼyba tananmaj» (Salmo 104:14, 15). Y jeʼm Biblia ijɨykiʼmpatyim weeñi pɨxiñtyam y yomtam jempɨk ukyajpa idyɨk uxan̈ (1 Timoteo 5:23).

2. ¿Juutypɨk in̈kiʼmpa jeʼm Biblia jempɨk iukyajtoʼoba alcohol?

Jehová ijooyixpa siiga pɨɨmi taukpa (Gálatas 5:21). Jeʼm Biblia nɨmpa: «Odoy waganaityɨ jempɨk tsaam iukyajpa vino» (Proverbios 23:20). Jeʼyukmɨ siiga tampɨkpa tanjɨɨxi iga taukpa, tan̈kutyum o kun tun̈gakyaj, ni keman odoy taugan̈naxiñ hasta dyam tanjɨɨspa tyi tan̈watpa o tyi tanɨmpa. Dyatyim wɨɨ iga pɨɨmi taukpa, iga imalwadaʼyba tammɨjtaay. Siiga dyaʼ wɨap tanan̈jakta juʼtsan̈ taukpa, maaj wɨɨ iga odoy tauguiñ ni uxan̈.

3. ¿Juutypɨk tanakwiñkejpa respeto por jempɨk iwatyajpa tun̈gakyaj?

Cada tumtum de taɨchtyam tampɨguiñ tanjɨɨxi siiga taukpa uxan̈ o dyaʼ. Odoy tan̈kujɨyyajiñ jempɨk ukyajpa uxan̈. Odoytyim tanteguedɨʼyiñ algun i siiga ipɨkneʼ ijɨɨxi iga dyaʼ ukpa (Romanos 14:10). Y siiga algun i dyaʼ iwɨaʼmpa siiga taukpa, maaj wɨɨ iga odoy tauguiñ (maayɨʼ Romanos 14:21). Jeʼm cristiano imeʼtspa juutypɨk iyooxpaʼtpa jeʼm ityɨwɨtam y dyaʼ iga nawɨwadaytyaap iyaʼak (maayɨʼ 1 Corintios 10:23, 24).

 MAAJ TAN̈WƗKUYUJKAIÑ

4. Pɨɨkɨ iñjɨɨxi siiga miukpa o dyaʼ

¿Tyi idyɨk ijɨɨspa Jesús siiga algun i ukpa? Iga wɨaiñ tanjoodon̈ataʼm, tan̈kɨʼpin̈taʼmiñ jeʼm wiñtyipɨk milagro iwatwɨʼɨp. Maytyaʼamɨ Juan 2:1-11 y an̈mattaʼamɨ tyi iñjɨɨstaʼmpa y kutson̈taʼamɨ:

• Kun yɨʼp nasɨyoʼoyi, ¿tyi idyɨk ijɨɨspa Jesús siiga tun̈gakyaj ukyajpa?

• Jesús dyaʼ idyɨk ijooya iga tun̈gakyaj ukyajiñ uxan̈, ¿tyi wɨɨ iga tanjɨɨstaʼmiñ siiga tun̈gakyaj ukyajpa uxan̈?

Mex iga tuum cristiano ukpa uxan̈, dyaʼ nɨmtoʼoba iga juchixkej wɨap iwat. Maytyaʼamɨ Proverbios 22:3 y kɨʼpin̈taʼamɨ siiga wɨap tanuk uxan̈ jesɨk:

• Inikwitypa tuum carro o iñyooxakaʼaba algun tyi iga wɨap mikkoowa o ikkoowaap tun̈gakyaj.

• Mimanɨkkomkaneʼ.

• Jeʼm doctor miñɨʼmay iga odoy miuguiñ ni uxan̈.

• Tan̈kaʼ minin̈jakta juʼtsan̈ iñukpa.

• Jeʼm an̈jagoʼoyiyaj dyaʼ miaʼmchiyajpa iga miuguiñ.

• In̈waganaity algun i jempɨk tsaam idyɨk ukpa.

Jesɨk algun i an̈koʼmɨʼyba o jesɨk mixɨn̈aap, ¿wɨɨ iga miuktaʼmiñ? Iga in̈wɨpɨguiñ iñjɨɨxi, aʼmtaʼamɨ jeʼm VIDEO.

Maytyaʼamɨ Romanos 13:13 y 1 Corintios 10:31, 32. Okmɨ an̈mattaʼamɨ tyi iñjɨɨstaʼmpa y kutson̈taʼamɨ:

• ¿Juutypɨk wɨap miyooxpaʼt yɨʼp an̈kiʼmayoʼoyi iga in̈wɨpɨguiñ iñjɨɨxi y immaymaywadyiñ Jehová?

5. Pɨɨkɨ iñjɨɨxi juʼtsan̈ iñukpa

Siiga miukpa, jɨɨsɨ iga Jehová taaʼmchiʼiba iga tauguiñ uxan̈, pero ijooyixpa iga pɨɨmi tauguiñ. ¿Tyiʼiga? Maytyaʼamɨ Oseas 4:11, 18 y an̈mattaʼamɨ tyi iñjɨɨstaʼmpa y kutson̈taʼamɨ:

• ¿Tyi wɨap iñas jesɨk algun i pɨɨmi ukpa?

¿Tyi wɨap tayooxpaʼt iga odoy taugan̈naxiñ? Wɨɨ iga tanaixpɨktaiñ y tan̈kutɨʼɨyɨytyaʼmiñ juʼtsan̈ wɨap tanuk. Maytyaʼamɨ Proverbios 11:2 y an̈mattaʼamɨ tyi iñjɨɨstaʼmpa y kutson̈taʼamɨ:

• ¿Tyiʼiga nasuntaap iga in̈wɨkujɨɨxiñ juʼtsan̈ wɨap iñuk?

6. ¿Tyi miyooxpaʼtpa iga iñchaguiñ iga miukpa?

 JEMPƗK TAN̈KUYUJKAʼ

Jehová tachiʼiñeʼ jeʼm alcohol juʼuts tuum xaajaʼ, pero dyaʼ iwɨixpa siiga algun i pɨɨmi ukpa.

¿Iñjɨɨspanam?

• ¿Malo siiga taukpa? ¿Tyi in̈kejpa jeʼm Biblia?

• ¿Tyi tannaskaʼaba siiga pɨɨmi taukpa?

• ¿Juutypɨk tanakwiñkejpa respeto jesɨk tun̈gakyaj ipɨkyajpa ijɨɨxi siiga ukyajpa o dyaʼ?