IREN MEHN KASUKUHL 43
Dahme Kristian kan Pahn Medewehki Sakau en Wai?
En aramas akan madamadau ong sakau en wai kin wekpeseng. Ekei kin perenki iang iangarail kan nim sakau en wai ekei pak. Ekei kin pilada ren sohte douluhl nim sakau en wai. A ekei kin nim sakau lao re sakaula. Dahme Paipel kin mahsaniheki duwen sakau en wai?
1. E sapwung en nim sakau en wai?
Paipel sohte keinapwihdi nim sakau en wai. Ahpw, ni Paipel eh mahsanih kisakis tohto me Koht ketikihong kitail, e kasalehda me ‘wain mehn kaparanda nan kapehden aramas.’ (Melkahka 104:14, 15) Ekei ohl oh lih lelepek kan me mi nan Paipel kin nim sakau en wai.—1 Timoty 5:23.
2. Kaweid dah me Paipel kihong irail kan me pilada ren nim sakau en wai?
Siohwa ketin keinapwihdi aramas en sakau daulihala oh kin sakaula. (Kalesia 5:21) Sapwellime Mahsen mahsanih: “Dehr patehng aramas me kin kamam sakau.” (Lepin Padahk 23:20) Eri ma kitail pilada kitail en iang meteikan de kitail kelehpw nim sakau, kitail dehr nim sakau lao kitail sohla kak madamadau mwahu, kaunda atail lokaia oh wiewia de me pahn kauwehla atail roson. Ma kitail kin kalapw nim daulihala, kitail anahne sohla douluhl nim sakau en wai.
3. Ia duwen atail kak wauneki en meteikan pilipil duwen sakau en wai?
Emenemen aramas anahne pilada ma e pahn nim sakau en wai de soh. Kitail dehr kadeik emen me pilada en nim sakau ni uwen me konehng, oh kitail dehr idingkihong emen en nim sakau en wai ma e sohte men. (Rom 14:10) Kitail kin pilada me kitail sohte pahn nim ma met kakete kahpwalihala meteikan. (Wadek Rom 14:21.) Kitail “dehr kin raparapahkihte pein [kamwahupatail], ahpw kamwahupen meteio.”—Wadek 1 Korint 10:23, 24.
KALAUDEHLA OMW ESE MET
Medewe ire mehlel oh kaweid en Paipel kan me pahn seweseiuk en pilada ma ke pahn nim sakau en wai de soh oh ia uwen laud me ke pahn nimala. Pil kilang dahme ke kak wia ma ke kin ahneki kahpwal en sakau en wai.
4. Pilada ma ke pahn nim de soh
Ia sapwellimen Sises madamadau duwen nim sakau en wai? Pwehn diar pasapengo, tehk tepin manaman me e ketin wiahda. Wadek Sohn 2:1-11, oh mwuri koasoiapene peidek pwukat:
-
Dahme manaman wet kak padahkihong kitail duwen sapwellimen Sises madamadau ong sakau en wai oh irail kan me kin nim?
-
Pwehki Sises sohte ketin keinapwihdi nim sakau en wai, dahme Kristian men anahne medewehki emen me pilada en nim?
Kristian kan ahneki saledek en nim sakau en wai, ahpw met sohte wehwehki me ahnsou koaros e pahn mwahu en nim. Wadek Lepin Padahk 22:3, oh mwuri medewe ia duwen ire pwukat pah eh kak seweseiuk ken pilada ma ke pahn nim de soh:
-
Ke pahn diraip de koadoahke misihn ehu.
-
Ke liseian.
-
Toahkte nda ken dehr nim sakau en wai.
-
Ke kin kalapw nim daulihala.
-
Kosonned sohte mweidohng uhk en nim sakau en wai.
-
Ke mi rehn emen me pilada en liksang sakau en wai pwehki e kin kalapw nim daulihala mahso.
Ke pahn kihda sakau en wai ni kamadipw en kapwopwoud de kamadipw teikan? Pwe ken kilang dahme kak seweseiuk, kilang KISIN KASDO.
Wadek Rom 13:13 oh 1 Korint 10:31, 32. Mwurin omw wadek ehuehu iren Paipel, koasoiapene peidek wet:
-
Ia duwen kaweid wet eh kak seweseiuk ken wiahda pilipil me pahn kaperenda kupwuren Siohwa?
Emenemen Kristian anahne pilada ma e pahn nim sakau en wai de soh. Mehnda ma e pil kin nim sakau ekei pak, ele e pahn pilada en dehr nim ni ahnsou teikan
5. Pilada uwen me ke pahn nim
Ma ke pilada ken nim sakau en wai, tamataman met: Mendahki Siohwa sohte ketin keinapwihdi nim sakau en wai, e ketin keinapwihdi sakau daulihala. Dahme kahrehda? Wadek Oseia 4:11, 18, oh mwuri koasoiapene peidek wet:
-
Dahme kak wiawi ma aramas emen nim daulihala?
Dahme kak sewese kitail en dehr nim daulihala? Kitail anahne mpahi de pohnese uwen me kitail kak nimala. Wadek Lepin Padahk 11:2, oh mwuri koasoiapene peidek wet:
-
Dahme kahrehda e mwahu ken koasoanehdi uwen me ke pahn nimala?
6. Powehdi kahpwal en nim daulihala
Kilang dahme sewese emen ohl en uhdihsang eh kin nim sakau daulihala. Kilang KISIN KASDO, oh mwuri koasoiapene peidek pwukat.
-
Dahme Dmitry kin wia ni eh kin nim sakau en wai?
-
E kak mwadang kesehla sakau?
-
Dahme e wia me kahrehda e kakehr uhdihsang nim sakau daulihala?
Wadek 1 Korint 6:10, 11, oh mwuri koasoiapene peidek pwukat:
-
Dahme Paipel mahsaniheki duwen sakaula?
-
Dahme kasalehda me aramas emen me kin kalapw nim daulihala kak wekila?
Wadek Madiu 5:30, oh mwuri koasoiapene peidek wet:
-
Lupukasang peh kin karasaraskihong wiahda tounmetei pwehn kaperenda kupwuren Siohwa. Dahme ke kak wia ma ke kin apwalki uhdihsang nim sakau daulihala? a
Wadek 1 Korint 15:33, oh mwuri koasoiapene peidek wet:
-
Ma ke kin patehng irail kan me kin perenki nim daulihala, dahme met pahn wiahiong uhk?
MA EMEN IDEK: “E sapwung en nim sakau en wai?”
-
Ia duwen omw pahn sapeng?
DAHME KE SUKUHLKIER
Siohwa ketikihda sakau en wai ong mehn kaperenda kitail, ahpw e ketin keinapwihdi nim sakau daulihala oh sakaula.
Kousapahl
-
Dahme Paipel mahsaniheki duwen nim sakau en wai?
-
Ia keperpen nim sakau daulihala?
-
Ia duwen atail kak wauneki en meteikan pilipil duwen sakau en wai?
PIL TEHK
Ia duwen me pwulopwul kan ar kak wiahda pilipil mwahu duwen sakau en wai?
Tehk soahng kan me ke kak wia pwehn powehdi kahpwal en sakau.
“Kolokol Madamadau Pwung ong Sakau” (Kahn Iroir, February 1, 2010)
Kristian kan kak iang kaloi neirail kep en sakau kan?
“Questions From Readers” (The Watchtower, February 15, 2007)
Kilang ia duwen emen ohl eh uhdihsang nim sakau daulihala nan oaralap wet, “I Was a Bottomless Barrel.”
a Irail akan me sohte kak uhdihsang nim sakau daulihala ele pahn anahne sawas sang toahkte kan. Toahkte tohto kin nda me irail me ahneki kahpwal wet en dehr nim sakau douluhl.
