Na yâ ti dunia kue, azo ayeke na abango ndo nde nde na ndö ti nyongo sämba. Ambeni aye ti tene, ngoi na ngoi, ala na akamarade ti ala anyon ye. Ambeni anyon ti ala sämba ape. Ambeni ayeke nyon juska ala soulé. Bible atene nyen na ndö ti nyongo sämba?

1. Eskê a yeke sioni ti nyon sämba?

Bible atene pëpe so nyongo sämba ayeke sioni. Na popo ti anzoni ye so Nzapa amû na e, Bible asara nga tënë ti “vin so azia ngia na bê ti zo.” (Psaume 104:14, 15). Ambeni zo so ayeke be-ta-zo so Bible asara tënë ti ala ayeke nyon lani sämba.​—1 Timothée 5:23.

2. Wango wa la Bible amû na azo so asoro ti nyon sämba?

Jéhovah ake ti tene zo anyon sämba ahon ndö ni nga lo soulé (aGalate 5:21). Bible atene: “Ga pëpe oko ti azo so ayeke nyon vin ahon ndö ni.” (aProverbe 23:20). Tongaso, tongana e soro ti nyon sämba, même gï e oko, a yeke nzoni e nyon ahon ndö ni ape tongaso si e gbu li ti e nzoni, e bata yanga ti e, e sara hange na sarango ye ti e nga e bata seni ti e. Tongana a yeke ngangu na e ti nyon sämba alingbi na ngangu ti e, a yeke nzoni e zia ti nyon ni.

3. Tongana nyen la e peut ti bâ na nene ni desizion ti amba ti e na ndö ti nyongo sämba?

A yeke na zo oko oko ti soro ti nyon sämba wala pëpe. A yeke nzoni e fâ ngbanga pëpe na ndö ti mbeni zo so asoro ti nyon sämba alingbi na ngangu ti lo, nga a yeke nzoni e forcé pëpe mbeni zo so aye ti nyon sämba ape ti nyon ni (aRomain 14:10). E yeke soro ti nyon sämba ape tongana nyongo sämba ti e apeut ti ga na kpale na amba ti e. (Diko aRomain 14:21.) E yeke gi “ye so asara nzoni na mba ti [e], me pëpe ye so asara nzoni gï na [e] wani.”​—Diko 1 aCorinthien 10:23, 24..

 GI TI HINGA AYE MINGI

4. Bâ wala mo yeke nyon sämba

Jésus abâ lani nyongo sämba tongana nyen? Ti hinga ni, gbu li na ndö ti kozo miracle so lo sara lani. Diko Jean 2:1-11, na pekoni kiri tënë na ahunda so:

• Na lege ti miracle so, nyen la e peut ti manda na ndö ti bango ndo ti Jésus na ndö ti sämba nga na azo so ayeke nyon ni?

• So Jésus ake na zo ti nyon sämba ape so, a yeke nzoni Chrétien abâ zo so asoro ti nyon sämba tongana nyen?

Ye oko, so Chrétien ayeke na liberté ti nyon sämba, a ye ti tene ape so a yeke lakue na lege ti ndara ti tene lo nyon ni. Diko aProverbe 22:3, na pekoni bâ tongana nyen la aye so ge apeut ti aidé mo ti bâ wala mo yeke nyon sämba wala pëpe:

• Mo yeke kpe ande na oto wala mo yeke sara ande kua na mbeni machine.

• Mo yeke na ngo.

• Docteur atene na mo ti nyon sämba ape.

• A yeke ngangu na mo ti nyon sämba alingbi na ngangu ti mo.

• Ndia amû lege na mo ti nyon sämba ape.

• Mo yeke na terê ti mbeni zo so ake ti nyon sämba ndali ti so a yeke lani ngangu na lo ti nyon sämba alingbi na ngangu ti lo.

A yeke nzoni mo mû sämba na azo na ngoi ti matanga ti mariage wala ambeni matanga nde? Ti bâ ye so apeut ti aidé mo ti mû desizion, zia VIDÉO ni.

Diko aRomain 13:13 nga na 1 aCorinthien 10:31, 32. Na peko ti dikongo aversê so oko na oko, kiri tënë na hunda so:

• Tongana nyen la sarango ye alingbi na mama-ndia so apeut ti aidé mo ti mû desizion so anzere na Jéhovah?

 5. Bâ verre oke wala bouteille oke la mo yeke nyon

Tongana mo soro ti nyon sämba, girisa tënë so ape: Atâa so Jéhovah ake na e ape ti nyon sämba, lo ke na e ti nyon ni ahon ndö ni. Ngbanga ti nyen? Diko Osée 4:11, 18, na pekoni kiri tënë na hunda so:

• Nyen la apeut ti si tongana mbeni zo anyon ye ahon ndö ni?

Nyen la apeut ti aidé e ti nyon sämba ahon ndö ni ape? E bezoin ti sara ye ahon ndö ni ape, wala e bezoin ti hinga alimite ti e. Diko aProverbe 11:2, na pekoni kiri tënë na hunda so:

• Ngbanga ti nyen la a yeke nzoni ti tene zo abâ kozo wungo ti verre wala bouteille oke la lo yeke nyon?

6. Nyen la apeut ti aidé mbeni zo ti nyon ye ahon ndö ni encore ape?

 NA NDURU TËNË

Jéhovah aleke sämba ti tene azia ngia na bê ti e, me lo ke ti tene e nyon ahon ndö ni nga a soulé e.

Dango bê

• Bible atene nyen na ndö ti nyongo sämba?

• Akpale wa la ayeke ga na peko ti nyongo sämba ahon ndö ni?

• Tongana nyen la e peut ti ne desizion so amba ti e amû na ndö ti nyongo sämba?