ISOMO LYA 43
Entanya z’Abakristu Ziba Zihi Okubiyerekire Amamvu?
Omw’igulu lyoshi, abantu bajira entanya ziri lubero lugenda amamvu. Baguma banashagalukire okunywa amamvu amango barhimanine n’abîra babo. Abandi ciru barhakagalabulako. N’abandi banaganywe kuhika balaluke. Entanya z’Ebibliya zirigi zihi lugenda amamvu?
1. Ka kuba kubi okunywa amamvu?
Ebibliya erhadesiri oku kuli kubi okunywa amamvu. Lubero n’oko edesire oku “idivayi lijira omurhima gw’omuntu gushagaluke,” liri egarhi kʼengalo Nnâmahanga arhuhîre. (Ennanga 104:14, 15, NWT) Ebibliya eganirire abalume n’abakazi baguma baguma bishwekerezi ba mîra bakaginywa amamvu.—1 Timoteyo 5:23.
2. Mahano gahi Ebibliya ehîre bala bahiga okunywa amamvu?
Yehova ahanzize okunywa amamvu bwenene n’okulaluka. (Abagalasiya 5:21) Akanwa kage kadesire ntya: “Orhohîraga okakerekera ekarhî ka ba-cambali-nzoga.” (Emigani 23:20) Co cirhumire, erhi rhwakahiga okunywa amamvu, ciru ankaba rhurhali aha bantu, rhurhashinganini okunywa amamvu bwenene kula kwakarhuma rhurhacihash’irhanya bwinja erhi rhurhondere okujira n’okuderha ebishala kabwa, erhi gashereze amagala girhu. Kuli kwinja okuleka okunywa amamvu loshi-loshi, erhi rhwakabona oku rhurhakahash’icigerera manganaci rhwanywa.
3. Gurhi rhwakakenga emihigo y’abandi lugenda okunywa amamvu?
Ngasi muguma agwerhe oluhûma lw’okuhiga okunywa amamvu erhi nanga. Rhurhakatumuza muntu mulebe wahizire oku akanywa amamvu n’olugero, rhurhanashinganini okuseza muntu mulebe oku anywe amamvu nk’arhalonzizi. (Abaroma 14:10) Rhunacishoge okurhanywa mamvu erhi akaba oko kwanalerhera abandi amazibu erhi kubasarhaza. (Osome Abaroma 14:21.) Na ntyo muli rhwe “ntaye olonzagye obunguke bwage yene, cikone alonze obw’abandi.”—Osome 1 Abakorinti 10:23, 24.
HUMBIRIRA LY’OHUGÛKWA
Olole amakanuni g’Ebibliya gakakurhabala ohige erhi wananywa amamvu erhi nanga n’akaba wanaganywa, manganaci wakânywa. Na kandi wabona gurhi wakajira erhi akaba ojira amazibu g’okuganywa bwenene.
4. Ohige erhi wakânywa amamvu erhi nanga
Ntanya zihi Yezu agwerhe lugenda okunywa amamvu? Ly’obona ishuzo, olole ecisomerine cirhanzi ajiraga. Osome Yowane 2:1-11, na buzinda oganirire aga madoso:
-
Kugerera eci cisomerine, bici rhuyizire okubiyerekire entanya za Yezu lugenda amamvu na bala baganywa?
-
Bulya Yezu arhahanzagya okunywa amamvu, gurhi rhushinganine rhukabona bala bahiga okuganywa?
Ciru ankaba ntyo, arhali mpu bulya Omukristu agwerhe oluhûma lw’okunywa amamvu k’okuderha oku buli bwenge okukaganywa ngasi mango. Osome Emigani 22:3, na buzinda olole gurhi wakakolesa akanuni kali mw’olo lwandiko ly’omanya erhi wanywa amamvu erhi nanga, amango:
-
Oli watembeza omutuga erhi oli wakolesa mashini malebe.
-
Oli izimi.
-
Dogtere okubwizire oku oleke okunywa amamvu.
-
Orhacihasha nk’oli embere z’amamvu.
-
Irhegeko lya leta lihanzize okunywa amamvu.
-
Oli haguma n’omuntu wahizire oku arhakacinywa mamvu bulya erhi akaganywa arhakag’ihashicigerera.
Ka waha abantu amamvu oku buhya erhi agandi mango gw’okucishagalusa? Ly’obona ebyakakurhabala okuhiga erhi waha abantu amamvu, olole EVIDEO.
Osome Abaroma 13:13 na 1 Abakorinti 10:31, 32. Enyuma z’okusoma ngasi lwandiko, oganirire er’idoso:
-
Gurhi okukolesa aka kanuni k’Ebibliya kwakakurhabala orhôle omuhigo gwashagalusa Yehova?
Ngasi Mukristu anahiga yene erhi akanywa amamvu erhi nanga. Ciru ankaba ananywe amamvu, hali mango maguma maguma akahiga oku arhaganywe
5. Ohige mamvu manganaci wanywa
Erhi wakahiga okunywa amamvu, okengere oku: Yehova arhahanzizi okuganywa, cikone ahanzize okuganywa bwenene. Bulya gurhi? Osome Hozeya 4:11, 18, na buzinda oganirire er’idoso:
-
Gurhi byakaba erhi omuntu akanywa amamvu bwenene?
Gurhi rhwakajira lyo rhuyaka okunywa amamvu bwenene? Rhushinganine rhube n’olugero n’okumanya omupaka gwirhu. Osome Emigani 11:2, na buzinda oganirire er’idoso:
-
Bulya gurhi kuli kwinja okumanya mamvu manganci wakanywa?
6. Bici byakarhabala omuntu aleke enkomêdu y’okunywa amamvu bwenene?
Olole ebyarhabire mulume muguma aleke enkomêdu y’okunywa amamvu bwenene. Olole EVIDEO, na buzinda oganirire aga madoso gakulikire.
-
Nk’oku obwine mw’eyo video, gurhi Dmitry akagijira enyanya z’okunywa amamvu?
-
Ka kwali kulembu kuli ye okuleka amamvu?
-
Gurhi ahikire aha aba n’obulyo bw’okuleka enkomêdu y’okuganywa bwenene?
Osome 1 Abakorinti 6:10, 11, na buzinda oganirire aga madoso:
-
Bulya gurhi endalwe ciba caha cizibu?
-
Bici biyerekine oku onywa amamvu bwenene naye anajira empindûlo?
Osome Mateyo 5:30, na buzinda oganirire er’idoso:
-
Olwiganyo lw’okutwa okuboko Yezu aganiriraga luyerekine oku bihûnyire okuba babidu okuleka bintu bilebe lyo rhushagalusa Yehova. Gurhi wakajira erhi akaba ogwerhe amazibu g’okunywa amamvu bwenene? a
Osome 1 Abakorinti 15:33, na buzinda oganirire er’idoso:
-
Okuba n’abîra banywa amamvu bwenene, mazibu maci kwakarhulerhera?
HALI OMUNTU WAKADOSA NTYA: “Ka kuba kubi okunywa amamvu?”
-
Gurhi wakashuza?
KWA BOFOFI
Yehova arhuhîre oluhembo lw’amamvu lyo lukarhushagalusa, cikone aba ahanzize okunywa amamvu bwenene n’okulaluka.
Okucikengeza
-
Entanya z’Ebibliya ziba zihi lugenda amamvu?
-
Mazibu gahi okunywa amamvu bwenene kwakarhulerhera?
-
Gurhi rhwakayerekanamwo oku rhukenzire entanya z’abandi lugenda emihigo yabo y’okunywa amamvu?
OCIYIGIRIZE KWA BULÎRI
Gurhi emisole yakarhôla emihigo minja lugenda okunywa amamvu?
Embere Onywe Amamvu Orhangirhanya oku Bintu Byakayish’ikuhikira (2:31)
Olole ebintu wakajira ly’oleka enkomêdu y’okunywa amamvu bwenene.
“Acha Pombe Fasi Yake” (Ilabiro ly’Akalalizi, ly’omu lusiku 1/1/2010)
K’abakristu bashinganine bahukuze amacupa haguma embere banywe amamvu?
“Maulizo ya Wasomaji Wetu” (Ilabiro ly’Akalalizi, ly’omu nsiku 15/2/2007)
Omu mwanzi gudesire “Nilikuwaka Nakunywa Sana,” olole gurhi mulume muguma alekaga enkomêdu y’okunywa amamvu bwenene.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/5/2012)
a Bala bakola baba baluganywa banaba n’obulagirire bw’okugendibona dogtere. Badogtere banji banaderhe oku bala bagwerhe amazibu g’okunywa mamvu manji, kwanaba kwinja erhi bakaleka okuganywa loshi-loshi.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
