SIFUNDVO 43
EmaKhristu Kufanele Abe Namuphi Umbono Ngetjwala?
Emhlabeni wonkhe, bantfu banemibono lengafani ngetjwala. Labanye bakhetsa kunatsa tjwala nabahlangene nebangani babo. Labanye bakhetsa kungabutsintsi sanhlobo. Kantsi labanye banatsa baze badzakwe. Litsini liBhayibheli ngetjwala?
1. Kubi yini kunatsa tjwala?
LiBhayibheli alisho kutsi kubi kunatsa tjwala. Kunaloko, nalikhuluma ngetipho Nkulunkulu lasiphe tona, libala “neliwayini lelenta inhlitiyo yemuntfu ijabule.” (Tihlabelelo 104:14, 15) Lamanye emadvodza nebesifazane labetsembekile lokukhulunywa ngabo eBhayibhelini bebabunatsa tjwala.—1 KuThimothi 5:23.
2. LiBhayibheli libaniketa siphi seluleko labo labakhetsa kunatsa tjwala?
Jehova uyakulahla kunatsa kakhulu nekudzakwa. (KubaseGalathiya 5:21) LiVi lakhe litsi: “Ungabi ngulomunye walabo labanatsa kakhulu liwayini.” (Taga 23:20) Ngako nasikhetsa kunatsa tjwala, sisodvwa nobe sinalabanye, akukafaneli sinatse kakhulu size singasakhoni kucabanga kahle, kulawula indlela lesikhuluma ngayo netento tetfu, nobe size silimate imphilo yetfu. Ngako nasingakhoni kulawula indlela lesinatsa ngayo tjwala, kufanele singabunatsi sanhlobo.
3. Singatihlonipha njani tincumo talabanye endzabeni yekunatsa tjwala?
Umuntfu ngamunye kufanele atikhetsele kutsi utabunatsa yini tjwala. Akukafaneli simehlulele lomunye umuntfu lokhetsa kunatsa tjwala ngelizinga lelifanele, futsi akukafaneli simphocelele nalongafuni kubunatsa kutsi abunatse. (KubaseRoma 14:10) Sikhetsa kungabunatsi tjwala nangabe kubunatsa kutawukhuba labanye. (Fundza KubaseRoma 14:21.) Asitifuneli ‘lokusita [tsine], kodvwa sichubeka sifuna lokusita lomunye umuntfu.’—Fundza 1 KubaseKhorinte 10:23, 24.
CHUBEKA UFUNISISA
Cabanga ngetimiso teliBhayibheli letingakusita uncume kutsi utabunatsa yini tjwala nekutsi utabunatsa kangakanani. Phindze ubone kutsi yini longayenta nawunenkinga yekunatsa kakhulu.
4. Khetsa kutsi utabunatsa yini tjwala
Jesu bekanamuphi umbono ngekunatsa tjwala? Kuze utfole imphendvulo, cabanga ngesimangaliso sekucala lasenta. Fundza Johane 2:1-11, bese nicoca ngalemibuto:
-
Kulesimangaliso, yini lesingayifundza ngembono waJesu ngetjwala kanye nangalabo lababunatsako?
-
Njengobe Jesu angazange akulahle kunatsa tjwala, umKhristu kufanele abe namuphi umbono ngalabo labakhetsa kubunatsa?
Nobe kunjalo, kutsi umKhristu ukhululekile kunatsa tjwala, akusho kutsi kufanele ahlale abunatsa. Fundza Taga 22:3, bese ucabanga ngaletimo letilandzelako kutsi tingakuvumela yini kutsi unatse tjwala:
-
Utawushayela nobe usebentise umshini lotsite.
-
Ukhulelwe.
-
Dokotela utsite ungabunatsi tjwala.
-
Awusakhoni kulawula indlela lonatsa ngayo tjwala.
-
Umtsetfo awukuvumeli kutsi unatse tjwala.
-
Unemuntfu lokhetsa kungabunatsi tjwala ngobe wake waba nenkinga yekulawula indlela lebekanatsa ngayo.
Kufanele yini kutsi kube netjwala emshadweni nobe kuleminye imibutsano? Kuze utfole kutsi yini lengakusita wente sincumo, dlala le-VIDEO.
Fundza KubaseRoma 13:13 na-1 KubaseKhorinte 10:31, 32. Ngemuva kwekufundza umbhalo ngamunye, cocani ngalombuto:
-
Kusebentisa lesimiso kungakusita njani kutsi wente sincumo lesitawujabulisa Jehova?
UmKhristu ngamunye kufanele atincumele kutsi utabunatsa yini tjwala nobe cha. Ngisho angabunatsa ngaletinye tikhatsi, kuletinye angakhetsa kungabunatsi
5. Yenta sincumo sekutsi utawunatsa kangakanani
Nawukhetsa kunatsa tjwala, khumbula naku: Nanobe Jehova angakulahli kunatsa tjwala, uyakulahla kunatsa ngalokwecile. Leni? Fundza Hoseya 4:11, 18, bese nicoca ngalombuto:
-
Yini lengasita umuntfu lonatsa kakhulu?
Yini lengasisita singanatsi kakhulu? Sidzinga kwati kutsi bunganani tjwala lesingabunatsa ngaphandle kwekwephula umtsetfo waJehova. Fundza Taga 11:2, bese nicoca ngalombuto:
-
Kukahle ngani kutikalela kutsi utawunatsa tjwala lobungakanani?
6. Ncoba kusebentisa kabi tjwala
Tfola kutsi yini leyasita lenye indvodza yancoba kusebentisa kabi tjwala. Dlala le-VIDEO, bese nicoca ngalemibuto lelandzelako.
-
Kule-video, kunatsa tjwala kwayitsintsa njani indlela Dmitry lebekenta ngayo tintfo?
-
Wakhona yini kubuyekela ngekushesha tjwala?
-
Wakhona njani kuyekela kunatsa kakhulu?
Fundza 1 KubaseKhorinte 6:10, 11, bese nicoca ngalemibuto:
-
Kubi kangakanani kudzakwa?
-
Yini lekhombisa kutsi umuntfu lonatsa kakhulu tjwala angashintja?
Fundza Matewu 5:30, bese nicoca ngalombuto:
-
Ngesikhatsi Jesu akhuluma ngalomfanekiso wekujuba sandla, bekasho kutsi kudzingeka sidzele lokutsite kuze sijabulise Jehova. Yini longayenta nawukutfola kumatima kuncoba kusebentisa kabi tjwala? a
Fundza 1 KubaseKhorinte 15:33, bese nicoca ngalombuto:
-
Bangani bakho bangayitsintsa njani indlela lonatsa ngayo tjwala?
LOMUNYE ANGASE AKUBUTE: “Kubi yini kunatsa tjwala?”
-
Ungaphendvula utsini?
LOKO LESICOCE NGAKO
Jehova wasipha tjwala kuze sibujabulele, kodvwa uyakulahla kunatsa ngalokwecile nekudzakwa.
Yini Loyifundzile?
-
Uyini umbono weliBhayibheli ngetjwala?
-
Ngutiphi tingoti tekunatsa kakhulu tjwala?
-
Singatihlonipha njani tincumo talabanye endzabeni yekunatsa tjwala?
LOKUNYE LONGAKUHLOLA
Bantfu labasha bangatenta njani tincumo letikahle nakutiwa endzabeni yekunatsa tjwala?
Tfola tinyatselo longatitsatsa kuze uncobe inkinga yekunatsa kakhulu.
“Kugcina Tjwala Busendzaweni Yabo” (Sicongosekulindza, saFebruary 1, 2010)
Kufanele yini umKhristu ahlanganyele ekushayiseni tingilazi nakunatfwa tjwala (toasting)?
“Imibuzo Evela Kubafundi” (Sicongosekulindza, saFebruary 15, 2007 lesitfolakala ngesiZulu)
Endzabeni letsi “I Was a Bottomless Barrel,” tfola kutsi lenye indvodza yayekela njani kunatsa kakhulu tjwala.
“The Bible Changes Lives” (Sicongosekulindza, saMay 1, 2012, lesitfolakala ngesiNgisi)
a Labo labakutfola kumatima kuyekela tjwala bangadzinga lusito lwabodokotela kuze babuyekele. Bodokotela labanyenti batsi labo labake baba nenkinga yekunatsa kakhulu tjwala, kufanele bangabunatsi sanhlobo.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
