Sambe managne ty heve’e miomba ty finomagne toake ty ndaty magneran-tane. Misy ty mifily ty hinogne kindraike naho fa miarake amy ty nama’e. Misy ka ty tena tsy minogne. Ty ila’e ka ie mamo vaho izay mitofa. Ino areke ty raha rehafe ty Baiboly miomba ty finomagne toake?

1. Tsy mete vao ty minon-toake?

Tsy rarà ty Baiboly ty finomagne toake. Rehafe ty Baiboly aza fa fagnomezagne nimein’Andrianagnahare antikagne o ‘divaio sady mampifale ty fo o ndatio.’ (Salamo 104:14, 15) Rehafe’e ao ka fa nisy mpanompon’Andrianagnahare tsy nivalike ninon-toake.​—1 Timoty 5:23.

2. Ino ty torohevetse mey ty Baiboly hoahy ze mifily ty hinon-toake?

Rarà i Jehovah ty finoman-toake losotse naho ty manao mamo. (Galatianina 5:21) Mirehake ty Baiboly tie: “Ko agnisa ty ndaty mamo lava.” (Ohabolana 23:20) Tsy toko’e hinon-toake maro areke tikagne ndra itika raike avao ndra miarake ama o ndaty. Fa maro loatse ty toake inome ty ndaty raike naho fa tsy mieretseretse soa reke, tsy mahafehe ty raha rehafe’e naho ty raha atao’e ndra manjare marare. Toko’e hijanogne tsy hinogne areke tikagne naho tsy mahafehe tegna.

3. Akore ty ampisehoantikagne fa magnaja ty fanapahan-keve ty hafa miomba ty finomagne toake tika?

Ty ndaty tsikiraidraike sambe afake manapa-kevetse tie hinon-toake sa tsy hinogne. Faie naho misy manapa-kevetse hinogne, le tsy toko’e hitsara aze tikagne. Tsy toko’e hamoresé ty hafa ka tikagne naho tsy te hinogne reke. (Romanina 14:10) Ndra aleontikagne tsy minogne naho tsy mete amy ty hafa zay. (Vakio ty Romanina 14:21.) ‘Tsy ze hahasoa ty tegnantikagne avao ro hataontikagne fa ze hahasoa ty hafa.’​—Vakio ty 1 Korintianina 10:23, 24.

 ANDAO HANDINEKE TY PITSOPITSO’E

4. Hanapa-kevetse hinogne vao rehe?

Akore ty fihevera i Jesosy ty finomagne toake? Magnampe antikagne hahafantatse izay i fahagagagne voaloha’e natao’ey. Vakio ty Jaona 2:1-11, sady iharò midineke ty fagnonteneagne retoa:

• Akore ty fihevera i Jesosy ty finomagne toake naho ty ndaty minogne aze naho henteagne o fahagagagne natao’e iohoe?

• Tsy nandrara o ndatio tsy hinon-toake ty Jesosy. Akore areke ty toko’e hihevera ty Kristiana ze ndaty mifily ty hinon-toake?

Maregne fa afake minon-toake ty Kristiana raike faie va’e hisy fotoagne tsy mete ty hanoagne izay. Vakio ty Ohabolana 22:3, sady iharò midineke tie nagnino rehe ro tsy toko’e hinon-toake naho fa...

• minday tobile ndra mampiasa masìna?

• mivesatse?

• misy dokotera mandrara azo tsy hinon-toake?

• tsy vita’o ty mifehe tegna naho fa minon-toake?

• rarà o lalànao tsy hinon-toake?

• miarake amy ty ndaty nanapa-kevetse tsy hinogne sasa satria sarotse ama’e ty mifehe tegna tie taloha?

Toko’e hagnisy toake vao rehe naho fa manao mariaze ndra naho fa manao fiarahagne? Ino ty hagnampe azo hahay hanapa-kevetse? Alefaso i VIDEO oy.

Vakio ty Romanina 13:13 naho ty 1 Korintianina 10:31, 32. Isake tie vita vaky ty andinin-teny raike, le iharò midineke ty fagnonteneagne toy:

• Nagnino rehe ro handrambe fanapahan-kevetse mampifale i Jehovah naho magnorike o toro lalagne iohoe?

 5. Manao akore ty hamaro ty toake hinome’o?

Naho manapa-kevetse hinon-toake rehe, le tadidio zao: Tsy rarà i Jehovah ty finoman-toake faie misaontsy reke tie tsy mete ty minon-toake maro. Ino ty anto’e? Vakio ty Hosea 4:11, 18, sady iharò midineke ty fagnonteneagne toy:

• Ino ty va’e hiseho naho minon-toake maro ty ndaty raike?

Ino ty hagnampe antikagne tsy hinon-toake maro? Toko’e hiambane tikagne, le hagneke tie voafetra avao ty toake zakantikagne. Vakio ty Ohabolana 11:2, sady iharò midineke ty fagnonteneagne toy:

• Ino ty mahasoa tihoe fetraegne avao ty hamaro ty toake inomegne?

6. Ino ty hagnampe ty ndaty raike tsy hinon-toake maro?

 FAMINTIGNAGNE

Engà i Jehovah hinon-toake tikagne satria mahafalefale antikagne io. Faie tsy mete ty minon-toake maro naho ty manao mamo.

Fameregnagne

• Ino ty rehafe ty Baiboly miomba ty finomagne toake?

• Inogne iaby ty voka-draty ty finomagne toake maro loatse?

• Akore ty ampisehoantikagne tie magnaja ty fanapahan-keve ty hafa tika?