YOOSOMA 43
Biibiliya Onihimya Exeeni sa Owurya Eviinyu?
Olumwenku wootheene atthu aakhalana miyoonelo soovirikana voohimya sa owurya eviinyu. Atthu akina onnaasivela owurya ari ene ni apatthani aya. Masi akina khaniwurya. Nave aakhala atthu akina aniwurya mpakha ohapaliwa. Nto Biibiliya onihimya exeeni sa owurya eviinyu?
1. Niireke owurya eviinyu ti vootakhala?
Biibiliya khonihimya wira owurya eviinyu etthu yootakhala. Ohiya-vo, owo onihimya wira “evinyu enatteliha mirima saya”, enirela mpantta itthu Muluku aavanhe awe apinaatamu. (Esalimo 104:14, 15) Nave alopwana ni athiyana akina oororomeleya aniromoliwa mBiibiliyani yaaniwurya eviinyu.—1 Timootheyo 5:23.
2. Miruku xeeni Biibiliya onaavaha awe ale aniwurya eviinyu?
Yehova onihimya wira, ti vootakhala owuryexa ni ohapaliwa. (aGalasia 5:21) Nave Biibiliya onihimya wira: “Muhitthuké muloko n’anamuhapaliwa”. (Miruku 23:20) Tivonto, akhala wira munniwurya muhiwuryeke mootepana hata muri ene mekhinyu. Maana owurya mootepana onnimwiiriha mutthu ohuupuwela oratteene, ohisuwela etthu onihimya awe ni itthu onipaka awe. Ohiya-vo, owurya mootepana onnihonona okumi wa mutthu. Akhala wira khamunwerya wiikasoopa okathi muniwurya anyu ti vooloka ottharuwa owurya eviinyu.
3. Ninrowa ottittimiha sai yoothanla ya atthu akina?
Owurya eviinyu yoothanla ya mutthu mwaneene. Nto nihaaphukeleke ale anithanla owurya eviinyu moohitepana. Nave nihaakhanyereryeke atthu akina owurya eviinyu. (aRoma 14:10) Muhiwuryeke eviinyu akhala wira enimwaakumiherya mixankiho atthu akina. (Mmusome aRoma 14:21.) Hiyo ninniimananiha ‘othipelela ophavela mureerelo wa atthu akina, ohiya mureerelo ahu’.—Mmusome 1 aKorinto 10:23, 24.
MWIIXUTTE ITTHU SIKINA
Nwehe malakiheryo a mBiibiliyani anrowa wookhaliheryani akhala wira nyuwo pooti owurya eviinyu aahiiso ohiwurya, ni mwaattelo wa eviinyu munireerela anyu owurya. Nave nwehe etthu mukhanle anyu oopaka akhala wira eviinyu ennookumiheryani mixankiho.
4. Nwehe akhala wira pooti owurya eviinyu aahiiso nnaari
Yesu oonela sai owurya eviinyu? Mwiiriirya woopacerya Yesu aapanke awe, onoonikhaliherya waakhula nikoho nipanke ahu. Mmusome Yohani 2:1-11, nuumala-vo mwaakhule makoho anittharelana:
-
Mwiiriirya ola Yesu aapanke awe, onnikhaliherya sai osuwela moota Yesu oonela awe eviinyu ni atthu ale anithanla owurya eviinyu?
-
Okhala wira Yesu khohimmye wira ti vootakhala owurya eviinyu, makristau yaathokoreryeke sai ale anithanla owurya eviinyu?
Hata mukristau othanlaka owurya eviinyu, eyo khentaphulela wira okathi wootheene yoothanla eyo ti yooloka. Musome Miruku 22:3, nuumala-vo muthokorerye iponto sinittharelana wira nwehe akhala wira vannireerela owurya eviinyu:
-
Okathi munrowa anyu weettiha ekaaro aahiiso maakina maalupale.
-
Akhala wira moorupala.
-
Meetiku ooleelani wira muttharuwe owurya eviinyu.
-
Mwaahiweryeke wiiphimela mwaawuryaka eviinyu.
-
Akhala wira malamulo khaniweemereryani owurya eviinyu.
-
Akhala wira muri ni mutthu onithanla ohiwurya eviinyu mwaha woowi khalai eviinyu yootoko omukumiherya mixankiho.
Niireke pooti okhala eviinyu nihiku na efesta anyu ya ekasamento, aahiiso okathi munitthekula anyu ni atthu akina? Etthu xeeni enrowa wookhaliheryani opaka yoothanla yooloka?, Nwehe EVIIDIYU.
Mmusome aRoma 13:13 ni 1 aKorinto 10:31, 32. Nuumala osoma khula yoolepa mwaakhule nikoho ninttharelana:
-
Weettela malakiheryo ala anrowa wookhaliheryani sai opaka yoothanla enimusivela Yehova?
Owurya eviinyu yoothanla ya mutthu mwaneene. Woonasa wene mukristau pooti othanla owurya eviinyu okathi omosa masi okathi mukina ohinaphavela owurya eviinyu
5. Musuweleke mwaattelo wa eviinyu munireerela anyu owurya
Akhala wira munnithanla owurya eviinyu, muhikhalakhale muliyalaka ela: Yehova khonikhoottiha owurya eviinyu, masi owo onnikhoottiha owuryexa aahiiso ohapaliwa. Mwaha wa xeeni? Mmusome Hoseya 4:11, 18, nuumala-vo mwaakhule nikoho ninttharelana:
-
Etthu xeeni enrowa wiiraneya akhala wira mutthu onniwurya vanceene?
Etthu xeeni enrowa wookhaliheryani ohiwurya vanceene? Muhaana okhala mutthu oowiihiiha, niire so, osuwela itthu muhiniwerya anyu. Musome Miruku 11:2, nuumala-vo mwaakhule nikoho ninttharelana:
-
Xeeni vari aya vooloka osuwela mwaattelo wa eviinyu munireerela anyu owurya?
6. Etthu xeeni enrowa wookhaliheryani ohiya owurya vanceene ni ohapaliwa?
Nwehe etthu yaamukhalihenrye mulopwana mmosa ottharuwa owurya eviinyu. Nwehe EVIIDIYU, nuumala-vo mwaakhule makoho.
-
Eviidiyu niwenhe ahu, nuumala Dmitry ohapaliwa aakhala sai?
-
Niireke aahiwerya ottharuwa owurya eviinyu ekwaha yoopacerya eerenrye awe?
-
Etthu xeeni yaamukhalihenrye ottharuwa?
Mmusome 1 aKorinto 6:10, 11, nuumala-vo mwaakhule makoho anittharelana:
-
Niireke ohapaliwa etampi yuulupale?
-
Etthu xeeni enooniherya wira mutthu onihapaliwa onoowerya ottharuwa?
Mmusome Matheyo 5:30, nuumala-vo mwaakhule nikoho ninttharelana:
-
Nlikanyiho Yesu aapanke awe na wiikittha ntata, owo khaaphavela ohimya wira nihaana wiivulaliha wira nimusiveliheke Yehova. Nto etthu xeeni mukhanle anyu oopaka akhala wira muniphavela ottharuwa owurya eviinyu? a
Mmusome1 aKorinto 15:33, nuumala-vo mwaakhule nikoho ninttharelana:
-
Niireke weetta ni anamuhapaliwa pooti onihapuxa?
ATTHU AKINA POOTI WOOKOHANI WIRA: “Niireke owurya eviinyu etthu yootakhala?”
-
Mwaarowa owaakhula sai?
IPONTO SUULUPALE
Eviinyu eniirela mpantta itthu Yehova onivanhe awe. Masi owo khoniphavela wira niwuryeke vanceene aahiiso ohapaliwa.
Wuuluula
-
Biibiliya onihimya exeeni sa owurya eviinyu?
-
Mixankiho xeeni sinaaphwanya atthu aniwurya eviinyu vanceene aahiiso anihapaliwa?
-
Ninrowa owerya sai ottittimiha yoothanla ya atthu akina?
NWEHE ITTHU SIKINA
Amiravo anrowa owerya sai opaka yoothanla yooloka akhala wira pooti owurya eviinyu wala nnaari?
Nwehe itthu mukhanle anyu oopaka wira nwerye ohiya owurya eviinyu.
Niireke makristau pooti omaniha ikoopho okathi aniwurya aya eviinyu?
“Makoho anikohiwa ni Ale Anisoma Irevista Sahu” (Owehaweha, 15 a Feverero, 2007)
Nwehe yowiiraneya eni: “Miyo Kaari Nttonka Noothaala” wira moone etthu yaamukhalihenrye mulopwana mmosa ohiya owurya vanceene.
“Biibiliya Onnirukunuxa Mirima sa Atthu” (Owehaweha, 1 a Maio, 2012)
a Atthu ale aniimananiha ohiya owurya eviinyu ahinawerya, ahaana okhaliheriwa ni mameetiku. Maana mameetiku manceene anihimya wira atthu awo ahaana ottharuwa moomalela owurya eviinyu.
