Ha bug-os nga kalibotan, iba-iba an opinyon han mga tawo mahitungod han makahurubog nga irimnon. An iba nag-i-enjoy pag-inom ha panapanahon kaupod han ira kasangkayan. An iba naman nagdesisyon nga diri gud uminom. May iba liwat nga nainom tubtob nga mahubog. Ano an ginsisiring han Biblia mahitungod han makahurubog nga irimnon?

1. Sayop ba an pag-inom hin makahurubog nga irimnon?

An Biblia waray magsiring nga sayop an pag-inom hin makahurubog nga irimnon. Ha kabaliktaran, han naghisgot ito hin damu nga mag-opay nga butang nga iginhatag han Dios ha aton, igin-upod hito an “bino nga nakakapalipay ha kasingkasing han tawo.” (Salmo 104:​14, 15) May pipira nga matinumanon nga kalalakin-an ngan kababayin-an nga ginhisgotan ha Biblia nga uminom hin makahurubog nga irimnon.​—1 Timoteo 5:23.

2. Ano nga sagdon an iginhatag han Biblia ha mga nainom?

Diri gin-uuyonan ni Jehova an sobra nga pag-ininom ngan paghubog. (Galacia 5:21) An iya Pulong nasiring: “Diri ka unta magin usa han mga nainom hin sobra kadamu nga bino.” (Proberbios 23:20) Salit kon nainom kita​—bisan ha pribado​—kinahanglan diri kita uminom hin sobra nga tungod hito diri na kita makakahunahuna hin maopay, diri na naton makukontrol an aton panyakan ngan panggios, o madadaot na an aton kahimsog. Kon diri naton nakukontrol an kadamu han aton gin-iinom, mas maopay nga diri na la kita uminom.

3. Paonan-o naton rirespetuhon an desisyon han iba may kalabotan han makahurubog nga irimnon?

An kada tagsa an magdidesisyon kon mainom hiya hin makahurubog nga irimnon o diri. Kinahanglan diri naton hukman an usa nga nainom hin kasadangan, ngan diri naton angay piriton an usa nga nadiri pag-inom. (Roma 14:10) Diri kita nainom kon magigin hinungdan ito nga magkakaproblema an iba. (Basaha an Roma 14:21.) Nangangalimbasog kita nga hunahunaon ‘diri an aton kalugaringon nga kaopayan, kondi an kaopayan han iba nga tawo.’​—Basaha an 1 Corinto 10:​23, 24.

 DUGANG NGA USISAHA

4. Pagdesisyon kon mainom ka o diri

Ano an panhunahuna ni Jesus ha pag-inom hin makahurubog nga irimnon? Basi hibaroan an baton, usisaha an siyahan nga milagro nga iya ginhimo. Basaha an Juan 2:​1-11, katapos, hisguti niyo ini nga mga pakiana:

• Hini nga milagro, ano an aton mahibabaroan mahitungod ha panhunahuna ni Jesus ha makahurubog nga irimnon ngan ha mga nainom hito?

• Tungod kay waray igdiri ni Jesus an pag-inom hin makahurubog nga irimnon, ano an angay nga magin panhunahuna han usa nga Kristiano ha nainom hito?

Pero bisan kon an usa nga Kristiano puydi uminom hin makahurubog nga irimnon, diri ito nagpapasabot nga pirme maaramon an pagbuhat hito. Basaha an Proberbios 22:​3, katapos, usisaha kon paonan-o an masunod nga mga kahimtang mahimo makaapekto ha imo desisyon kon mainom ka o diri:

• Magdadrayb ka o magamit hin makinarya.

• Burod ka.

• An doktor nagsiring ha imo nga diri uminom hin makahurubog nga irimnon.

• Nakukurian ka nga kontrolon an kadamu han imo gin-iinom.

• Igindidiri han balaud an pag-inom hin makahurubog nga irimnon.

• May kaupod ka nga nagdesisyon nga diri uminom, tungod kay hadto problema niya an pagkontrol ha pag-inom.

Angay ka ba magserbi hin makahurubog nga irimnon ha resepsyon han kasal o ha iba pa nga pagturotarampo? Basi mahibaroan kon ano an makakabulig ha imo ha pagdesisyon, i-play an VIDEO.

Basaha an Roma 13:13 ngan 1 Corinto 10:​31, 32. Katapos basahon an tagsa nga teksto, hisguti niyo ini nga pakiana:

• Paonan-o an pag-aplikar hini nga prinsipyo makakabulig ha imo nga makahimo hin desisyon nga makakapalipay kan Jehova?

 5. Pagdesisyon kon ano kadamu an imo iimnon

Kon nagdesisyon ka nga uminom hin makahurubog nga irimnon, hinumdumi ini: Bisan kon diri gindidiri ni Jehova an pag-inom hin makahurubog nga irimnon, pero nagsiring hiya nga sayop an sobra nga pag-inom. Kay ano? Basaha an Hosea 4:​11, 18, katapos, hisguti niyo ini nga pakiana:

• Ano an mahitatabo kon an tawo nainom hin sobra?

Paonan-o naton malilikyan an sobra nga pag-ininom? Kinahanglan maaram kita han aton mga limitasyon. Basaha an Proberbios 11:​2, katapos, hisguti niyo ini nga pakiana:

• Kay ano nga maopay nga magkaada espisipiko nga limitasyon han imo iimnon?

6. Kon ano an makakabulig ha usa nga iundang an sobra nga pag-ininom

 SUMARYO

Ginhatag ni Jehova an makahurubog nga irimnon para malipay kita pero diri niya gin-uuyonan an sobra nga pag-inom ngan paghubog.

Repaso

• Ano an ginsisiring han Biblia mahitungod ha makahurubog nga irimnon?

• Ano an mga peligro han sobra nga pag-inom?

• Paonan-o naton rirespetuhon an desisyon han iba may kalabotan ha pag-inom?