WIRIKAPAI 43
Gini Bipai si Aida AKristano du na ni Tipa Buda?
Rogo zegino dunduko, aboro na aberãpai ni bakiakia tipa buda. Bete aboro nasia ka mbirabuda ti kura aregbo ho i adunguratiyo ni kurogo ba sa na abakureayo. Agu akurayo nasia ka zanga mbiraha. Ono agu akurayo ti gayo i nambiraha si ki da ti gupai nga i kpihe. Ga Baibiri bipai nga gine tipa buda?
1. Ya mo gbegberẽ pai du nga ka mbira buda?
Baibiri asoganga mbirabuda te. Kuba gure, ho Baibiri atangara gu dungu agamahe ni Mbori afuhe furani, si nafura tipa ‘ime bakakue si ngiisi kpoto boro yo.’ (Atambuahe 104:14, 15) Bete ruru akumba na adee du payo rogo Baibiri yo aima mbirabuda.—1 Timoteo 5:23.
2. Gini arugute Baibiri afuhe fu agu aboro sia ka mbira buda?
Yekova aidanga bakere mbirabuda gbiati kpibuda te. (AGaratio 5:21) Fugo Ko nape gupai nga: ‘Ka mo dú nga dagba abambiri imekakue yo ya.’ (Asanza 23:20) Sidu ka ani sia ka mbirabuda—zavura ho du ani ni nisarani—si aidanga ani mbiribuda si ki da ti gu bangiriba nga ka ani berẽnga wenengai te, ka ani bandanga gaani afugo na mangapai te, watadu ka ani bandanga kpotorani si du wenengai te te. Ka si du nga ani arengbanga ka banda pa bakio wai ani ambirabuda te, si naida ani du na nyemu ka mbu mbiraha kusayo.
3. Wai du rengbe ani ka du na irisa tipa agu adiaberã nga ga kura aboro nibipa buda?
Boro na boro si aida nimangi siapai singia ni naida ka mbirabuda. Si aidanga ani sapungbanga gu boro sia ka mbirabuda rengbe arengba te, na si aidanga ani sosodi gu boro a aidanga ka mbiraha ya te. (ARomo 14:10) Ani nasia ka zanga mbirabuda ho gaani mbirabuda aye ni na kpakarapai fu kura aboro. (Mo gedi ARomo 14:21.) Ani agbatanga ‘[gaani] he te, ono gu ngba fu kuarani.’—Mo gedi 1 AKorindo 10:23, 24.
MO WIRIKI KURA DUNGU APAI
Mo bingo gu bangua rengo nga ga Baibiri nga gu rengbe ka undo ro mo diberã singia mo naida ka mbirabuda gbiati bakio wai si ada mo mbirihe ka mo diberã ka mbiraha. Mo bingo gupai rengbe mo ka mangaha a ka sidu nga mo nasota na gu kpakarapai nga ga mbirabuda.
4. Mo diberã singia mo ambirabuda
Gini bipai Yesu adu na ni tipa mbirabuda? Tipa ka gbia karagapai, mo bingo gu bambata iiriwopai Yesu amangihe. Mo gedi Yoane 2:1-11, na tifuoho, mo ki sakipai tipa agi asanahe re:
-
Ringbisihe kuti gi iiriwopai re, ginipai rengbe ani ka wirikaha tipa ga Yesu bipai tipa buda, na agu aboro nambiraha?
-
Wadu he nga Yesu aazanga he ti mbirabuda te, wai du si aida Kristano bi gu boro sia ka mbira ha?
Ono tie, mbiko gupai nga Kristano na ranirii be ni ka mbirabuda, gipai re ayugongo gupai nga si ni patatamana fu ni ti aregbo dũ kaa mbirabuda te. Mo gedi Asanza 22:3, na ki bingoho singia agi apai du kusende re na maapai kuriro ka si du nga mo nika mbirabuda:
-
Mo nandu ka gbe tarambiri watadu mo nandu ka mangasunge na masini.
-
Mo na vuse.
-
Munganga ima za ro nga ka mo mbiringa buda ya.
-
Mo na kpakarapai tipa ka banda bakio wai mo ambiraha.
-
Ndiko aidanga ha foro mo mbiribuda te.
-
Mo na gu boro sia ka zanga mbiraha mbiko gupai nga ni aima du na kpakarapai ka banda bakio wai ni aambira ha mbata kusayo.
Ya mo si naida mo mangisunge na buda ti regbo pumbo rogatise watadu agu adunguratise nga ga zambuasitise? Tipa ka bi gupai rengbe ka undo ro mo diberã, mo bi gu VIDIO re.
Mo gedi ARomo 13:13 na 1 AKorindo 10:31, 32. Tifuo mo gedi averesi ni basasa, mo sakipai tipa gi sanahe re:
-
Waigu rengbe mangasunge na bangua arengo nga ga Baibiri ka undo ro mo mangi gupai nika sa ngbarago ti Yekova?
Ai Kristano si aida ni diberã tipa ti ni singia ka mbirabuda watadu ka zanga mbiraha. Ka si vura du nga ni nambira buda ambira ti kura aregbo ni ima rengba ka sia ka zanga mbiraha ti kura aregbo
5. Mo diberã tipa bakio wai mo nika mbirabuda
Ka mo sia ka mbirabuda, mo tingidi gipai re: Wa vura duhe nga Yekova azangahe ti mbirabuda te, ko ima zahe ti kpibuda. Tipagine? Mo gedi Osea 4:11, 18, na tifuoho, mo ki sakipai tipa gi sanahe re:
-
Ginipai rengbe ka manga ka boro mbiribuda ni bakerehe gbe?
Waigu rengbe ani ka ne mbirabuda ni bakerehe gbe? Si naida ani du na rubangirise na ki ini bakio wai si aida ani mbiribuda. Mo gedi Asanza 11:2, na tifuoho, mo ki sakipai tipa gi sanahe re:
-
Tipagine du he ti ni ni wene berãpai ka ino bakio wai si aida mo mbiribuda?
6. Gupai rengbe ka undo boro ni mbu bakere mbirabuda
Mo bingo gupai naundo kura kumba sa ko mbu bakere mbirabuda. Mo bi gu VIDIO re, na tifuoho, mo ki sakipai tipa agu asanahe ngbefuoho.
-
Rogo gu vidio re, wai buda adu na maapai kuri ga Dmitry mangapai?
-
Ya mo ko arengbe ka mbu mbirabuda ni basa?
-
Niyangaraha, waigu ko arengbe ka mbu bakere mbirabuda?
Mo gedi 1 AKorindo 6:10, 11, na tifuoho, mo ki sakipai tipa agi asanahe re:
-
Waigu du kpibuda ni kere nyanyakipai?
-
Ginipai nayugo gupai nga gu boro nambira buda gbegberẽ ima rengba ka manga ariapai?
Mo gedi Matayo 5:30, na tifuoho, mo ki sakipai tipa gi sanahe re:
-
Ho Yesu amangisunge ni na gu kpiapai nga ga yera bee kusayo, gupai ko aaida ka pehe nga, si nika ida aida ani mbupa gu kura apai tipa ka sa ngbarago ti Yekova. Ginipai rengbe mo ka mangaha ka mo aasota ka diabe gbegberẽ mbirabuda? a
Mo gedi 1 AKorindo 15:33, na tifuoho, mo ki sakipai tipa gi sanahe re:
-
Gini maapai kurii rengbe abakureamo ka du na ni kuriipa bakio gu buda mo ambiraha?
KURA BORO RENGBE KA SANAHE NGA: “Ya mo gberẽ mbirabuda agberã?”
-
Waigu rengbe mo ka fu karagapai?
GINIPAI MO NAWIRIKIHE?
Yekova afu buda tipa ani gbia ngbarago ti ni, ono ko ima zahe ti bakere mbirabuda na kpibuda.
Fugöpai
-
Ga Baibiri bipai nga gini tipa buda?
-
Gini akpakarapai du ho ti bakere mbirabuda?
-
Waigu rengbe ani ka irisa agu adiaberã kura aboro amangaha nibipa mbirabuda?
MO WETEKE GU KURA APAI
Waigu rengbe paranga agude ka manga wene asiapai tipa mbirabuda?
Mo ini agu adiandue rengbe mo ka mangaha tipa ka diabe gu kpakarapai nga ga mbirabuda.
“Oni Duna Wene Bipai Tipa Buda” (Ngbaõbambu Sinziri, Ngi 1, 2010)
Ya mo si naida aKristano mangi gupai nga ga fõ ngba inga ti kuraha?
Rogo gu pangbanga du riihe nga “Mi Angia Kere Bambiri Buda,” mo bingo wai kumba sa adibe bakere mbirabuda.
“Ziazia Kekeapai Rengbe Arengba Ka Aria Gaoni Raka” (Ngbaõbambu Sinziri, Merekoko 1, 2012)
a Agu aboro mbirabuda naima zio baha tiyo ima rengba ka ida na gu kura undo be amunganga. Dungu amunganga pe gupai ga agu aboro du na kpakarapai nibipa mbirabuda, si aidanga i mbiribuda berewe te.
