KALANSEN 44

Yala seliw bɛɛ ko ka di Ala ye wa?

A BILA A LA

Jehova b’a fɛ an ka ɲɛnamaya diyabɔ ani hali yɛrɛ ka seliw kɛ tuma dɔw la. Nka yala seliw bɛɛ ko ka di a ye wa? An bɛ se ka an ka kanuya jira Jehova la seliw ta fan fɛ cogo di?

1. Mun na seli caman ko man di Jehova ye?

A bɛ se ka bala i la k’a dɔn ko seli caman sinsinnen tɛ Bibulu kalansiraw kan walima ko u bɛ bɔ josɔnnaw de fɛ. O seliw sirilen bɛ se ka kɛ diinɛ nkalonmaw la. Jɛɲɔgɔnya bɛ se ka kɛ u ni Sitanɛko cɛ walima u sinsinnen bɛ se ka kɛ hakilina kan min ye ko ni tɛ sa. Seli dɔw ju bɔra dannako kunntanw walima dannakow la minnu sinsinnen bɛ garisɛgɛko kan. Jehova bɛ a batobagaw lasɔmi ko: “A’ ye bɔ u cɛma ka fara u la. Aw kana maga fɛn saniyabali si la.”—2 Kɔrɛntekaw 6:17. a

2. Jehova bɛ mun miiri seliw ko la minnu bɛ nɔɔrɔ da Hadamadenw kan k’a dama tɛmɛn?

Jehova ye an lasɔmi ko an kana bin jan kɔnɔ min ye ka an “jigi da Hadamaden kan”. (Jeremi 17:5 kalan.) Seli dɔw bɛ nɔɔrɔ da ɲɛmɔgɔw walima sɔrɔdasiw kan. Mɔgɔ dɔw bɛ jamana taamashyɛnw walima yɛrɛmahɔrɔnya seliw kɛ. (1 Yuhana 5:21) Mɔgɔ dɔw bɛ politikikow walima jama kunkow seliw kɛ. Jehova bɛna mun miiri ni an bɛ nɔɔrɔ da mɔgɔ dɔ walima jɛkulu dɔ kan fo k’a dama tɛmɛn, kɛrɛnkɛrɛnnenya la mɔgɔ min walima jɛkulu min bɛ hakilinaw sankɔrɔta minnu ni ale Jehova sagonata tɛ kelen ye?

3. Wale jumɛnw b’a to sɔn tɛ kɛ seli dɔw ma?

Bibulu b’a fɔ ko “dɔlɔtɔya ni dumuni ni minni dama tɛmɛnnenw” kana kɛ. (1 Piɛrɛ 4:3) Seli dɔw bɛ dusu don mɔgɔw kɔnɔ u ka yɛrɛminɛbaliya walew ani jɛnɛya walew kɛ. Walasa an ni Jehova ka teriya ka to sen na, fo an ka an cɛ janya o jogo nɔgɔlen suguw la.

DƆ FARA I KA DƆNNIYA KAN

An k’a lajɛ i ko bɛ se ka diya Jehova ye cogo min na i kɛtɔ ka latigɛli ɲumanw kɛ seliw ko la.

4. Seli minnu tɛ nɔɔrɔ da Jehova kan, ban olu ma

Efesekaw 5:10 kalan, o kɔ aw ka baro kɛ nin ɲininkaliw kan:

An ka kan ka mun de jateminɛ fɔlɔ sani an k’a latigɛ ni an bɛ an sen don seli dɔ la walima ni an tɛ an sen don a la?
Seli jumɛnw de bɛ kɛ aw ka yɔrɔ la?
Yala e hakili la, o seliw ko ka di Jehova ye wa?

Misali la, Ala bɛ min miiri wolodon sanyɛlɛma seliw ko la, yala i delila ka i yɛrɛ ɲininka o la wa? Bibulu ma deli k’a fɔ abada ko Jehova batobaga dɔ ye wolodon sanyɛlɛma seli kɛ, nka a bɛ wolodon sanyɛlɛma seli fila kofɔ, mɔgɔ minnu ye o seliw kɛ, olu tun tɛ Jehova batobagaw ye. Jenɛse 40:20-22 ani Matiyu 14:6-10 kalan. O kɔ aw ka baro kɛ nin ɲininkaliw kan:

Jɛɲɔgɔnya jumɛn de bɛ nin wolodon sanyɛlɛma seli fila ni ɲɔgɔn cɛ?
Ka kɛɲɛ ni nin Bibulu maanaw ye, e hakili la, Jehova bɛ mun de miiri wolodon sanyɛlɛma seliw ko la?

O bɛɛ n’a ta, i bɛ se ka i yɛrɛ ɲininka ko: ‘Ni ne ye n’sen don wolodon sanyɛlɛma seli kɛli la walima seli wɛrɛ la min sinsinnen tɛ Bibulu kalansiraw kan, yala Jehova b’a mago don o la tiɲɛ yɛrɛ la wa?’ Ekisode 32:1-8 kalan. O kɔ, a’ye WIDEYO lajɛ ani ka baro kɛ nin ɲininkaliw kan:

WIDEYO: Seli minnu ko man di Ala ye (5:07)

Ala bɛ sɔn fɛn min ma, mun na an ka kan ka o sɛgɛsɛgɛ?
An bɛ se ka o kɛ cogo di?

An bɛ se k’a dɔn cogo min na ni seli dɔ ko man di Ala ye

Yala a sinsinnen tɛ Bibulu kalansiraw kan wa? Walasa ka o dɔn, i ka a bɔyɔrɔw sɛgɛsɛgɛ.
Yala a bɛ nɔɔrɔ da Hadamadenw, jɛkuluw walima jamana taamashyɛnw kan k’a dama tɛmɛn wa? An bɛ nɔɔrɔ da Jehova de kan ka tɛmɛn fɛn bɛɛ kan ani an bɛ an jigi da ale de kan, a ka diɲɛ gɛlɛyaw ɲɛnabɔ.
Laadaw ani kɛwale minnu bɛ kɛ a kɔnɔna na, yala olu bɛ Bibulu sariyakolow sɔsɔ wa? An saniyalen ka kan ka to jogo ta fan fɛ.

5. Mɔgɔ tɔw dɛmɛ u ka bonya da i ka dannayakow kan

Ni mɔgɔw bɛ ka i lasu i ka i sen don seliw la minnu ko man di Jehova ye, a bɛ se ka gɛlɛya i ma ka ban o ma. I ka latigɛliw ɲɛfɔ muɲu ani bonya kɔnɔna na. Walasa ka o kɛcogo misali dɔ ye, a’ye WIDEYO lajɛ.

WIDEYO: I ka dannayakow ɲɛfɔ bonya kɔnɔna na (2:01)

Matiyu 7:12 kalan, o kɔ aw ka baro kɛ nin ɲininkaliw kan:

Ka kɛɲɛ ni nin tɛmɛsira ye, yala i ka kan k’a fɔ i somɔgɔ dannabaliw ye ko u man kan ka seli dɔ kɛ wa?
I bɛ se ka mun kɛ walasa ka i somɔgɔw hakili latigɛ, u k’a dɔn ko hali ni i tɛna seliw kɛ ni u ye, i bɛ u kanu ani ko u ko ka bon i bolo?

6. Jehova b’a fɛ an ka nisɔndiya

Jehova b’a fɛ an ka waati dumanw kɛ ni an ka denbaya kɔnɔmɔgɔw ani an teriw ye. Waajulikɛla 8:15 kalan, o kɔ aw ka baro kɛ nin ɲininkali kan:

Nin tɛmɛnsira b’a jira cogo di ko Jehova b’a fɛ an ka nisɔndiya?

Jehova b’a fɛ a ka mɔgɔw ka to k’u ɲɛnajɛ ani ka waati dumanw kɛ ɲɔgɔn fɛ. A’ye WIDEYO lajɛ walasa k’a ye o kɛra cogo min na an ka jamanaw ni ɲɔgɔn cɛ jamalajɛbaw la.

WIDEYO: Dunanw ladonni jamanaw ni ɲɔgɔn cɛ jamalajɛbaw la (5:40)

Galasikaw 6:10 kalan, o kɔ aw ka baro kɛ nin ɲininkaliw kan:

Mɔgɔw bɛ seli minnu kɛ, yala an ka kan ka olu de kɛ walasa ka “ko ɲuman kɛ” mɔgɔ tɔw ye wa?
Nili sugu jumɛn de bɛ nisɔndiya lase i ma: Ni i ye nili kɛ jagoya la seli kosɔn walima ni i ye nili kɛ bawo i b’a fɛ ka o kɛ?
Tuma dɔw la, Jehova Seere caman bɛ fɛn kɛrɛnkɛrɛnnen labɛn u denw ye ani hali yɛrɛ u bɛ nilifɛnw di u ma ka bala u la. Ni denw bɛ i bolo, i bɛ se ka fɛn kɛrɛnkɛrɛnnen jumɛnw de kɛ u ye?

MƆGƆ DƆW B’A FƆ KO: “Baasiba tɛ seli ju bɔyɔrɔ la. Min nafa ka bon, o ye ka waati duman kɛ ni i somɔgɔw ani i teriw ye.”

I bɛna mun de fɔ ka o tigilamɔgɔw jaabi?

BAKURUBAFƆLI

Jehova b’a fɛ an ka waati dumanw kɛ ni an ka denbaya kɔnɔmɔgɔw ani an teriw ye. Nka a fana b’a fɛ an ka an yɛrɛ tanga seliw ma minnu ko man di a ye.

Seginnkanni

An bɛ se ka ɲininkali jumɛnw de kɛ walasa k’a dɔn ni seli dɔ ko ka di Jehova ye walima n’a ko man di a ye?
An bɛ se ka an somɔgɔw ani an teriw dɛmɛ cogo di u ka an ka latigɛliw faamu, an ye minnu kɛ seliw ko la?
I b’a dɔn cogo di ko Jehova b’a fɛ an ka nisɔndiya ani ka an ɲɛnajɛ?

Kalansen banna don min na:

A ɲini ka nin kɛ

I ye fɛn minnu kalan nin kalansen in kɔnɔ baara kɛ ni olu ye ka seliw kow sɛgɛsɛgɛ minnu bɛ kɛ aw ka yɔrɔ la.

Fɛn wɛrɛ:

Your other goal