Jɛhova mɔ́ ɓɛ́ à ké fɛ̀ɛ̀ múàùn dyi kpáìn, kè ɓɛ́ à ké hwɔ pa tiɔ̀ ɖíɛ́ ɓè ɓaɖa. Kɛɛ, hwɔ-pa-pa séín kè fɔ̀-wè séín dè ɔ hwòɖò dyiì? Xwɛ̀ à ɓɛ́ìn à ɖɛ̀ɓɛ̀ìn-ɖɛ̀ɓɛ̀ìn ɓó Jɛhova bììɛɛ tɛ̀mɛ̀ìn ɖé ɖɛ nìà kɛ múɛ́?

1. Xwíníínɔ̀ nyɛ́ kɔ̃̀ jè hwɔ-pa-pa pàɖà ɓè seà Jɛhova hwìɖìi dè kɛ́?

Ɔ jù ké m̀ dyiɛ cɛ̃́ kà hwɔ-pa-pa pàɖà ɓè kè Baɓoɔ tɛ̀mɛ̀ìn-ɖɛ̀ ɓè se gbo muìn nyɛ ní, ɔ mu dyɛ̀ m̀ dyi giniìn. Hwɔ-pa-pa nì kà ɓèa ɓɛ́ìn ɓiè-kpòò ɓè seà jàà kɛɛ mú sɔ̀ɛ̀n. Wa ɓɛ́ìn hwĩɔ̀-nyu-nyu dyí ɓáa, mɔɔ wa ɓɛ́ìn ɖɛ ɓɛ́ nyɔ ɓè poà jàà kà ɓɛ́ nyɔ ɖò dyi mɛ́ín ɔ cĩ́ dà kà kò ɖò kánáá pu kɛɛ dyí ɓáa. Hwɔ-pa-pa ɖíɛ́ ɓè sɔ̀ìn se ɓè ɓɛ́ nyɔ ɓè po jàà kɛ mɔɔ mana sɔ̀ìn geɖepɔɔ ɓè gboɛɛ jè jàà-po-po mú. (Àzédyà 65:11) Jɛhova po ɔ nyɔ ɓèɔ̀ náún, ké ɔ ɖá: “Ɓè mɛ sɔ̀ ɖé wa hwìɛ̀, ɓɛ́ ɓè kè wa ké gbo zaìn. Ɓèìn ɖá ɓɛ́ ɓè ké se-mú-hwɛ̀-ɖɛ̀ ɓèɔ̀ ɖò dyi tìnììn.”—2 Kɔ̀ɖéíntĩ̀ɔ̀ 6:17. a

2. Xwɛ̀ Jɛhova hwòɖò nyu nìɛ̀ ɓá hwɔ-pa-pa ɓè ɓɛ́ wa dè nyɔùn-dyù dya mìɔ kɛɛ jè dyíɛ́?

Jɛhova po à náún kà à mɛ ɓɔ́ nyɔ ɓè ɓɛ́ wa “dè nyɔùn-dyùɛ̀ kpé hwòɖò” kɔ̃ɛɛ jù kɛ. (Zà Jɛ̀ɖèmádyà 17:5 wuɖuún.) Fɔ̀-wè ɖíɛ́ ɓè dè nyɔ-nàìn-nyɔ̀ ɓè mɔɔ sójà ɓè dya. Wa tɔ̀ɔ̀ ɓè mɔ̀ ɓóɖó ɖòɛ̀ pídyi-kpá-wè. (1 Jɔ̃́ɔ́ 5:21) Ké wa tɔ̀ɔ̀ ɓè dè gɔ̀mànà-kpòò ɓè mɔɔ kpoo tɔ̀ɔ̀ ɓè dya. Xwɛ̀ Jɛhova hwòɖò mu nììn ɔ jù ké à dyi nyɔ ɓè mɔɔ kpoo ɓè dya dè mìɔ níɛ́, hwɛ̀ ḿ po níiń wa nyɔ ɓè kɔ̃̀ fɔ̀nɔ̀-hwòɖò ɓè kè Geɖepɔɔ hwòɖòɛ̀-gbɔ-po-ɖɛ̀ seà gbo muìn fɔɔ kɛ́?

3. Ðɛ́ mɔ̀ kpeɖe ɓè ɓɛ́ wa ɓɛ́ìn nyuɛ ɓɛ́ hwɔ-pa-pa ɓè ké ɖɛ gbà jù kɛ́?

Baɓoɔ ɖá, “nɔmɔɔ pàɖà ná-ná kè hwɔ-pa-pa ɔ kè nɔmɔɔ ná-ná ti séín” mɔ̀ ɖɛ gbà. (1 Píɖɛ̀ 4:3, NWT) Nyɔ ɓè ní kpɔ̃ wa mìɔùn dyí, ké wa nyu kpeɖe gbà ɓè ɖé hwɔ ɖíɛ́ ɓè pa-pa mú. Ɓɛ́ à ké Jɛhova ɓàto jù kánáá pu ní, à kɔ̃̀ à ké se-mú-hwɛ̀-kpèɖè ɓèa dyí ɓàɖàìn.

 ÐE ÐƐ MÚIN CÁ

 5. Kpá nyɔ tɔ̀ɔ̀ ɓè gbo, ɓɛ́ wa ké nì jàà-po-ɖɛ̀ ɓèɔ̀ kpéín dyé

6. Jɛhova mɔ́ ɓɛ́ à ké múàùn kpá

Jɛhova mɔ́ ɓɛ́ à kè à xwéɖé-dùɔ̀ kè à ɓàto ɓè ké múà nyu. Zà Ìkíɖísìásì 8:15 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ vɔ̀sì nìà kɛ nyuɛ tɛ̀mɛ̀ìn kà Jɛhova mɔ́ ɓɛ́ à ké múàùn kpá kɛ́?

Jɛhova mɔ́ ɓɛ́ ɔ nyɔ ɓèɔ̀ ké péé nyu, kè ɓɛ́ wa ké múà nyu ɔ jù ké wa dyi dyí poìn ní. Po VÍÐÒƆ̀ kũ̀à gbo ɓɛ́ m̀ ké kà ɖɛ nìà kɛ nyu wáɖáá nìɛ̀ ɖé à Kɔ̃̀vɛ̃́sĩ̀ɔ̀ vɛ̀nɛ̀ ɓèɔ̀ kɔ̃ɛɛ dyé.

Zà Gàɖézìà 6:10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• À ɓéɖé ɓɛ́ à ké fɔ̀-wè-hwɔ̀ ɓè pa hwɛ̀ à ké nyɔ tɔ̀ɔ̀ bìì “nɔ̀mɔ̀ dyíin” nyuù?

• Nyɔ-ɖɛ-nyí-nyíɔ̀ nyɛ́ mu m̀ múàùn poùn mìɔ kɛ́? Ɔ mɔ̀ nyɔ-ɖɛ-nyí-nyí fɔ̀-wè ɖò kɔ̃ wɛ̃́ɛ́ɛ̀ mɔɔ nyɔ-ɖɛ-nyí-nyí ti séín ɖò m̀ mɔ́ɔ nyuɛ dyiɛɛ̀?

• Jɛhova Zàse pàɖà ɓè po ɖɛ kpa ɖɛ ɓè páún ɓó waà dyú ɓè bìì, ké wa nyí wa nyíí-ɖɛ̀ ɓè ti ɖíɛ́ ɓè ɓaɖa. Ɔ jù ké m̀ dyi dyú ɓéɖéín, ɖɛ́ mɔ̀ ɖɛ kpa ɖɛ ɖíɛ́ ɓè m̀ ɓɛ́ìn nyuɛ ɓó wa bììɛ́?

 SṸÌN-XWÍNÍÍN

Jɛhova mɔ́ ɓɛ́ à kè à xwéɖé-dùɔ̀ kè à ɓàto ɓè ké múà nyu. Kɛɛ, ɔ mɔ́ ɓɛ́ à ké hwɔ-pa-pa ɓè se ɔ hwìɖìi dèɛɛ dyí ɓàɖàìn ɖekè.

Ðɛ-kɔ̃in-kpa-kpa

• Ðɛ́ mɔ̀ dyi-diè-ɖɛ̀ ɓè ɓɛ́ à ɓɛ́ìn dyi dièɛ̀ ɓɛ́ à kéɛ dyí dyuò kɛbì hwɔ-pa-pa ɖò dè Jɛhova hwìɖìi níɛ́?

• Xwɛ̀ à ɓɛ́ìn à xwéɖé-dùɔ̀ kè à ɓàto ɓè gbo kpáa, ɓɛ́ wa ké à gbɔ-po-ɖɛ̀ ɓè ɓá fɔ̀-wè ɓè jè dyíɛɛ múin wɔ̃́ kɛ́?

• Xwɛ̀ m̀ nyuɛ dyí dyuòɛ̀ kà Jɛhova mɔ́ ɓɛ́ à ké múàùn kpá, kè ɓɛ́ à ké múà nyu kɛ́?