ISHOMO RYA 44
Mbehi ebiro bikuru byona nibishemeza Ruhanga?
Yehova nayenda ngu tushemerererwe amagara nangwa n’omu biro bikuru. Konka shi ebiro bikuru byona nibimushemeza? Mbwenu shi ni bata oku turi kubasa kwereka ku nitukunda Yehova omu bwire bw’ebiro bikuru?
1. Ahabw’enki ebiro bikuru byingi bitari kushemeza Yehova?
Nikibasa kukutangaza kumanya ku ebiro bikuru byingi byine obukomoko omu bapagani. Bimwe omuri ebyo biro bikuru nibiba byine akakwate n’amadini g’ebishuba. Noshanga birimu ebikorwa bya ba dayimoni, ninga shi byegamire aha nyegesa eri kugamba ku omwika gutari kufa. Bimwe omu biro bikuru byegamire aha nyegesa z’ebishuba. Yehova narabura abari kumuramya ngu: ‘Mubetaniseho, mutarikora aha kintu cona ekitashemire.’—2 Abakorinso 6:17. *
2. Ni bata oku Yehova ari kureba ebiro bikuru ebiri kuhimbisa abantu?
Yehova natuhabura ngu twerinde kugwa omu mutego g’‘okwesiga abantu.’ (Shoma omuri Yeremia 17:5.) Bimwe omu biro bikuru nibihimbisa abategeki ninga shi abasirikare. Omu bindi biro bikuru abantu nibashemerererwa obugabe obu ihanga ryine, ninga shi ebirango byaryo; ecokureberaho nk’ibendera. (1 Yohaana 5:21) Nibakuza ebiro bikuru by’eby’obutegeki ninga shi ebitongore. Mbwenu shi Yehova nayehurira ata yareba turi kuhimbisa abantu ninga shi ebitongore ebiri kukora ebintu ebiri kutana n’ekigendererwa ceye?
3. Ni biha bintu ebiri kubasa kwereka ku ekiro kukuru kitari kuhimbisa Ruhanga?
Yehova nayanga, ‘obusinzi, okurara enkera, [ninga shi] okunywa amarwa mingi. (1 Petero 4:3) Omu biro bikuru ebimwe nihabamu ebikorwa by’obushambani. Kugira ngu tugume turi banywani ba Yehova, tushemerire kwerinda ebikorwa bibi byona harimu nk’obushambani.
YEGA BYINGI
Reba oku ori kubasa kushemeza Yehova ori kukora ensharamu ndungi aha bikwatirine n’ebiro bikuru.
4. Yerinde ebiro bikuru ebitari kushemeza Yehova
Shoma omu Baefeso 5:10, rero muganire ahari ebi bibuzo:
-
Ni enki eki tushemerire kukora kugira ngu tumanye yaba tushemerire kuza omu kiro kikuru nanka?
-
Ni biha biro bikuru ebi abantu bamanyirire omu kacweka kanyu?
-
Mbwenu shi notekateka ngu ebyo biro bikuru nibishemeza Yehova?
Ecokureberaho: Mbehi warayeburize oku Ruhanga ari kureba ebiro bikuru by’amazarwa? Bibuli tihine ahu eri kugamba ku abahereza ba Yehova bakozire ebiro bikuru by’amazarwa, konka negamba ebiro bibiri by’amazarwa, ebyakozirwe n’abashija babiri ababire batari kumuhereza. Shoma omu Kutandika 40:20-22 n’omuri Matayo 14:6-10. Bwanyima, muganire ahari ebi bibuzo:
-
Ni enki eki ebyo biro bikuru by’amazarwa byombi byabire biri kubuganiraho?
-
Tukuratize ezi nkuru z’omuri Bibuli, ni bata oku Yehova ari kureba ebiro bikuru by’amazarwa?
Nambwenu, nitubasa kwebuza ngu, ‘Mbehi twayekwatanisa omu biro bikuru by’amazarwa ninga by’abapagani, Yehova nabifaho?’ Shoma omu Kuruga 32:1-8. Bwanyima, ozane VIDIYO rero muganire ahari ebi bibuzo.
-
Ahabw’enki turi kuba tushemerire kumanya ge ebi Yehova ari kwikiriza?
-
Nitubasa kukikora tuta?
Oku turi kubasa kumanya yaba ekiro kikuru nanka kitari kushemeza Ruhanga
-
Mbehi cegamire aha nyegesa z’ebishuba? Kugira ngu obimanye, condoza omanye oburugo bw’eco kiro kikuru.
-
Mbehi nikihimbisa abantu, ebitongore, ninga ebirango by’ihanga? Yehova ni we oshemerire kuhimbisibwa okukira ebindi bintu byona, kandi nitwesiga ku arije kwihaho ebizibu byona omu nsi.
-
Mbehi emigenzo n’ebikorwa ebiri kukorwa ahari eco kiro kikuru nibitana n’emisinge ya Bibuli? Tushemerire kuguma turi abari kwera omu by’emicwe.
5. Gambira abandi ebi ori kwikiriza
Nikibasa kukugumira kugambira abandi ebi ori kwikiriza bakugema ngu mugende hamwe omu biro bikuru ebitari kushemeza Yehova. Bashobororere ebi ori kwikiriza oyetonzire kandi omu bwenge. Kugira ngu orebe ecokureberaho c’oku ori kubasa kubikora, zana VIDIYO.
Shoma omuri Matayo 7:12, rero muganire ahari ebi bibuzo:
-
Tukuratize eki cahandikirwe, mbehi oshemerire kugambira abanyabuzare bawe abatari kwikiriza, ku batashemerire kuza omu kiro kikuru nanka?
-
Ni bata oku ori kubasa kwereka abanyabuzare bawe ku n’obu otari kwekwatanisa nabo omu biro bikuru, ori kubakunda kandi ku ori kubafaho?
6. Yehova nayenda ngu tushemererwe
Yehova nayenda ngu tukwate obwire bw’okweshemeza n’abanyabuzare bitu n’abanywani bitu. Shoma omu Mubuurizi 8:15, rero muganire ahari eki kibuzo:
-
Ni bata oku oru runyiriri ruri kwereka ku Yehova ari kwenda ngu tushemererwe?
Yehova nayenda ngu abahereza beye bakwate obwire bw’okweshemeza. Zana VIDIYO kugira ngu oyerebere oku ebi biri kubaho omu biterane byitu.
Shoma omu Bagalatia 6:10, rero muganire ahari ebi bibuzo:
-
Mbehi nituba tushemerire kuza omu biro bikuru kugira ngu tukorere abandi ebirungi?
-
Ari okuha omuntu ekiconco ahabw’okuba wagemwa kukimuha aha kiro kikuru n’okukimuha obyihire aha mutima, ni enki ekiri kukushemeza?
-
Obumwe na bumwe Abahamya ba Yehova bingi nibakwata izoba beshemeza bo n’abana babo kandi babaha ebiconco. Yaba oyine abana, ni biha bintu by’omuhendo ebi ori kubasa kubaha?
ABANTU ABAMWE NIBAGAMBA NGU: “Oburugo bw’ekiro kikuru tibwine enshonga. Nibuba buri obwire burungi bw’okweshemeza iwe n’ab’eka yawe n’abanywani bawe.”
-
Iwe nokigambaho enki?
EMPINYE
Yehova nayenda ngu tukwate obwire bw’okweshemeza n’ab’omu ka yitu n’abanywani bitu. Konka nambwenu, nayenda ngu twerinde kukuza ebiro bikuru ebitari kumushemeza.
Wayega ki?
-
Ni biha bibuzo ebi turi kubasa kwebuza kugira ngu tumanye yaba ekiro kikuru nanka kitari kushemeza Yehova?
-
Ni bata oku turi kubasa kushobororera ab’omu maka gitu n’abanywani bitu ebikwatirine n’ensharamu yitu y’okutekwatanisa omu biro bikuru?
-
Ni enki ekiri kukuhamiza ku Yehova ari kwenda ngu tweshemeze?
CONDOZA
Reba ebiro bikuru ebi Abakristo batashemerire kuzamu.
Reba ebintu bina ebishemerire kutuma twayikiriza ku ebiro bikuru by’amazarwa bitari kushemeza Ruhanga.
“Ahabw’enki Abahamya ba Yehova batari kukuza ebiro by’amazarwa?” (Enkuru y’ahari intaneti)
Reba oku Omukristo ocari muto yatwarize obu abandi begi abu bari kwega hamwe bamushekire, ahabw’okwanga kwekwatanisa na bo mu kiro kikuru ca Noheri.
Abakristo bingi bakasharamu kureka kukuza ekiro kikuru ca Noheri. Nibehurira bata ahabw’ensharamu eyi bakozire?
“Bakatunga ebintu birungi kukira ebi bayefererize” (Omunara g’Omurinzi, 1 Okwikuminabiri, 2012)
^ Reba Enyongezo ya 5 kugira ngu omanye eki oshemerire kukora abandi baba bari kweshemeza omu biro bikuru.
