ZANNOO 44
Tige Zaa Diibuŋ Pɛlɛ Naaŋmen Poɔ Bee?
Jehoova boɔrɔŋ ka te maŋ pɛlɛ te niŋe, o boɔrɔŋ ka te maŋ erɛ yɛlɛ naŋ na toɔ̃ vɛŋ ka te taa popeɛloŋ te zemmo poɔŋ. Kyɛ, tige zaa diibuŋ pɛlɛ Naaŋmen poɔ bee? Te naŋ nɔŋ Jehoova zuŋ, bo tige mine la aŋ seŋ ka te tage te menne yi a poɔŋ?
1. Bonso ka tige mine diibu ba pɛlɛ Jehoova poɔ?
A na e boŋ seɛlee ka ho baŋ ka a tige mine bebeŋ a ba kye a Baabole poɔŋ, ka a mine meŋ kyaare baga puoruu yɛlɛ. A tige mine neŋ zirii puoruu yel-erre mine maŋ laŋɛɛ taa. A mine meŋ, ba maŋ de la sɔyɛlɛ poɔ a eŋɛŋ. A tige diibu mine meŋ maŋ wuliŋ ka, ka neɛŋ kpi, seɛ kaŋa naŋ koŋ baŋ kpi maŋ yi la o eŋɛŋ a te be zie kaŋa. A tige na mine noba naŋ maŋ dire na maŋ lɛ wuliŋ ka, ka ba naŋ ba tu lasiri yɛlɛ mine bee ba sããkommine yeltuurii mine, yelfaa kaŋa na pɔge baŋ. A tige mine meŋ diibu maŋ kyaare good luck bee zunoɔ̃ yɛlɛ. Lɛ wuleeŋ ka, ka ba naŋ di a tigri, lɛ na vɛmeŋ ka yelsonne mine e ba zemmo poɔŋ. (Aizeeya 65:11) Jehoova kpãã la o puorebiiri ka: “[Yɛ] wɛle yɛmenne yi ba poɔ . . . kyɛ ta wa toɔrɔ bonzaa naŋ waa bondɛgre.”—2 Korinti 6:17. a
2. Bo teɛroŋ ka Jehoova taa kyaare tige na noba naŋ maŋ dire a de gyeremɛ naŋ ba seŋ neŋ a korɔ nensaaleba na?
Jehoova kpãã teŋ ka te kaara te menne soŋ a ta wa “dɛle nensaalaa” zaa. (Kanne Jeremaiya 17:5.) A bebi tegrɛ na mine noba naŋ maŋ iri biŋ a dire na maŋ vɛmeŋ baŋ de gyeremɛ korɔ ba paaloŋ kaareba ane sogyare. Ba mine meŋ maŋ di la a bebi tegrɛ ŋa a de teɛre bebiri na ba paaloŋ naŋ nyɛ soŋ-meŋɛ. A bebi tegrɛ ŋa mine noba naŋ maŋ dire na meŋ maŋ vɛmeŋ ka noba de gyeremɛ korɔ ba paaloŋ na flag ane boma mine naŋ are ko a paaloŋ kpeɛ̃o diibu. (1 Gyɔɔn 5:21) A tige diibu mine saŋa, noba maŋ de la ba menne eŋ a donɛɛ naaloŋ diibu yɛlɛ poɔŋ, ane laŋnoɔre yelsɛgree mine noba naŋ sɛgre biŋ ka ba maale a donɛɛ yelfɛree yɛlɛ. Ka nensaalaa kaŋa bee nensaaleba yelsɛgraa kaŋaŋ bebe a ba erɛ yɛlɛ Jehoova naŋ boɔrɔ, kyɛ ka te de gyeremɛ ba naŋ ba seŋ neŋ a korɔ ba, ho teɛre ka a yɛlɛ ŋa na pɛlɛɛ Jehoova poɔ bee?
3. Bo gyogri mine la a maŋ vɛŋ ka tige mine diibu ba pɛlɛ Jehoova poɔ?
A Baabole yeleeŋ ka, “dããnyukuoli, bondi-yɛlɛ ane tolomala” ba soma. (1 Piita 4:3) A tige mine diibu saŋa, noba maŋ erɛɛ ba yɛlɛ basabasa, a kyɛ erɛ yelfaare meŋ yaga zaa. Ka teneeŋ boɔrɔ ka te e Jehoova zɔmenne, aseŋ ka te tage te menne yi a yeldɛgɛ ŋa eŋɛŋ kpɛlɛŋkpɛlɛŋ.
ZANNE YƐLƐ YAGA POƆ
Ho na zanne nyɛɛ yɛlɛ naŋ na toɔ̃ soŋ bo ka ho de gbɛ-sonne a kyaare tige diibu ane bebi tegrɛ noba naŋ maŋ dire. Ho na lɛ nyɛɛ lɛ ho gbɛɛ na hoŋ na de na naŋ na toɔ̃ vɛŋ ka Jehoova poɔ pɛle.
4. Tage ho meŋɛ yi tige diibu zaa naŋ ba derɛ gyeremɛ korɔ Jehoova
Kanne Efesu 5:10, a kyɛ gyieli a soorebie naŋ tu na yɛlɛ:
-
Sɛre teŋ na de gbɛre a de te menne eŋ tigri kaŋa diibu poɔŋ na, bo yɛlɛ aŋ seŋ ka te soore te menne?
-
Noba mine maŋ iree bebi tegrɛ mine biŋ a de dire tige mine, a bobo la ka noba dire yaga zaa zie na hoŋ be na?
-
Ho teɛre ka Jehoova poɔ pɛlɛɛ a tige ŋa diibu bee?
Aŋa mannoo poɔŋ, noba yaga maŋ diree ba dɔgebo bebiri. Ho teɛroŋ poɔŋ a yɛlɛ ŋa pɛlɛɛ Jehoova poɔ bee? Ka hooŋ kaa a Baabole poɔŋ, ho koŋ nyɛ Jehoova puorebie zaa naŋ daaŋ di o dɔgebo bebiri tigri, kyɛ noba bayi yoŋ la daaŋ di ba dɔgebo bebiri tigri baŋ sɛgaa eŋ a Baabole poɔŋ. Ba kaŋa zaa meŋ da ba puoro Jehoova. Kanne Munpiilee 40:20-22 ane Matio 14:6-10. Ka yɛneeŋ wa kanne baare, yɛ gyieli a soorebie naŋ tu na yɛlɛ:
-
A noba bayi ŋa a Baabole naŋ yelka ba di la ba dɔgebo bebiri na, bo yɛlɛŋ da e ba dɔgebo bebiri tigri diibu na zieŋ?
-
Aŋa lɛ a Baabole sɛgre ŋa naŋ wuli na, bo teɛroŋ ka Jehoova taa kyaare dɔgebo bebiri tigri diibu?
Kyɛ, aminekaŋaŋ ho na leɛteɛre ka, ‘Ka maaŋ dire N dɔgebo bebiri bee ka maaŋ de N meŋɛ eŋ tige mine a Baabole naŋ yelka a ba soma eŋɛŋ, yelmeŋɛ la ka Jehoova poɔ koŋ pɛle ne ma?’ Kanne Yiibu 32:1-8. Ka yɛneeŋ wa kanne baare, yɛ ŋmɛ a VIDIO a kyɛ gyieli a soorebie naŋ tu na yɛlɛ.
-
Bonso aŋ e nimizeɛ ka te maŋ daŋ peɛre baŋ yɛlɛ Jehoova naŋ boɔrɔ sɛre kyɛ erɛ yelzaa?
-
Sobuo teŋ na toɔ̃ tu kyɛ e lɛ?
Wala teŋ na toɔ̃ e baŋ ka tigri kaŋa diibu ba pɛlɛ Naaŋmen poɔ?
-
A Baabole wuleeŋ ka te na baŋ di la a tigri ŋa bee? Ka hooŋ boɔrɔ ka ho nyɛ a noɔre iribo, mãã ho meŋɛ a zanne yɛlɛ yaga a kyaare lɛ a tigri diibu naŋ e piili.
-
A tigri de la gyeremɛ naŋ ba seŋ neŋ a korɔ nensaaleba, bee nensaaleba yelsɛgraa kaŋa, bee a paaloŋ boma mine? Jehoova yoŋ aŋ seŋ ka te de gyeremɛ zaa a korɔ. Ona yoŋ na baŋ iri yelfaare zaa naŋ be a donɛɛ poɔŋ bare, azuŋ, ona yoŋ aŋ seŋ ka te dɛle.
-
Yɛlɛ na baŋ maŋ erɛ a tigri diibu saŋa ane a tigri yeltuurii neŋ a Baabole kyaarɛɛ taa? Aseŋ ka te vɛŋ ka te yel-erre zaa e forifori.
5. Soŋ ho taaba ka ba taa gyeremɛ a ko yɛlɛ na hoŋ sagedi na
Ka noba mineŋ wa ferebo ka ho de ho meŋɛ eŋ tige mine diibu naŋ ba pɛlɛ Jehoova poɔ, saŋa kaŋa a maŋ eɛ kpeɛŋaa ka ho yelka ho koŋ e lɛ. Ka a yɛlɛ ŋa taaŋ wa pɔge bo, mãã ho meŋɛ a yi gyeremɛ poɔŋ a wuli bon naŋso hoŋ ba boɔrɔ ka ho de ho meŋɛ eŋ tige diibu mine poɔŋ. Ka hooŋ boɔrɔ ka ho nyɛ yɛlɛ naŋ na toɔ̃ soŋ bo ka ho e lɛ, ŋmɛ a VIDIO.
Kanne Matio 7:12, a kyɛ gyieli a soorebie naŋ tu na yɛlɛ:
-
Ka hooŋ kaa nyɛ lɛ a Baabole sɛgre naŋ yel na, aseŋ ka ho yelko ho booree deme naŋ ba puoro Jehoova ka a ba seŋ ka ba dire tige mine bee?
-
Ka ho booree demeŋ dire tige na mine Jehoova naŋ ba boɔrɔ, ho koŋ poɔ ba eŋɛŋ ka yɛ dire a tige. Kyɛ, wala hoŋ na toɔ̃ e a vɛŋ ka ho booree deme na baŋ ka ho naŋ nɔnɔ baŋ a kyɛ de ba tegroŋ meŋ?
6. Jehoova boɔrɔŋ ka te taa popeɛloŋ
Jehoova boɔrɔŋ ka te neŋ te booree deme ane te zɔmenne maŋ lantaa a pɛle te niŋe. Kanne Ikilisiasitiz 8:15, a kyɛ gyieli a soorebiri naŋ tu na yɛlɛ:
-
Aŋa lɛ a sɛgre ŋa naŋ wuli na, wala teŋ e baŋ ka Jehoova boɔrɔŋ ka te taa popeɛloŋ?
Jehoova boɔrɔŋ ka o puorebiiri maŋ pɛle ba niŋe, a kyɛ taa popeɛloŋ meŋ. Ŋmɛ a VIDIO a nyɛ lɛ te poɔ naŋ maŋ pɛle a seŋ, saŋa na teŋ wa gaa te paalonne lammobɛrɛ na.
Kanne Galesiya 6:10, a kyɛ gyieli a soorebie naŋ tu na yɛlɛ:
-
Ka teneeŋ boɔrɔ ka “te erɛ soŋ a korɔ noba zaa” lɛ wuleeŋ ka a seŋ ka te meŋ dire tige na noba yaga naŋ dire na bee?
-
A yɛlɛ ŋa buo soba la maŋ vɛŋ hoŋ taa popeɛloŋ yaga—saŋa na hoŋ nyɛ ka a e la ferebo ka ho ko noba kyɔɔtaare tigri diibu saŋa, kyɛbee saŋa na hoŋ yi ho poɔ zaa a terɛ boma na?
-
Saŋa kaŋa Jehoova Sieree Deme maŋ sɛgrɛɛ yɛlɛ a de kyɔɔtaare naŋ soma yaga a ko ba biiri. Ka hooŋ taa biiri, bo yɛlɛ mine la hoŋ na baŋ e ko ba?
NOBA MINE MAŊ YELEŊ KA: “Lɛ na a tigri naŋ e piili yɛlɛ ba fɛre. Yɛlɛ naŋ fɛre la ka a tigri ŋa maŋ vɛmeŋ ka maa ne N booree deme ane N zɔmenne wa lantaa a pɛle te niŋe.”
-
Wala hoŋ na yel?
A ZANNOO YELNIMIZEERE
Jehoova boɔrɔŋ ka te maŋ laŋ neŋ te booree deme ane te zɔmenne a pɛle te niŋe. Kyɛ, o ba boɔrɔ ka te de te menne eŋ tige diibu mine naŋ ba pɛlɛ o poɔ.
Bo Hoŋ Zanne
-
Bo soorebie aŋ seŋ ka te soore te menne a toɔ̃ baŋ tige na diibu naŋ ba pɛlɛ Jehoova poɔ?
-
Wala teŋ na baŋ e a soŋ te booree deme ane te zɔmenne ka ba taa gyeremɛ a ko gbɛɛ na teŋ de a kyaare tige mine diibu na?
-
Wala hoŋ e baŋ ka Jehoova boɔrɔŋ ka te pɛlɛ te niŋe?
YƐLƐ MINE NAŊ LƐ BEBE
Kanne a yɛlɛ ŋa a nyɛ tige na mine Kristabiiri naŋ ba dire.
“Bonso Ka Jehoova Sieree Deme Ba Dire Tige Mine?” (Intanɛt zu gane)
Kanne a yɛlɛ ŋa a nyɛ yɛlɛ anaare mine naŋ vɛŋ teŋ baŋ ka dɔgebo bebiri diibu ba pɛlɛ Naaŋmen poɔ.
“Bonso Ka Jehoova Sieree Deme Ba Maŋ Dire Ba Dɔgebo Bebiri?” (Intanɛt zu gane)
Kaa a vidio ŋa a nyɛ lɛ na bibiiri naŋ nɔŋ Jehoova naŋ na baŋ e a vɛŋ ka Jehoova poɔ pɛle bebi tegrɛ diibu saŋa.
Kristabiiri turituri yaga deɛ gbɛre ka ba koŋ di Borenyɛ. Kanne a yɛlɛ ŋa a nyɛ teɛroŋ na baŋ taa kyaare gbɛre na baŋ de na.
“Ba Nyɛɛ Bonkaŋa Naŋ Soma Yaga Zaa A Gaŋ Borenyɛ” (A Watchtower, December 1, 2012)
a Wala aŋ seŋ ka ho e ka noba mineŋ wa dire tigri kaŋa? Kaa Yɛlɛ Mine Ba Naŋ Wuli A Muni 5 a nyɛ a noɔre iribo.
