TOLI 44

Na ala fesa Gadu e fende bun?

PEE

Yehofa wani u piisii. Son yuu wan fasi fa we piisii a te we holi fesa. Ma na ala fesa Gadu e fende bun? Fai sa soi taki i lobi Yehofa te a abi fu du anga fesa?

1. Saide Yehofa á lobi gaanse fesa?

Kande i foondoo te i si taki omen fu den fesa aini a ten ya, abi fu du anga falisi biibi. Son wan abi fu du anga ogii yeye. Taawan a den dedesama den e gi gaandi. Boiti dati, son fesa e koli sama taki efu den du son sani den o de koloku (Yesaya 65:11). Yehofa e wasikoi den sama di e dini en taki: ‘U komoto ape, ná holi sani di á kiin.’—2 Korentesama 6:17. a

2. Fa Yehofa e si fesa pe den e gi libisama gaandi?

Yehofa taki ‘wa mu fitoow libisama’ (Leisi Yelemiya 17:5.) Son fesa e gi tiiman, suudati, efuso a faaka fu a kondee gaandi. Son yuu den e fii a dei di a kondee komoto a wan taa kondee ondoo (1 Yohanisi 5:21). Son yuu a politiki palitei efuso taa olikanisâsi den e fii fesa gi. Fai denki Yehofa be o fii efu we gi gaandi a libisama efuso olikanisâsi? Fai si enke aw fii efu we holibaka gi wan sani di aa lobi?

3. Fa sama e tyai denseefi a son fesa?

Beibel taki ‘wa mu diingi duungu, wa mu go a fesa pe sama nai tyai denseefi bun. Wa mu sitee diingi sopi tu’ (1 Peitilisi 4:3). Sama nai tyai denseefi bun a gaanse fu den fesa ya. Efi ya wani yu anga Yehofa poli, ya mu go a den sowtu fesa ya.

LUKU A TOLI YA MOO FINI

Wo si fai sa teke bosoloiti di o meke yu anga Yehofa á poli te a abi fu du anga fesa dei.

4. Ná go a fesa di e poli Yehofa nen

Leisi Efeisesama 5:10, da i luku efii poi piki den akisi ya:

Sai mu holi a pakisei fosi i go a wan fesa?
San a wantu fesa di den e holi na a pisi pe ye tan?
I si enke Yehofa e fende den fesa ya bun?

I sabi fa Yehofa e si fuuyali? Nawan peesi aini Beibel we leisi taki sama di be e dini Yehofa be e fii fuuyali. Den tu fuuyali di Beibel e taki fu den, a sama di á be e dini Yehofa be e fii den. Leisi Genesesi 40:20-22 anga Mateyesi 14:6-10, da i luku efii poi piki den akisi ya:

San be pasa a den fuuyali ya?
San den tekisi ya e leli i fu a fasi fa Yehofa e si a fii di sama e fii fuuyali?

Kande ye akisi iseefi taki: ‘Yehofa o fii wan fasi efu mi e fii fuuyali efuso wan fu den taa fesa di nai kai anga san Beibel e taki?’ Leisi Ekisodesi 32:1-8. Baka dati pee a FELON, da i luku efii poi piki den akisi ya.

FELON: Fesadei di Gadu á lobi (5:07)

Saide u mu meke muiti fu kon sabi san Yehofa lobi anga san aa lobi te a abi fu du anga fesa?
San o yeepi u fu sabi a sani ya?

Fa yo du sabi efu Gadu nai fende wan fesa bun?

A fesa abi fu du anga sani di nai kai anga Beibel? Efii wani sabi a sani ya i mu ondoosuku pe a fesa komoto.
A fesa e gi gaandi a libisama, wan olikanisâsi, efuso a faaka fu a kondee? A Yehofa u mu gi gaandi. I mu soi taki ye biibi taki neen wawan poi puu ala den polobelema fu a goontapu ya.
Den sani di yo du na a fesa e kai anga san Beibel e taki? Wa mu du sani di o meke Yehofa si wi enke sama di á kiin moo.

5. Du sani di o meke sama lesipeki a biibi fii

Aa makiliki fu du san Yehofa wani te taawan e dwengi i fu go a son fesa. Soi den a wan lesipeki fasi san ye biibi. Efii wani si fai sa du a sani ya, pee a FELON.

FELON: Soi taawan a wan lesipeki fasi san ye biibi (2:01)

Leisi Mateyesi 7:12, da i luku efii poi piki den akisi ya:

Te i luku a tekisi ya, da i si enke a be o de wan koni sani fu taigi den famii fii di nai dini Yehofa taki den á mu fii son fesa?
Fai sa soi i famii taki i lobi den, winsi i nai fii son fesa anga den moo?

6. Yehofa wani i piisii

Yehofa wani u poolo anga den mati anga den famii fu u. Leisi Peleikiman 8:15, da i luku efii poi piki a akisi ya:

Fa a tekisi ya e soi taki Yehofa wani u piisii?

Yehofa wani den sama di e dini en poolo anga denseefi. Pee a FELON, da i luku fa den baala anga sisa e poolo anga denseefi a den gaan konkelesi.

FELON: Baala anga sisa e bali wadaa gi denseefi a den gaan konkelesi (5:40)

Leisi Galasiyasama 6:10, da i luku efii poi piki den akisi ya:

U mu go a fesa fu di u wani taawan piisii anga u?
San o meke i moo piisii? Fu gi wan sama wan kado a wan fesadei di ala sama e paati kado, efuso fu gi wan sama wan kado a wan dei di aa be poti pakisei?
Son Kotoigi e holi fesa anga den pikin fu den. Son yuu den e gi den kado a wan yuu di den á be denki. Efi yu abi pikin, sai si enke i sa du makandaa anga den?