ADZESUA 44
Aso Afahyɛ Ahorow Nyina Na Nyankopɔn N’enyi Gye Ho?
Jehovah pɛ dɛ yɛgye hɛn enyi na yɛnye afofor bɔ mu yɛ ndzɛmba a ɔbɛma hɛn enyi agye wɔ abrabɔ mu. Naaso asɛm no nye dɛ, ana ndzɛmba a yɛyɛ dze gyegye hɛn enyi tse dɛ afahyɛ na dapɔn nyina na n’enyi gye ho? Afei so, ebɛn afahyɛ ahorow na ɔsɛ dɛ yɛtwe hɛnho fi ho dze kyerɛ dɛ yɛdɔ Jehovah?
1. Ebɛnadze ntsi na Jehovah n’enyi nngye afahyɛ ahorow pii ho?
Aso inyim dɛ afahyɛ ahorow pii wɔ hɔ a onngyina Kyerɛwnsɛm no do anaadɛ ofi abosonsɔr mu na ɔbae? Ɔbɛyɛ wo nwanwa dɛ! Afahyɛ ahorow yi mu bi wɔ hɔ a ebɔhwɛ mu paa no, nna ɔnye ator som gyina dua kor do. Ibi so wɔ hɔ a esumansɛm twom, anaa adwen a ɔtaa ekyir nye dɛ ɔkra a onnwu da bi hyɛ hɛn mu. Afahyɛ no bi so dze, gyedzihun nkotsee. (Isaiah 65:11) Jehovah bɔ n’asomfo kɔkɔ dɛ: “Hom ntsew homho . . . na mma hom nnka efifidze.”—2 Corinthfo 6:17. a
2. Jehovah tse nka dɛn wɔ afahyɛ ahorow a wodzi dze hyɛ nyimpa bi enyimnyam no ho?
Jehovah bɔ hɛn kɔkɔ dɛ, mma yɛmmfa hɛnho ‘nntwer ɔdasanyi.’ (Kenkan Jeremiah 17:5.) Afahyɛ ahorow bi wɔ hɔ a wodzi dze hyɛ etumfo anaa nsordaafo enyimnyam. Bi so wɔ hɔ a wodzi dze kaa ɔman no n’ahyɛnsewdze bi anaa da a ɔman no nyaa fahodzi. (1 John 5:21) Binom koraa mpo dze ɔyɛ a wodzi afahyɛ ahorow bi dze hyɛ amanyɛkuw anaa ahyehyɛdze bi enyimnyam. Sɛ Jehovah hu dɛ yɛdze enyimnyam soronko bi rema nyimpa anaa ahyehyɛdze bi, nkanka ahyehyɛdze a ɔyɛ ndzɛmba a ɔnye n’apɛdze nnhyia a, ehwɛ a ɔbɛtse nka dɛn?
3. Ebɛn ndzeyɛɛ na ɔkɔ do wɔ afahyɛ ahorow ase a ɔmma Jehovah nngye nnto mu?
Bible no kasa tsia “asabow, aponto a n’ase yɛ dede, [nye] akɔwensafo fɛkuw.” (1 Peter 4:3, NWT) Sɛ nkorɔfo ridzi afahyɛ ahorow bi a, wɔyɛ hɔn adze basabasa na wobu ndwamanbra so wɔ ase. Sɛ yɛbɔkɔ do ayɛ Jehovah n’anyɛnkofo a, ɔsɛ dɛ yɛtwe hɛnho fi ɔbra a no ho nntsew a ɔtsetse dɛm no ho koraa.
PƐNSAPƐNSA MU KƆ EKYIR
Ma yɛnhwɛ kwan a ibotum afa do esi gyinae pa wɔ afahyɛ ahorow ho na ama Jehovah n’enyi aagye.
4. Twe woho fi afahyɛ biara a ɔnnhyɛ Jehovah enyimnyam no ho
Ma yɛnkenkan Ephesusfo 5:10, na yensusu nsɛmbisa yi ho:
-
Ansaana yebesi gyinae dɛ yebedzi afahyɛ bi anaa yerinndzi no, ebɛnadze na ɔsɛ dɛ yedzi kan hu?
-
Ebɛn afahyɛ na nkorɔfo taa dzi wɔ beebi a etse no?
-
Ehwɛ a, Jehovah n’enyi gye dɛm afahyɛ ahorow no ho?
Ma yɛnyɛ nhwɛdo kor bi. Ehwɛ a, aso Jehovah n’enyi gye ho dɛ nkorɔfo bedzi hɔn awoda? Onnyi Bible no mu beebiara dɛ Jehovah no somfo bi dzii n’awoda, mbom no, nyimpa beenu bi pɛ na Bible no ka dɛ wodzii hɔn awoda. Naaso Bible no ma yehu dɛ nna hɔn mu biara nnsom Jehovah. Ma yɛnkenkan Genesis 40:20-22 na Matthew 14:6-10, na yensusu nsɛmbisa yi ho:
-
Awoda ebien a Bible no ka ho asɛm dɛ wodzii no, ebɛn asɛm na osii wɔ no mu biara ase?
-
Ehwɛ kyerɛwnsɛm a yeesusu ho yi a, sɛ nkorɔfo dzi awoda a, Jehovah tse nka dɛn?
Bi a ibebisa dɛ, ‘Aso ɔyɛ ampa paa dɛ sɛ midzi awoda anaa afahyɛ bi a Bible no kasa tsia a, ɔbɛhaw Jehovah?’ Ma yɛnkenkan Exodus 32:1-8. Afei ma yɛnhwɛ VIDEO yi, na yensusu nsɛmbisa a odzidzi do no ho.
-
Ebɛnadze ntsi na sɛ yɛrebɛyɛ biribi a, ɔsɛ dɛ yedzi kan hwɛ dɛ Jehovah n’enyi gye ho ansaana yaayɛ?
-
Yebesi dɛn ayɛ dɛm?
Mbrɛ yebesi ehu afahyɛ a Nyankopɔn n’enyi nngye ho
-
Aso afahyɛ no gyina Bible nkyerɛkyerɛ do? Sɛ ibotum enya ho mbuae a, ɔsɛ dɛ idzi kan yɛ beebi a afahyɛ no fi bae no ho nhwehwɛmu.
-
Aso wodzi afahyɛ no dze hyɛ nyimpa, ahyehyɛdze bi, anaa ɔman no n’ahyɛnsewdze bi enyimnyam? Jehovah nkotsee na ɔsɛ dɛ yɛhyɛ no enyimnyam na yenyim dɛ ɔno nkotsee na obotum eyi ɔhaw a ɔwɔ wiadze nyina efi hɔ.
-
Aso ndzɛmba a wɔyɛ no wɔ afahyɛ no ase no nye dza Bible no ka hyia? Ɔsɛ dɛ yɛkɔ do ma hɛn abrabɔ ho tsew.
5. Boa afofor ma wɔntse dza egye dzi no ase
Afahyɛ ahorow a Jehovah n’enyi nngye ho no, binom botum ahyɛ wo dɛ dzi, na bi a obotum ayɛ dzen ama wo dɛ ebɔwosow wo tsir wɔ ho. Sɛ ɔba no dɛm a, ɔyɛ a nya abotar na ma wonhu siantsir a emmpɛ dɛ idzi dɛm afahyɛ no. Naaso, hwɛ na aannkasa enntsia hɔn. Ma yɛnhwɛ VIDEO yi, na ibohu kwan a ibotum afa do ayɛ dɛm.
Ma yɛnkenkan Matthew 7:12, na yensusu nsɛmbisa yi ho:
-
Dɛ mbrɛ kyerɛwsɛm yi kyerɛ no, aso ɔsɛ dɛ eka kyerɛ w’ebusuafo pen pen dɛ ɔnnsɛ dɛ wodzi afahyɛ bi?
-
Ɔwɔ mu dɛ enye w’ebusuafo rommbɔ mu nndzi afahyɛ bi dze, naaso, ebɛnadze na ibotum ayɛ dze akyerɛ dɛ edɔ hɔn na edwen hɔnho so?
6. Jehovah pɛ dɛ hɛn enyiwa gye
Jehovah pɛ dɛ yɛnye hɛn ebusuafo nye hɛn anyɛnkofo bɔ mu gye hɛn enyi. Ma yɛnkenkan Ɔsɛnkafo 8:15, na yensusu asɛmbisa yi ho:
-
Kyerɛwsɛm yi si dɛn ma yehu dɛ Jehovah pɛ dɛ hɛn enyiwa gye?
Jehovah pɛ dɛ n’asomfo bɔ mu gye hɔn enyiwa anaa wɔyɛ ndzɛmba a ɔbɛma hɔn enyiwa agye. Ma yɛnhwɛ VIDEO yi, na ibohu dɛ ndzɛmba a ɔkɔ do wɔ hɛn amanaman ntamu ehyiadzi ase no ma yehu dɛ asɛm yi yɛ nokwar paa.
Ma yɛnkenkan Galatiafo 6:10, na yensusu nsɛmbisa yi ho:
-
Ehwɛ a, aso ɔsɛ dɛ yɛtweɔn ma afahyɛ bi so ansaana yaayɛ nkorɔfo “papa”?
-
Ebɛn aber na sɛ ekyɛ obi adze a w’enyiwa bɛgye paa—ɔyɛ ber a akyɛ adze osiandɛ ɔyɛ afahyɛ ber no, anaa ber a wankasa efi wo pɛ mu akyɛ adze no?
-
Jehovah Adasefo beberee wɔ hɔ a, ɔwɔ mu ara a, wotum to pon ma hɔn mba, na wotum mpo kyɛ hɔn mba adze aber a mbofra no enyi nnda. Sɛ ewɔ mba a, ebɛn ndzɛmba soronko na ibotum ayɛ ama hɔn ma hɔn enyi aagye?
BINOM KA DƐ: “Beebi a afahyɛ bi fi bae dze, no ho nnhia. Dza ohia ara nye dɛ sɛ afahyɛ no so a, enye w’ebusuafo na w’anyɛnkofo bɔbɔ mu agye hom enyi.”
-
Sɛ obi ka dɛm a, ebɛn asɛm na ebɛka akyerɛ no?
DZA ESUA
Jehovah pɛ dɛ yɛnye hɛn ebusuafo na hɛn anyɛnkofo bɔ mu gye hɛn enyi. Naaso ɔsan so pɛ dɛ yɛtwe hɛnho fi afahyɛ ahorow a n’enyiwa nngye ho no ho.
Mbobɔdo
-
Sɛ yɛpɛ dɛ yehu dɛ Jehovah n’enyiwa gye afahyɛ bi ho anaa n’enyiwa nngye ho a, ebɛn nsɛm na yebotum ebisa hɛnho?
-
Yebesi dɛn ama hɛn ebusuafo nye hɛn anyɛnkofo atse siantsir a yenndzi afahyɛ bi no ase?
-
Isi dɛn hu dɛ Jehovah pɛ dɛ yɛgye hɛn enyi?
HWEHWƐƐ PII KA HO
Kenkan asɛm yi, na ibohu afahyɛ ahorow bi a Christianfo nndzi.
“Ebɛnadze Ntsi Na Jehovah Adasefo Nndzi Afahyɛ Ahorow Bi?” (Asɛm bi a ɔwɔ wɛbsaet do)
Kenkan asɛm yi, na ibohu siantsir ahorow anan bi ntsi a yɛgye dzi dɛ sɛ obi dzi awoda a, Nyankopɔn n’enyi nngye ho.
“Ebɛnadze Ntsi Na Jehovah Adasefo Nndzi Awoda?” (Asɛm bi a ɔwɔ wɛbsaet do)
Osiandɛ nna aberantsɛba bi nndzi Borɔnya ntsi, nna no skuulfo dzi noho fɛw. Hwɛ video yi, na ibohu mbrɛ osii yɛɛ n’adze.
Christianfo ɔpepem pii esi gyinae dɛ worinndzi Borɔnya. Kenkan dɛm asɛm yi, na ibohu dza hɔn mu bi aka afa gyinae a woesi no ho.
a Hwɛ Nsɛm Bi A Wɔakyerɛ Mu 5 no, na ibohu dza ɔsɛ dɛ eyɛ aber a nkorɔfo ridzi afahyɛ ahorow no.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
