LESENI 44
Dirava ese Moale Karadia Ibounai Ia Abia Dae, A?
Iehova ia ura mauri ita moalelaia bona nega haida moale karadia ita karaia. To Dirava ese holidei bona moale karadia ibounai ia abia dae, a? Unai bamona negadiai, edena dala ai Iehova lalokau henia karana ita hahedinaraia diba?
1. Dahaka dainai Iehova ese moale karadia momo ia dadaraia?
Reana do oi hoa, badina moale karadia momo be Baibel ena hahediba herevadia hegeregerena lasi, eiava tomadiho koikoi amo idia mai. Unai bamona moale karadia lalonai meamea karadia eiava ia mase diba lasi laumana ida gaukara hebou karana idia hahedinaraia. Haida be lauma dikadia gari henia eiava Laki diravana abia dae karadia idia hahedinaraia. (Isaia 65:11) Iehova ese ena tomadiho taudia ia hagania: “Do umui parara, bona miro gauna do umui dogoatao lasi.”—2 Korinto 6:17. a
2. Taunimanima edia ladana idia abia isi moale karadia dekenai Iehova ena hemami be edena bamona?
Iehova ia gwau do ita naria namonamo, namo lasi “taunimanima abidadama henia” ena tarapu lalonai ita moru. (Ieremia 17:5 duahia.) Holidei haida be lohia o soldia taudia edia ladana abia isi totona idia karaia. Haida be bese ena indipendens o fleg idia moalelaia. (1 Ioane 5:21) Danu, moale karadia haida be politikol pati o orea ma haida idia abia isi. Iehova ena hemami be edena bamona, bema ita ese tau ta o orea ta abia isi totona moale karana ta lalonai ita vareai?
3. Edena bamona kara ese idia hahedinaraia moale karana ta be dika?
Baibel ese “inuinu kekero, regerege bada pati, [bona] inuinu helulu” karadia ia taravatua. (1 Petero 4:3) Moale karadia haida lalonai, taunimanima be edia kara idia biagua lasi bona matabodaga karadia idia karaia. Iehova ena turana ai ita noho totona, kara mirodia ita dadaraia be namo.
DIBA MA HAIDA ABIA
Iehova oi hamoalea totona, holidei bona moale karadia dekenai mai aonega ida abia hidi oi karaia dalana do oi dibaia.
4. Iehova ese ia abia dae lasi moale karadia dadaraia
Efeso 5:10 duahia, bena inai henanadai herevalaia:
-
Dahaka gaudia ita diba be namo, unai amo holidei ta ita moalelaia eiava lasi ena abia hidi ita karaia diba?
-
Emu gabu ai edena holidei be momo ese idia moalelaia?
-
Oi laloa Iehova be unai bamona holidei dekenai ia moale, a?
Hegeregere, nega ta oi laloa vara dinana moalelaia karana dekenai Dirava ena lalohadai be dahaka, a? Baibel lalonai Iehova ena hesiai tauna be ena vara dinana ia moalelaia sivaraina ta idia torea lasi. To, Iehova idia diba lasi taudia rua edia vara dinana idia moalelaia ena sivarai idia torea. Genese 40:20-22 bona Mataio 14:6-10 duahia. Bena inai henanadai herevalaia:
-
Unai vara dinadia idia moalelaia negadia rua ai dahaka idia vara?
-
Unai sivarai rua hegeregerena, oi laloa vara dinana moalelaia karana dekenai Iehova ena hemami be edena bamona?
To, reana do oi laloa, ‘Vara dinana ena pati eiava Baibel ese ia taravatua moale karana ta dekenai lau lao neganai, Iehova be unai do ia laloa, a?’ Esodo 32:1-8 duahia. Bena, VIDIO itaia bona henanadai herevalaia.
-
Dahaka dainai Iehova ese ia abia dae gaudia ita diba be namo?
-
Edena bamona unai do ita karaia?
Dirava ese ia dadaraia moale karadia ita dibaia dalana
-
Ia be hahediba hereva koikoina amo ia mai, a? Unai oi diba totona, ena hamatamaia dalana oi tahua be namo.
-
Taunimanima, orea eiava bese ena fleg abia isi totona idia karaia, a? Mai anina bada gauna be Iehova ita matauraia bona ita abidadama henia badina ia ese tanobada ena hekwakwanai ibounai do ia haorea.
-
Idia karaia gaudia bona kastom ese Baibel ena taravatu ia utua, a? Iseda kara ia goeva noho be namo.
5. Haida oi durua oi abia dae gaudia idia matauraia totona
Haida ese oi idia doria Iehova ia dadaraia moale karadia oi karaia totona neganai, unai oi dadaraia be auka. To, mai hemataurai ida emu abia hidi oi gwauraia hedinarai. Unai karaia dalana oi dibaia totona, inai VIDIO itaia.
Mataio 7:12 duahia, bena inai henanadai herevalaia:
-
Unai siri hegeregerena, oi ese emu Witnes lasi famili taudia do oi hamaorodia edena holidei idia moalelaia eiava lasi be maoro, a?
-
Ena be emu famili ida do oi moale hebou lasi, to edena bamona do oi hahedinaraia idia oi lalokau henia bona laloa bada?
6. Iehova ia ura ita moale
Iehova ia ura iseda famili bona turadia ida nega namodia ita moalelaia. Hadibaia Tauna 8:15 duahia, bena inai henanadai herevalaia:
-
Edena dala ai unai siri ese ia hahedinaraia Iehova ia ura do ita moale?
Galatia 6:10 duahia, bena inai henanadai herevalaia:
-
Haida dekenai “kara namodia” ita karaia totona, momo ese idia karaia holidei do ita moalelaia, a?
-
Edena do oi moalelaia, oiemu ura negana ai harihari gauna oi henia, eiava holidei ta dainai harihari gauna oi henia karana?
-
Witnes taudia momo be edia natudia idia moale totona gau haida idia hegaegaelaia, bona nega ta ta ai natudia dekenai harihari gaudia idia henia neganai idia hoa. Bema oi be mai emu natudia, idia totona dahaka moale karadia haida oi karaia diba?
HAIDA IDIA GWAU: “Holidei ena hamatamaia dalana be gau badana lasi. To, mai anina bada gauna be famili bona turadia ida nega namona ita moalelaia.”
-
Edena bamona do oi hereva?
POINT BADANA
Iehova ia ura famili bona turadia ida nega namona ita moalelaia. To, ia ura lasi ita be ia ese ia dadaraia moale karadia ita karaia.
Riviu
-
Edena henanadai do ita laloa, unai amo Iehova ese ia dadaraia moale karadia do ita lalopararalaia?
-
Edena dala ai iseda famili bona turadia ita durua holidei totona ita karaia abia hidi do idia lalopararalaia?
-
Edena dala ai oi diba Iehova ia ura nega namona do ita moalelaia?
REFERENS ITAIA
Keristani taudia ese idia moalelaia lasi holidei haida do oi dibaia.
“Dahaka Dainai Iehova Ena Witnes Taudia be Holidei Haida Idia Moalelaia Lasi?” (Websait atikol)
Do oi itaia inai badina foa dainai ai abia dae Dirava ese vara dinana moalelaia karana ia dadaraia.
“Dahaka Dainai Iehova Ena Witnes Taudia be Vara Dinana Idia Moalelaia Lasi?” (Websait atikol)
Iehova idia lalokau henia matamata taudia ese moale dinadia ai Iehova idia hamoalea dalana oi itaia.
Keristani taudia milioni momo be abia hidi idia karaia Krismas idia moalelaia lasi totona. Unai abia hidi dainai edia hemami be edena bamona?
“Gau Namona Ta Idia Davaria” (Gima Kohorona, December 1, 2012)
a Hereva Ma Haida 5 itaia, taunimanima ese holidei ta idia moalelaia neganai, abia hidi maorona oi karaia dalana do oi dibaia.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
