Jihofa atene k’a jura ọlai wa, k’a la ch’amẹñwu ki ajẹñwu ẹdọ wa bọ. Ama, am’uche du k’amonẹ an’ọwọ efu-wñ ajẹñwu ẹdọ Jihofa bọ? Abu a neke d’ufẹdọ k’a nẹ ñwu Jihofa ña efu amẹñwu-i?

1. Ẹñwu chi k’amuche wewe k’amonẹ ache ma b’Ọjọ ẹdọ n?

I neke ch’ẹ awuwu ichẹñwu k’ẹ ma kakini ojile am’uche k’amonẹ ache jẹ kp’ẹñwu ki Baibul ka n, ẹbọ la n’ọwọ kp’obochi eche. I la ñọ n’amuche ki n’ọwọ kpai ọna Ọjọ egwa ọlemi. Ichẹ ka efu ma n’ọwọ nẹ kp’amẹbili abẹki ukọ kakini onugo onẹ cha kwu n. I n’amuche k’ẹtẹ ma kwefu ọhiala ọlemi kpai ukẹdọno kakini i n’amẹñwu ki ache alu ku ma fu lo tẹ. Jihofa d’ufeti ñwu abo-wñ: “Mẹ ki mudatẹ ojoji . . . mẹ ki la d’ọwọ kado ẹñwu ki ma fẹ n.”—2 Abo Kọrint 6:17. a

2. Abu am’uche k’amonẹ ache todu ku ma d’ojima ñwu onẹ dẹ eju Jihofa?

Jihofa d’ufeti ñwu wa k’a we “kẹdọn’onẹ.” (Gba Jẹrẹmaya 17:5.) I n’amuche ki ad’ojima ñwu abo ki ajọfẹ kpai am’isoja. Abo ka ach’uche omi n’ọla mi abẹki ed’ojima ñwu ẹñwu ki dago ñwu ojanẹ ma dabu agaliga. (1 Jọn 5:21) I la ñọ n’abo ki ad’ojima ñwu ipati ijabe ma abẹki ujọ ma. Abu ẹdọ Jihofa ana dẹ ichẹñwu k’a d’ojima ki ma dukpẹ n ñwu onẹ abẹki ujọ ka, ololo-wñ ch’e-ki ad’ẹñwu ki Jihofa ma tene n nyọgba?

3. Am’ali ẹñwu neke jẹñwu uche ki biẹnẹ eju Jihofa?

Baibul kakini ‘omi achiwebẹtẹma eñmọ t’ẹgwule kp’enine ọtẹ eñmọ kp’ẹwñ awulu eche’ nyọ n. (1 Pita 4:3) Efu am’uche ẹbọ amonẹ ach’ichi ki ma ch’eju-wñ n, ma la an’ọwọ efu abutabu eche. K’a neke ch’onukwu Jihofa alo, otila i che k’a ra b’ẹñwu iwa tẹ.

 N’UMA NYỌGBA

 5. Ch’atẹko amonẹ ku ma m’ẹñwu k’ẹ kẹdọno

6. Jihofa atene k’a n’ẹdẹbọ

Jihofa atene k’a n’iko ọmẹmẹlẹ kp’abo akwọra unyi wa manyu amonukwu wa. Gba Akọla ñw Ujeju 8:15, ubilẹ mẹ ch’oluka oji ene-i:

• Abu ọgba Baibul-i du ña kakini Jihofa atene k’a n’ẹdẹbọ?

Jihofa atene k’abo-wñ ki nẹdẹbọ ku ma la n’iko ọmẹmẹlẹ dama. G’IFIDIO-i k’ẹ li alu ki dẹ efu am’ujeju lile wa e-ọgbọ ilẹ.

Gba Abo Galatia 6:10, ubilẹ mẹ ch’oluka oji am’ene-i:

• I dukpẹ k’a n’ọwọ ef’amuche k’amonẹ ache tak a du ña kaki a ch’ẹñwu “ki nyọ” ñwu amonẹ?

• Ele ẹñwu ajẹñwu ẹdọ wẹ bọ tule, e-ki ch’udu ñwẹ todu uche ku ma che abẹki e-ki kwefu ẹdọ wẹ?

• I n’iko k’amata kp’iye ki ch’Amẹnibenu Jihofa atu ku ma n’iko ọmẹmẹlẹ kp’amọma ma ku ma la d’ẹñwu ele ñwu ma. Ichẹñwu k’ẹ n’amọma, ẹñwu ch’amẹñwu ọmẹmẹlẹ k’ẹ neke che ñwu ma?

 ẸY’ỌLA UKỌ-I

Jihofa atene k’a n’iko ọmẹmẹlẹ kp’abo akwọra unyi wa manyu amonukwu wa. Ama, i tene k’a n’ọwọ ef’amuche ki akp’ọ ẹdọ biẹ n.

Ẹñwu ẹ kọchẹ?

• Am’ene ẹñwu a neke tẹ ki ajẹñwu wa ma ichẹñwu k’uche ka ajẹñwu ẹdọ Jihofa bọ abẹki i jẹñwu ẹdọ-wñ bọ n?

• Abu a neke ch’atẹko abo akwọra unyi wa ku ma n’anẹreju lẹgwu ẹñwu k’a tu lugbo am’uche ojoji ojoji?

• Ẹñwu jẹñwu wa ma kaki Jihofa atene k’a n’ẹdẹbọ k’a la n’iko ọmẹmẹlẹ kp’ọla wa?