ĨSOMO YA 44
Nĩ Sikũkũ Syonthe Imũtanĩthasya Ngai?
Yeova nĩwendaa tũtanĩe thayũ, o na nĩwendaa twĩtanĩthye mavinda amwe. Ĩndĩ nĩ sikũkũ syonthe imũtanĩthasya? Tũtonya ata kwonanyʼa wendo witũ kwa Yeova ũndũnĩ ũũ?
1. Nĩkĩ sikũkũ mbingĩ itamwendeeasya Yeova?
No ũsengʼe wamanya kana sikũkũ mbingĩ iyumanĩte na Mbivilia ĩndĩ syumanĩte na andũ matamũĩkĩĩaa Ngai. Sikũkũ ta isu nĩvatonyeka ikethĩwa ikonanĩtye na ndĩni sya ũvũngũ. O na nĩvatonyeka ikethĩwa ikonanĩtye na maveva mavuku, kana ikethĩwa syumanĩte na woni wa kana thayũ ndũkusaa. Nasyo sikũkũ ingĩ syumanĩte na maũndũ ma ũwe, mũĩkĩĩo wa kana ũndũ mũthũku no wĩkĩke kĩthĩo kĩna kyalea kũatĩĩwa, na ingĩ syumanĩte na kũĩkĩĩa ĩvuso. (Isaia 65:11) Yeova akanĩtye athaithi make akamea atĩĩ: “[Ekai] kũkiita kĩndũ kĩte kĩtheu.”—2 Akolintho 6:17. a
2. Yeova ewʼaa ata ĩũlũ wa sikũkũ sya kũkumya andũ?
Yeova nũtũkanĩtye tũikese kũlika kĩteinĩ kya ‘kũĩkĩĩa mũndũ.’ (Soma Yelemia 17:5.) Sikũkũ imwe ikumasya asumbĩ ma nthĩ kana ngũmbaũ sya kaũ. Ingĩ syĩthĩawa sya kũkumya nthĩ na kũtanĩa mũthenya ũla yakwatie wĩyathi. (1 Yoana 5:21) Na nthĩnĩ wa sikũkũ ingĩ andũ nĩmakumasya syama sya siasa kana ngwatanĩo ingĩ sya andũ. Yeova atonya kwĩwʼa ata twanenga mũndũ kana kĩkundi nguma ivĩtũkĩte, na mũno mũno kĩla kĩkwataa mbau mawoni matekwĩtĩkĩlana na kĩeleelo kyake?
3. Nĩ imanyĩo syĩva itonya kũtuma sikũkũ syĩthĩwa itetĩkĩlĩka?
Mbivilia nĩvatanĩte ‘kũnywʼa mũno, mboka itaĩle na syathĩ sya kũnywʼa.’ (1 Vetelo 4:3) Sikũkũnĩ imwe andũ nĩmaemawa nĩ kwĩsiĩĩa na mayĩthĩa mekie maũndũ mataĩle. Nĩ kana tũendeee kwĩthĩwa twĩ anyanya ma Yeova, nĩtwaĩle kwĩvathana na mĩtuo ĩsu mĩvuku.
ĨMANYĨSYE MŨNANGO
Ĩmanyĩsye wone ũndũ ũtonya kũmũtanĩthya Yeova kwa kwĩka motwi maseo ĩũlũ wa sikũkũ.
4. Ĩvathane vyũ na sikũkũ ila itamwendeeasya Yeova
Somai Aeveso 5:10, na ĩndĩ mũineenea makũlyo aa:
-
Nĩ kyaũ twaĩle kũĩkĩĩthya yĩla tũũtwʼa ethĩwa nĩtũũtanĩa sikũkũ?
-
Nĩ sikũkũ ta syĩva syĩ nguma kĩsionĩ kĩla wĩkalaa?
-
We nũkwona sikũkũ isu ta imwendeeasya Yeova?
Kwa ngelekanyʼo, waaĩkũlya we Ngai onaa ata kũtanĩa mũthenya wa kũsyawa? Mbivilia ndĩwetete mũthũkũmi o na ũmwe wa Yeova waatanĩa mũthenya wake wa kũsyawa, ĩndĩ nĩwetete mĩthenya ĩlĩ ya kũsyawa yatanĩiwe nĩ andũ elĩ matamũthaithaa. Somai Mwambĩlĩlyo 40:20-22 na Mathayo 14:6-10. Na ĩndĩ, mũineenea makũlyo aa:
-
Mĩthenya ĩsu ĩlĩ ya kũsyawa yĩ na maũndũ meva mavwʼanene?
-
Kwosana na ngelekanyʼo isu ilĩ syĩ Mbivilianĩ, we wĩona Yeova ta wĩwʼaa ata ĩũlũ wa kũtanĩa mũthenya wa kũsyawa?
O na ĩngĩ no wĩkũlye, ‘Kwa wʼo Yeova nĩ ũũmĩaa natanĩa mũthenya wa kũsyawa kana sikũkũ ingĩ ta isu itosanĩte na Maandĩko?’ Somai Kuma 32:1-8. Na ĩndĩ mũyĩloela VITIO, na mũineenea makũlyo aa maatĩĩe:
-
Nĩkĩ twaĩlĩte kwĩyĩkĩĩthya maũndũ ala Yeova wĩtĩkĩlaa?
-
Tũtonya kwĩka ũu ata?
Ũndũ tũtonya kũmanya ethĩwa sikũkũ ndĩmwendeeasya Ngai
-
Yo yumanĩte na ũmanyĩsyo ũte Mbivilianĩ? Ĩka ũkunĩkĩli ũmanye yumanĩte na kyaũ.
-
Nĩkumasya andũ, ngwatanĩo, kana ĩkakumya nthĩ? Tũmũkumasya Yeova mbee wa syĩndũ syonthe na tũĩkĩĩaa kana no we e weka ũtonya kũmina mathĩna ma nthĩ ĩno.
-
Syĩthĩo syayo nileanaa na myolooto ya Mbivilia? Twĩenda kũendeea kwĩthĩwa twĩ atheu mwĩkalĩlenĩ.
5. Tetheesya angĩ manenge ndaĩa maũndũ ala ũĩkĩĩaa
Nũtonya kwĩthĩwa ũte ũndũ wĩ laisi kũlea yĩla angĩ meũkũthingʼĩĩsya ũtanĩe vamwe namo sikũkũ itamwendeeasya Yeova. Maelesye ĩũlũ wa ũtwi waku na ũyĩka ũu wĩ na wũmĩĩsyo, na ũĩ. Nĩ kana wone ngelekanyʼo ya ũndũ ũtonya kwĩka ũu, ĩloelei VITIO.
Somai Mathayo 7:12, na ĩndĩ mũineenea makũlyo aa:
-
Kwosana na mũsoa ũsu, wĩona nũũ waĩle kwĩka ũtwi wa ethĩwa andũ ma mũsyĩ ala mate Aklĩsto nĩmeũtanĩa sikũkũ kana maitanĩa?
-
Ũtonya kwĩka ata nĩ kana ũĩkĩĩthye andũ ma mũsyĩ waku kana o na kau ndwĩtanĩa sikũkũ vamwe namo, nũmendete na nũmathĩnĩkĩaa?
6. Yeova endaa twĩkale twĩ atanu
Yeova endaa tũtanae vamwe na andũ maitũ ma mũsyĩ, na anyanya maitũ. Somai Mũtavanʼya 8:15, na ĩndĩ mũineenea ĩkũlyo yĩĩ:
-
Mũsoa ũsu wĩonanyʼa ata kana Yeova endaa twĩkale twĩ atanu?
Yeova nĩwendaa andũ make metanĩthye, na maitanĩa maũndũ me vamwe. Ĩloelei VITIO nĩ kana mwone ũndũ maũmbano manene ma nthĩ mbingĩ maĩkĩĩthĩtye ũndũ ũsu.
Somai Akalatia 6:10, na ĩndĩ mũineenea makũlyo aa:
-
Yo no nginya tũtanĩe sikũkũ ila itanĩawa nĩ andũ aingĩ ũmũnthĩ nĩ kana ‘twĩke andũ angĩ ũseo’?
-
Nĩ kyaũ kĩtonya kũtuma ũtana mũnango? Nĩ yĩla wanengane mũthĩnzĩo nũndũ kwĩ sikũkũ-ĩ, kana nĩ yĩla wanengane kwa ngenda?
-
Mavinda kwa mavinda Ngũsĩ mbingĩ nimanthaa ĩvinda ya kwĩtanĩthya vamwe na syana syoo, o na kũithooea mĩthĩnzĩo itataĩĩe. Ethĩwa wĩ na syana, nĩ maũndũ ta meva ma mwanya ũtonya kũsyĩka?
ANDŨ AMWE MAASYA: “Kũmanya ũndũ sikũkũ imwe syambĩĩiwʼe ti kwa vata. Kĩla kya vata nĩ kũtanĩa vamwe na andũ maitũ ma mũsyĩ na anyanya.”
-
We ũtonya kwasya ata?
KĨLA TWEEMANYĨSYA
Yeova nĩwendaa tũtane vamwe na mĩsyĩ yitũ na anyanya maitũ. Ĩndĩ nĩwendaa twĩvathane na sikũkũ ila itamwendeeasya.
Makũlyo ma Kũsyokeleela
-
Ũtonya kũmanya ata ethĩwa sikũkũ ndĩmwendeeasya Yeova?
-
Tũtonya ata kũtetheesya andũ maitũ ma mũsyĩ na anyanya maelewe motwi ala twĩkĩte ĩũlũ wa sikũkũ?
-
Nĩ kyaũ kĩũkũĩkĩĩthya kana Yeova nĩwendaa twĩtanĩthasye?
MAŨNDŨ ANGĨ MA KWĨMANYĨSYA
Soma ũmanye ĩũlũ wa sikũkũ imwe Aklĩsto ma wʼo matatanĩaa.
“Nĩkĩ Ngũsĩ sya Yeova Itatanĩaa Sikũkũ Imwe?” (Ũvoo wĩ kĩsesenĩ)
Soma wone itumi inya syonanĩtye nĩkĩ tũĩkĩĩaa kana kũtanĩa mĩthenya ya kũsyawa kũimwendeeasya Ngai.
“Nĩkĩ Ngũsĩ sya Yeova Itatanĩaa Mũthenya wa Kũsyawa?” (Ũvoo wĩ kĩsesenĩ)
Sisya wone ũndũ syana nini itonya kũmũtanĩthya Yeova ĩvindanĩ ya masikũkũ.
Aklĩsto milioni mbingĩ nĩmanyuvĩte kũlea kũtanĩa sikũkũ ya Kĩlisimasi. Ũtwi ũsu mekĩte ũtumaa mewʼa ata?
“Nĩmakwatie Kĩndũ Kĩseango” (Mũsyaĩĩsya, Ĩtukũ 1, Mwei wa 12, 2012)
a Sisya Maelesyo ma Mũthya Namba 5 ũmanye ũndũ waĩle kwĩka yĩla andũ ala angĩ meũtanĩa sikũkũ ta isu.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
