U Jehobah u kwah ïa ngi ban don ka jingim kaba kmen bad wat ban leh sngewbha ne khawai ruh hateng hateng. Hato U Jehobah u pdiang ïa ki jingleh sngewbha bad ki jingrakhe baroh? Kumno ngi lah ban pyni ïa ka jingieid jong ngi ïa U ha kane ka bynta?

1. Balei U Jehobah um pdiang ïa baroh ki jingrakhe ne ki jingkhawai?

Phi lah ban sngewlyngngoh ban tip ba bun na ki jingrakhe ki long pyrshah ïa ki jinghikai jong ka Baibl ne ki mih na ki jingmane bleithaw. Kum kita ki jingrakhe ki lah ban don jingïadei bad ki niam ba hikai bakla. Ki lah ban don jingïadei bad ka jingleh byrtong ne ha ka jingngeit ba ka mynsiem kam ju ïap. Don ruh kiba mih na ka jingngeit biej ne na ka jingngeit ha ka nusib. (Isaïah 65:11) U Jehobah u maham ïa ki nongmane jong u: “To pynïakhlad noh ïalade . . . bad to wat ktah shuh ïa kabym khuid.”—2 Korinth 6:17. a

2. Kumno U Jehobah u sngew shaphang ki jingrakhe kiba ai burom ïa ki briew?

U Jehobah u maham ïa ngi ba ngim dei ban ngop ha ka jingriam ban “shaniah ha u briew.” (Pule Jeremaïah 17:5.) Don ki sngi kiba la jied kyrpang ban ai burom ïa ki nongsynshar ne ïa ki shipai. Kiwei pat ki rakhe ïa ka sngi laitluid ne ki pyndonburom ïa ki dak jong ka ri. (1 Ïoannis 5:21) Don pat kiba kynmaw burom ïa ki jingïakhih jong ki seng bhalang ne ki seng saiñ pyrthei. Kumno U Jehobah un sngew lada ngi ai burom ïa u briew ne ïa kano kano ka seng, khamtam ïa kito kiba long pyrshah ïa ka jingthmu jong U?

3. Ki jinglong kiba kumno kiba lah ban pynlong ïa ka jingïaleh kmen kabym lah ban pdiang da U Jehobah?

Ka Baibl ka pynrem ïa ka ‘jingkyrni dih kyiad, ka jingïadih kyiad khynwin, bad ka jingïadih buaid.’ (1 Petros 4:3) Don ki jingkhawai ha kaba ki briew kim lah ban tehlakam ïalade bad ki leh ïa kiei kiei kiba khlem akor. Ban ïailong ki paralok jong U Jehobah, ngi donkam ban kiar na kum kine ki jingleh bym khuid.

 WAD SHUH SHUH

 5. Ïarap ïa kiwei ban burom ïa ka jingngeit jong phi

6. U Jehobah u kwah ïa ngi ban long kiba kmen

U Jehobah u kwah ba ngin ïa lehkmen bad la ki bahaïing bad ki paralok ruh. Pule Ekklesiastis 8:15, bad peit lang ïa kane ka jingkylli harum:

• Kumno kane ka dkhot Baibl ka pyni ïa ngi ba U Jehobah u kwah ïa ngi ban long kiba kmen?

U Jehobah u kwah ïa ki shakri jong u ban ïa leh kmen leh sngewbha lang. Peit ïa ka VIDEO ban tip kumno kane ka long shisha ha ki jingïaseng heh International Convention.

Pule Galatia 6:10, bad sa ïa peit lang ïa kine ki jingkylli harum:

• Hato ngi donkam ban rakhe ïa kano kano ka sngi bakyrpang khnang ban leh bha ïa kiwei?

• Ka jingai kaba kumno kan kham pynkmen ïa phi—ban ai namar ba ngi hap ban ai ha kata ka sngi bakyrpang ne ban ai sngewbha ha kano kano ka sngi?

• Bun na ki Nongsakhi U Jehobah ki ju leh sngewbha bad la ki khun ha kano kano ka sngi bad ki ju ai sngewbha ruh ïa ki ha ka por ba ki khun kim poi pyrkhat. Lada phi don khun, phi lah ban leh kyrpang aïu na ka bynta jong ki?

 KI MAT BAKONGSAN

U Jehobah u kwah ïa ngi ban ïa leh sngewbha bad la ki bahaïing bad ki paralok ruh. Hynrei u kwah ïa ngi ban kiar na ki jingrakhe kibym pynsngewbha ïa u.

Peit Biang

• Kiei ki jingkylli kiba ngi lah ban kylli khnang ban tip la ka jingrakhe ka pynsngewbha ne em ïa U Jehobah?

• Kumno ngi lah ban ïarap ïa la ki bahaïing bad ki paralok ban sngewthuh ïa ka rai jong ngi shaphang kano kano ka jingrakhe?

• Kumno phi tip ba U Jehobah u kwah ïa ngi ban long kiba kmen bad ban leh sngewbha?