KIFUNDWA 44
Le Mafetyi Onso Asangajanga Leza?
Yehova usakanga tusangele būmi enka ne kufeta’ko kyaba kimokimo. Ino le mafetyi onso amusangajanga? I muswelo’ka otukalombola’mba tusenswe Yehova mu uno mwanda?
1. Mwanda waka mafetyi mavule keasangajangapo Yehova?
Padi ukatulumuka pa kuyuka’mba mafetyi mavule emanine pa bufundiji kebudipo mu Bible nansha bushilukile ku bantu ba mizo. Mafetyi a uno muswelo avudile kukwatañana na bipwilo bya bubela. Akokeja kwikala’mo myanda ya majende nansha kwimanina pa milangwe ya amba muya keufwangapo. Mafetyi amo i matambe ku milangwe ya kabutyibutyi ne ya kukulupila mu leza dyese. (Isaya 65:11) Yehova udyumuna batōtyi bandi amba: “[Mwisansanyei] . . . kadi lekai kutenga kintu kya disubi.”—2 Bene Kodinda 6:17. a
2. Lelo Yehova wiivwananga namani shi tufeta mafetyi mobatumbija bininge bantu?
Yehova witudyumuna tuleke kuponena mu dikinga dya kukulupila “mu bantu ba bituputupu.” (Tangai Yelemia 17:5.) Mafetyi amo atumbijanga bendeji nansha basola. Makwabo atumbija dipandá nansha biyukeno bya ntanda, kimfwa ndalapo. (1 Yoano 5:21) Angi nao atumbija bisumpi bya politike nansha bya bantu. Le Yehova ukeivwana namani shi tulēmeka mu muswelo wampikwa kufwaninwa muntu nansha bulongolodi kampanda, nakampata bobwa butumbija mpango mishile na yandi?
3. I bilongwa’ka bikokeja kulengeja fetyi ileke kwitabijibwa?
Bible upeleja “mutomeno-mpata, mafetyi mabimabi, kutomatoma mālwa mangi.” (1 Petelo 4:3) Mu mafetyi amo mwikalanga bilongwa bya bulongelonge ne busekese. Pa kwikala nyeke balunda na Yehova, tufwaninwe kupaluka bino bilongwa bya disubi.
LANGULUKA BININGE
Tala muswelo obwanya kusangaja Yehova na kukwata butyibi bwa tunangu mu myanda itala mafetyi.
4. Pela mafetyi onso afutulwija Yehova
Tangai Bene Efisesa 5:10, ne kwisambila pa bino bipangujo:
-
Le tufwaninwe kuyuka bika kitatyi kyotukwata butyibi bwa kukatanwa ku fetyi kampanda?
-
Le i mafetyi’ka avudile kwenu?
-
Molangila ao mafetyi’o asangajanga Yehova?
Kimfwa, padi ye uno kodi mwiipangule shi Leza umonanga namani mafetyi a kuvuluka mafuku a kubutulwa? Bible katelelepo mutōtyi wa Yehova nansha umo wādi uvuluka mafuku a kubutulwa, ino i mutele enka mafuku a kubutulwa ālongelwe na bantu babidi kebādipo bengidila Yehova. Tangai Ngalwilo 40:20-22 ne Mateo 14:6-10. Kupwa, mwisambilei pa bino bipangujo:
-
Le ano mafetyi onso abidi i meifwane paka?
-
Mungya ino nsekununi ya mu Bible, le ulanga Yehova witabije kufeta mafuku a kubutulwa?
Padi ye uno wiipangula’mba, ‘Le Yehova untalanga shi naenda kukatanwa ku fetyi ya kuvuluka difuku dya kubutulwa nansha ku mikwabo yampikwa kukwatañana na Bisonekwa?’ Tangai Divilu 32:1-8. Kupwa, talai VIDEO ne kwisambila pa bino bipangujo:
-
Mwanda waka tufwaninwe kujingulula byobya bitabijibwe na Yehova?
-
Ne tukebijingulula namani?
Mwa kuyukila mafetyi afītyija mutyima wa Leza
-
Le emanine pa bufundiji kebudipo mu Bible? Pa kuyuka, tala kwine kutambile fetyi’ya.
-
Le atumbijanga mu muswelo wampikwa kufwaninwa bantu, malongolodi, nansha biyukeno bya ntanda? Tutumbijanga Yehova kupita kintu kyo-kyonso, kadi tukulupile mwadi amba ye aye ukapwija makambakano a ino ntanda.
-
Le bisela ne bilongwa bilongwa’mo i byobya bipelejibwe na Bible? Tukimba kushala nyeke batōka mu mwikadilo.
5. Kwasha bakwabo balēmeke nkulupilo yobe
Bikokeja kwikala bikomo kupela kitatyi kikuningila bakwabo kukatanwa ku mafetyi keasangajapo Yehova. Nanshi wibashintulwile butongi bobe na kitūkijetyima ne na bunwa. Pa kuyuka mwa kulongela, talai VIDEO.
Tangai Mateo 7:12, ne kwisambila pa bino bipangujo:
-
Mungya uno vese, le ufwaninwe kusapwila ba kisaka bampikwa kwitabija amba kebafwaninwepo kwenda ku ano mafetyi?
-
Le ukakulupija namani ba kisaka’mba nansha shi kwendelepo nabo ku ano mafetyi, wi mwibasanswe kadi wibatele mutyima?
6. Yehova usakanga twikale na nsangaji
Yehova usaka tusangele pamo na balunda ne bisaka. Tangai Musapudi 8:15, ne kwisambila pa kino kipangujo:
-
Le uno vese ulombola namani amba Yehova witusakilanga twikale na nsangaji?
Yehova usaka bantu bandi bekale kusangala ne kuloelelwa kya pamo. Talai VIDEO mumone mumwekelanga ino nsangaji ku bitango byetu bya matanda.
Tangai Bene Ngalatea 6:10, ne kwisambila pa bino bipangujo:
-
Lelo pa kulongela bakwetu “biyampe,” bilomba’nka kwenda ku mafetyi atumbile?
-
Le i kupāna kwa muswelo’ka kukakuletela nsangaji—i kokwa kobakuningila’ni nansha i kokwa kopāna ku kusaka?
-
Batumoni bavule bekalanga bateakanya’ko ne bitatyi bya pa bula pamo na babo bana mwanda wa kwibapa’ko ne tubyabuntu mu kitulumukila. Shi udi na bana, le i byabuntu’ka bikwabo byobwanya kwibapa?
BANTU BAMO BANENANGA’MBA: “Kokwa kutambile fetyi kekudipo na mwanda. Kiyampe’ko i kwitana’tu pamo na kisaka ne na balunda.”
-
Le ukanena’po namani?
MU KĪPI
Yehova usakanga tusangele pamo na kisaka ne balunda. Ino kadi usakanga twepuke mafetyi amufītyija mutyima.
Pitulukai’mo
-
Le i bipangujo’ka bibwanya kukukwasha ujingulule shi fetyi kampanda ifītyijanga mutyima wa Yehova?
-
I muswelo’ka okakwasha ba kisaka ne balunda bevwanije butyibi bobe mu mwanda utala mafetyi?
-
I bika bikulombola’mba Yehova usakanga tusangale?
KIMBA
Tala mafetyi amoamo keafetangapo bene Kidishitu.
“Mwanda Waka Batumoni ba Yehova Kebafetangapo Mafetyi Amoamo?” (Kishinte kya pa Entelenete)
Tala bubinga buná bwitukulupija’mba Leza ushikilwe mafetyi a kuvuluka difuku dya kubutulwa.
“Mwanda Waka Batumoni ba Yehova Kebafetangapo Mafuku a Kubutulwa?” (Kishinte kya pa Entelenete)
Tala bana basenswe Yehova mobabwanya kumusangeja mu bitatyi bya mafetyi.
Bene Kidishitu bavule bapelanga kufeta Noele. Le beivwananga namani pa buno butongi bwabo?
“Basokwele Kintu Kitabukile Kunengela” (Kiteba kya Mulami, 1 Kweji 12, 2012)
a Tala Bilembwa bya ku Mfulo 5 uyuke bya kulonga mu myanda itala mafetyi.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
