DILONGESHA DIA 44
Nzambi utu wanyisha mafesto onso anyi?
Yehowa mmusue bua tuikale tusanka ne tuikale mene tuenza mafesto bikondo bikuabu. Kadi utu wanyisha mafesto ne bibilu bionso bitu bantu benza anyi? Mu bualu ebu, tshitudi mua kuenza bua kuleja ne: tudi banange Yehowa ntshinyi?
1. Bua tshinyi Yehowa katu wanyisha mafesto a bungi?
Pamuapa bidi mua kukukemesha bikole wewe mumvue ne: mafesto a bungi atu bantu benza lelu mmafumine mu malongesha a bampangano atu kaayi mu Bible to. Mafesto au adi mua kuikala mangatshila mu ntendelelu ya dishima. Adi mua kuikala mu diumvuangana ne malu a mîdima anyi mapatuila mu dilongesha dia ne: anyima wa muntu katu ufua to. Amue mafesto mmafumine ku bitabataba bia buôwa anyi ku lungenyi lua dituta dikasa dimpe. (Yeshaya 65:11) Kadi Yehowa udi udimuija bantu bende ne: “Nuditapulule kudibu . . . ne lekelayi kulenga tshintu tshia bukoya.”—2 Kolinto 6:17. a
2. Yehowa utu umona mafesto adi apesha bantu butumbi budi kabuyi bubakanyine mushindu kayi?
Yehowa udi utudimuija bua katukuatshiki mu buteyi bua ‘kueyemena bantu betu ba patupu’ aba to. (Balayi Yelemiya 17:5.) Kudi mafesto adi atumbisha bakokeshi anyi basalayi. Makuabu atu atumbisha bimanyinu bia ditunga anyi matuku a dipanda. (1 Yone 5:21) Manga pawu atu owu atumbisha malongolodi a tshididi anyi a tshinsangansanga tshia bantu. Bituikala tupesha muntu anyi bulongolodi kampanda butumbi budi kabuyi bubuakanyine, nangananga bikala muntu au anyi bulongolodi abu busakangana ku malu adi abengangana ne disua dia Nzambi, ntshinyi tshidi Yehowa mua kumvua?
3. Mbikadilu kayi bidi mua kuvuija difesto dibi ku mêsu kua Nzambi?
Bible mmukandike “dinua dipitshisha, bibilu bia bisankasanka, [ne] bunuavi.” (1 Petelo 4:3) Mu amue mafesto, bantu batumu ne bikadilu bibi bia dipanga kudikanda ne bia buenzavi bua malu a busenji. Nanku tuetu basue kushala balunda ba Yehowa, tudi ne bua kuepukila bikadilu bia malu a bukoya abi anu kule.
BUELA MU BUONDOKE
Mona muudi mua kulengelela Yehowa pawangata mapangadika a meji adi atangila malu a bibilu ne mafesto.
4. Benga mafesto adi anyingalaja Yehowa
Balayi Efeso 5:10, pashishe nuandamune nkonko eyi:
-
Mbualu kayi butudi ne bua kukeba bua kumanya kumpala kua kupangadija bua kuenza difesto kampanda?
-
Mmafesto kayi atu atamba kuenzeka muaba unudi?
-
Buebe wewe, Yehowa udi wanyisha mafesto au anyi?
Tshilejilu, ukadiku mudiebeje mutu Yehowa umvua bua mafesto a mifikilu ya diledibua anyi? Mu Bible, kabatu batelamu mutendeledi wa Yehowa nansha umue uvua musekelele dituku dia mufikilu wa diledibua to; kadi mbatelamu anu matuku a mifikilu ya diledibua dia bantu babidi masekelela kudi bavua kabayi batendelela Yehowa. Balayi Genese 40:20-22 ne Matayi 14:6-10. Pashishe nuandamune nkonko eyi:
-
Mafesto onso abidi a mifikilu ya diledibua aa avua mafuanangane ku tshinyi?
-
Bilondeshile malu adibu balonde mu mvese eyi, udi umona ne: Yehowa udi umona disekelela dia mifikilu ya matuku a diledibua mushindu kayi?
Pamuapa udi mufuane kudiebeja ne: ‘Pandi nya mu difesto dia mufikilu wa diledibua anyi mu difesto dikuabu didi Bible kayi wanyisha, bidi bitonda Yehowa anyi?’ Balayi Ekesode 32:1-8. Pashishe, nutangile FILME ne nuandamune nkonko idi ilonda.
-
Bua tshinyi mbimpe kukonkonona difesto dionso bua kumanya ni ndianyishibue kudi Yehowa?
-
Tudi mua kuenza nanku mushindu kayi?
Mua kumanya difesto didi kadiyi disankisha Nzambi
-
Ndipatuila mu malongesha adi abengangana ne Bible anyi? Bua kumanya, keba kudidi difumine.
-
Didi dipesha bantu, malongolodi, anyi bimanyinu bia matunga butumbi budi kabuyi bubiakanyine anyi? Yehowa ke utudi tuetu tutumbisha kumpala kua bionso; yeye ngutudi tueyemena bua kujikija ntatu idi pa buloba.
-
Malu adi enzekamu adi abengangana ne mikenji ya mu Bible anyi? Tudi ne bua kudilama bakezuke mu bikadilu.
5. Ambuluisha bakuabu bua banemeke ditabuja diebe
Bidi mua kukukolela bua kukandamana padi bakuabu bakusaka bua kuditua nabu mu bibilu bidi kabiyi bisankisha Yehowa. Bumvuija mapangadika ebe ne lutulu ne bukalanga. Bua kumanya mua kuenza nanku, tangilayi FILME.
Balayi Matayi 7:12, pashishe nuandamune nkonko eyi:
-
Bilondeshile mvese eu, mbimpe wewe kukandika bena mu dîku dienu badi kabayi Bantemu bua kabenji difesto kampanda anyi?
-
Tshia kuenza ntshinyi bua kujadikila ba mu dîku dienu ne: nansha muwikala kuyi mua kuenza nabu mafesto abu, udi anu mubanange ne ubangata ne mushinga?
6. Yehowa mmusue bua tuikale ne disanka
Yehowa mmusue bua tuikale tusanka pamue ne balunda betu ne mêku etu. Balayi Muambi 8:15, pashishe nuandamune lukonko elu:
-
Mmushindu kayi udi mvese eu uleja ne: Yehowa mmusue bua tuikale ne disanka?
Yehowa mmusue bua bantu bende bikalaku ne dîba dia kusanka, basanka pamue ne bana babu. Tangilayi FILME umone mutubi bidimuenekela dîba dia mpungilu ya bantu bafume mu matunga a bungi.
Balayi Galatiya 6:10, pashishe nuandamune nkonko eyi:
-
Bua kuenzela bakuabu “malu mimpe” bidi bikengela anu tuetu babuele nabu mu mafesto manene atu bavule benza anyi?
-
Tshiakuvudijila disanka ntshinyi? Nkudimona ne dibanza dia kupeshangana kado dîba dia mafesto anyi nkupeshangana bintu padi muoyo ukusaka bua kufila?
-
Bantemu ba bungi batu misangu mikuabu balongoluelaku bana babu balela bikondo bia pa buabi bia kusankaku ne babapesha mene tudo tuvuabu kabayi batekemene to. Biwikala ne bana, mmalu kayi a pa buawu audi mua kubenzela?
BAMUE BATU BAMBA NE: “Kuakafumina difesto ki nkudi ne bualu to. Tshia mushinga ntshia kusanka pamue ne balunda ne mêku etu.”
-
Udi wewe mua kubambila tshinyi?
TSHIA KUKUATA
Yehowa mmusue bua tuikale tusankaku pamue ne balunda betu ne mêku etu. Kadi mmusue kabidi bua tuepuke mafesto adiye kayi wanyisha to.
Diambulula
-
Nnkonko kayi itudi mua kudiela bua kumanya bikala Yehowa kayi wanyisha difesto kampanda?
-
Mmunyi mutudi mua kuambuluisha balunda betu ne balela betu bua kumvuabu luseke lutudi mu malu a amue mafesto?
-
Ntshinyi tshidi tshikuleja ne: Yehowa mmusue bua tuikale ne disanka, tusankaku pamue ne bakuabu?
BIA KUTANGILA KABIDI
Mona amue mafesto masunguluke atu bena Kristo kabayi benza to.
“Bua tshinyi Bantemu ba Yehowa kabatu benza mafesto makuabu?” (Tshiena-bualu tshia mu jw.org)
Mona malu anayi adi atujadikila ne: Nzambi kena wanyisha mafesto a mifikilu ya matuku a diledibua to.
Mona tshivua nsonga kampanda muenze ne bukalanga buonso pavua balongi nende bamuseka bua muvuaye kayi udia Nowele.
Bena Kristo miliyo ne miliyo mbapangadije bua kubenga kudia Nowele. Tshidibu bumvua bua dipangadika diabu edi ntshinyi?
“Mbapete tshidi tshitambe buimpe” (Tshibumba tshia Nsentedi, 1/12/2012)
a Tangilayi Dimanyisha 5 bua kumanya tshia kuenza mu malu kampanda adi atangila mafesto padi bakuabu baenza.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
