SULA MAR 44
Be Nyasi Duto Moro Nyasaye?
Jehova dwaro ni wabed mamor kendo wabed gi kinde moko mag timo nyasi. Kata kamano, be nyasi duto more? Ere kaka wanyalo nyiso ni wahero Nyasaye sama wayiero nyasi ma wadwaro timo?
1. Ang’o momiyo nyasi mang’eny ok mor Jehova?
Samoro inyalo wuoro kifwenyo ni nyasi moko nowuok kuom joma ok lam Nyasaye, kendo gikwedo puonj mag Muma. Nyalo bedo ni nyasigo otudore gi dinde mag miriambo. Bende, nyalo bedo ni gitudore gi timbe juok kata gi paro moro ni chuny ok nyal tho. Nyasi moko bende otudore gi kweche kod hawi. (Isaya 65:11) Jehova chiko jotichne niya: ‘Pogreuru kodgi, kendo weuru mulo gima ok ler.’—2 Jo-Korintho 6:17. a
2. Jehova neno nade nyasi mimiyogo jomoko luor e yo ma ok owinjore?
Jehova kwerowa ni kik wadonj e obadho mar ‘keto genowa kuom dhano.’ (Som Jeremia 17:5.) Nitie nyasi moko mipakogo jotelo kata jolweny. Moko to ipakogo pinje kod kinde ma ne giyude loch. (1 Johana 5:21) Nyasi moko to riwo lwedo weche siasa kata riwruoge mamoko. Jehova nyalo winjo nade sama wamiyo jomoko kata riwruoge moko luor e yo ma ok owinjore, to ahinya ahinya ka gitimo gik ma ok owinjore gi dwache?
3. Gin timbe mage ma nyalo miyo Nyasaye kik yie gi nyasi moro?
Muma kwero “metho mokalo tong’, nyasi mopong’ gi koko, [kod] metho ma ji piemie.” (1 Petro 4:3) Nitie nyasi moko ma ji timoe timbe mochido kendo gionge gi ritruok kata matin. Mondo wasik ka wan osiepe Jehova, nyaka wawere chuth gi timbe mochido kaka mago.
TIM NONRO
Non ane kaka inyalo moro Jehova sama iyiero nyasi midwaro timo.
4. Tamri nyasi ma Jehova osin-go
Som Jo-Efeso 5:10, kae to uwuo e wi penjo ma luwogi:
-
Ang’o ma nyaka wanon sama wadwaro yiero nyasi moro?
-
Gin nyasi mage ma ji ohero timo e alwora midakie?
-
Be iparo ni nyasigo moro Jehova?
Kuom ranyisi, iparo ni Nyasaye neno nade nyasi mag paro odiechienge nyuol? Muma ok wuo kuom jatich Jehova moro amora ma ne otimo nyasi mar paro odiechieng’ ma ne onyuolee. Kata kamano, owuoyo e wi ji ariyo ma ne ok lam Jehova ma ne otimo nyasi mar paro odiechieng nyuolgi. Som Chakruok 40:20-22 kod Mathayo 14:6-10, kae to uwuo e wi penjo ma luwogi:
-
En ang’o ma ne otimore e moro ka moro kuom nyasigo?
-
Kaluwore gi ndikogo, iparo ni Jehova neno nade nyasi mag paro odiechienge nyuol?
To pod inyalo penjori niya: ‘Jehova biro winjo nade ka atimo nyasi mar paro odiechieng nyuol kata nyasi mamoko ma Muma ok oyiego?’ Som Wuok 32:1-8. Bang’ mano, tug VIDIO, kae to uwuo e wi penjo ma luwogi:
-
Ang’o momiyo onego wang’e gik ma moro Jehova?
-
To ere kaka wanyalo timo kamano?
Ere kaka inyalo ng’eyo ka be Nyasaye oyie gi nyasi moro?
-
Be Muma oyie gi nyasino? Mondo iyud dwoko mar penjono, inyalo nono kaka nyasino nochakore.
-
Be nyasino en ma ichiwogo luor ma ok owinjore ne dhano, riwruok moro, kata piny moro? Wamiyo Jehova luor moloyo ng’ato ang’ata kata gimoro amora, kendo wang’eyo ni en e ma obiro tieko chandruoge mag piny.
-
Be gik ma timore e nyasino kwedo puonj mag Muma? Nyaka wasik ka wan gi timbe maler.
5. Kony jomamoko mondo gichiw luor ne puonj miyiego
Nyalo bedo matek tamruok timo nyasi moro ma Jehova ok oyiego sama jomoko chunowa ni watim kamano. Ti gi rieko sama ileronegi gimomiyo ok inyal dhi e nyasino kendo itim kamano e yo mang’won. Mondo ing’e kaka inyalo timo kamano, tug VIDIO.
Som Mathayo 7:12, kae to uwuo e wi penjo ma luwogi:
-
Kaluwore gi ndikono, be onego inyis joodu ma ok gin Joneno ni kik gitim nyasi moro?
-
Ang’o ma inyalo timo mondo inyisgi ni pod iherogi kata obedo ni ok itim nyasi moro kanyachiel kodgi?
6. Jehova dwaro ni wabed mamor
Jehova dwaro ni wabed mamor kanyachiel gi joodwa kod osiepewa. Som Eklesiastes 8:15, kae to uwuo e wi penjo ma luwoni:
-
Ere kaka ndikono nyiso ni Jehova dwaro ni wabed mamor?
Jehova dwaro ni jotichne obed mamor. Tug VIDIO mondo ine kaka mano timorega e chokruoge madongo moriwo pinje.
Som Jo-Galatia 6:10, kae to uwuo e wi penjo ma luwogi:
-
Be ochuno ni watim nyasi ma ji ohero timo eka wanyis ni ‘watimo gik mabeyo’ ne jomamoko?
-
E kind gik moko ariyogi, mane ma nyalo miyo ibed mamor moloyo? Chiwo mich mana nikech en odiechieng nyasi koso chiwo mich nikech idwaro timo kamano kowuok e chunyi?
-
Joneno mag Jehova oheroga miyo nyithindgi mich kata timonegi gik ma nyiso ni giherogi. Ka in gi nyithindo, gin gik mage mabeyo minyalo timonegi?
PARO MA JOMOKO NIGO: “Kaka nyasi moro nochakore ok e gima duong’. Gima duong’ en bedo gi kinde maber kanyachiel gi joodu kod osiepeni.”
-
Ineno nade wachno?
PUONJ MADUONG’
Jehova dwaro ni wabed mamor kanyachiel gi joodwa kod osiepewa. To bende odwaro ni wawere gi nyasi ma ok more.
Ang’o ma ipuonjori?
-
Gin penjo mage ma wanyalo penjore mondo okonywa ng’eyo ka be Nyasaye oyie gi nyasi moro kata ooyo?
-
Ere kaka wanyalo konyo joodwa kod osiepewa mondo ging’e gimomiyo ok watim nyasi moko?
-
Wang’eyo nade ni Jehova dwaro ni wabed mamor?
MED TIMO NONRO
Non ane moko kuom nyasi ma Jokristo ok tim.
“Ang’o Momiyo Joneno mag Jehova Ok Timga Nyasi Moko?” (Sula ma yudore e jw.org)
Ne ane gik moko ang’wen ma nyiso ni nyasi mag paro odiechienge nyuol ok mor Nyasaye.
“Ang’o Momiyo Joneno mag Jehova Ok Tim Nyasi mag Paro Odiechienge Nyuol?” (Sula ma yudore e jw.org)
Ne ane kaka nyithindo matindo mohero Jehova nyalo more e kinde mag nyasi.
Jokristo madier ok timga nyasi mar Krismas. Gineno nade yiero ma gisetimono?
“Ne Giyudo Gima Ber Moloyo” (Ohinga mar Jarito, Desemba 1, 2012)
a Som Weche Momedore namba 5 mondo ing’e gima inyalo timo sama jomoko timo nyasi moko.
Samoro Inyalo Hero Magi Bende
PENJO MA JI JOPENJO
Ere Kaka Joneno mag Jehova Puonjoga Ji Muma?
E puonjruok Muma ma Joneno mag Jehova tayoga, inyalo tiyo gi Muma moro amora mihero. Bed thuolo gwelo joodu duto kata osiepeni e puonjruok.
