CILONGESA 44

Vuno Vilika Viose vie Kuya Njambi ku Mutima Ni?

ZIKULENU

Yehova ua tonda tu yoye mu ndzolela kaha na ku linga vene vilika vintsimbu vimo. Vunoni ha katuka cihula, vuno vilika na matangua ose a ku huima vie ku muya ku mutima ni? Vati tu hasa ku muesa cilemo cetu kuli Yehova mu cimpande eci?

1. Omo lia vika cingi ca vilika ka vie kuya Yehova ku mutima?

Ci hasa ku mi komouesa ku tantekeya ngecize cingi ca vilika, via tunda ha vilongesa via makuli ni ku vakua mavu. Kaha vimo, via likuata na vulombelo vua makuli, vikuavo via mahamba. Kaha kasi kuli vikuavo vi va tundisa ha cilongesa, ca muono ka ue ku-tsa, vizila via vantu na soliti. (Isaya 65:11) Yehova ua lungula vakua ku mu lemesa ngueni: ‘Lihangunukenu navo . . . kaha kati mu kuate cuma ca ku zuala.’—2 Kolintu 6:17, NWT. a

2. Vati Yehova ue ku livua ku mutima ku tuala ha vilika vie ku hianesamo ku hana vumpahu kuli vantu?

Yehova ua tu mamuna kati tu uile mu ngandzo ya ku “tsiliela muli muntu.” (Tandenu Yelemiya 17:5.) Vimo vilika, vie ku hana vumpahu kuli vakua ku suana ni ku masualale. Vikuavo vie ku zumbangeya vitantekeyeso via cifuti ni litangua lia ku patuka ca cifuti. (1 Yoano 5:21) Kaha kasi kua kala vikuavo, vie ku zumbangeya vikota via vantu ni via pulitika. Vati Yehova a ka livua ku mutima nga tu hianesamo ku zumbageya muntu ni cimo cikota, cikuma-kuma nga cikota ni muntu uaco ue ku luisa cizango ceni?

3. Vilinga vika vi hasa ku lingisa Yehova ku viana cimo cilika?

Mbimbiliya ya vindika “ku penda viniu, na miyoyo ya ku viuano, na ku-zuela ca ku penda.” (1 Petulu 4:3) Ku vilika via vingi vantu ve ku linga liuayanga na viuma via masungu. Ngeci mukemuo, linga tu tualeleleho ku pua vavusamba va Yehova, tua pande ku kala ku laako na vilika viaco.

TANTEKEYENU VIKUAVO

Tantekeyenu vati mu hasa kuya Yehova ku mutima, mu ku linga vihangula via mana ku tuala ha matangua a ku huima na vilika.

4. Vianenu vilika vie ku sahula Yehova

Tandenu Efeso 5:10, kaha simutuilenu ha vihula evi:

Kapandi ka ka tua pande ku lihakela, ku tuala ha ku hangula nga tu linga vimo vilika ni kuahi?
Vilika vika via tsimana ku cihela ci mua kala?
Mu ku mona cenu, vilika viaco vie kuya Yehova ku mutima ni?

Ca ku muenako, mua singaniekaho laza vati Njambi ue ku muenamo vilika via ku semuka ca muntu ni? Mbimbiliya kaya muesele na umo ngamba ua Yehova uahi, ua lingile cilika ca ku semuka. Vunoni ya handeka via vilika vivali via ku semuka, vi va lingile vantu ka va puile vangamba veni. Tandenu Njenisisi 40:20-22; na Mateo 14:6-10. Kaha simutuilenu ha vihula evi:

Viuma vika via ku lifua via solokele ha vilika viose vivali?
Kuliya neyi mizimbu ya mu Mbimbiliya, mu ku mona cenu vati Yehova ue ku livua ku mutima ku tuala ha vilika via ku semuka?

Vunoni kasi mu hasa ku lihula nguenu, vuno cili vene nga nji linga cilika ca ku semuka ni nkala cilika ceka ka ca litombuele na visoneka, Yehova a ka vi tuala mana ni? Tandenu Ezundu 32:1-8. Mu nima yaco, talenu VIDEO kaha simutuilenu ha vihula vi na hatako.

VIDEO: Matangua a ku Huima na Vilika ka vie Kuya Njambi ku Mutima (5:07)

Omo lia vika tua pande ku lihakela kapandi ka ku tantekeya vize vie ku tava Yehova?
Vati tu hasa ku lingamo?

Mua ku tantekeyela nga cimo cilika ce kuya Njambi ku mutima ni kuahi

Vuno cilika caco, va ci tundisa mu Mbimbiliya ni? Linga mu hase ku tantekeya cikumbululo, tondesesenu ku ca tunda cilika caco.
Vuno ce ku zumbangeya vantu, vikota, ni vitantekeyeso via cifuti ni? Etu tue ku zumbangeya Yehova helu lia viose. Kaha tua kulahela ngecize ikeye lika a hasa ku manusula visoti ha mavu.
Vuno viuma vi ve ku linga ha cilika caco, vie ku liluisa na vitume via mu Mbimbiliya ni? Tua pande ku pua va ku lela mu vilinga.

5. Kuasenu vakuenu va singimike vi mua tsiliela

Ce ku pua ca cikalu ku viana ntsindiye ya vakuetu, ya ku linga cimo cilika ka ce kuya Yehova ku mutima. Puenu na ku lombolola vihangula vienu na lukakatela kaha na liano. Linga mu mone cimo cimueso ca vati mu hasa ku lingamo, talenu VIDEO.

VIDEO: Puenu na ku Lombolola vi mua Tsiliela na Liano (2:01)

Tandenu Mateo 7:12, kaha simutuilenu ha vihula evi:

Kuliya neci cinimbu, vuno citava mu vindike vavusoko vuenu ka va puile Vakaleho, ku linga cimo cilika ni?
Vika mu hasa ku linga, mangana mu hane vusunga ku vusoko vuenu ngecize vutuhu ka mu lingi cimo cilika navo, vunoni mua va lema na ku va haka seho?

6. Yehova ua tonda tu yoye mu ndzolela

Yehova ua tonda tu pue na ku uana ntsimbu ya ku viukilila na vavusoko vuetu kaha na vavusamba. Tandenu Ekelesiaste 8:15, kaha simutuilenu ha cihula eci:

Vati eci cinimbu ca muesa ngecize Yehova ua tonda tu yoye mu ndzolela?

Yehova ua tonda vantu veni va yoye mu ndzolela na ku viukilila ha kati kavo. Talenu VIDEO mu mone vati evi vie ku lisolola ku viuano vietu via vifuti.

VIDEO: Cifua ci tue ku Tambuilamo Vantu ku Viuano via Vifuti (5:40)

Tandenu Ngalata 6:10, kaha simutuilenu ha vihula evi:

Vuno ca tondeka tu linge vilika vi ve ku linga vantu linga tu hase ku panga “vize via viuka” kuli vakevo ni?
Ku hana cika ci hasa ku mi vuisa ndzolela—ku hanena ntsindiye ha litangua lia cilika ni ku hana ntsimbu yose-oyo i muli na vuana?
Vakaleho vavengi, ve ku lingila vana vavo viuma via ku lifuila kaha na ku va tungumuna na mavuana a cili. Nga mua kala na vana, viuma vika via ku lifuila mu hasa ku va lingila?

VAMO VE KU HANDEKA NGUAVO: “Oko kua tunda cilika caco ku kale. Ange vi nji tonda lika, ku viukilila na vavusoko vuange na vavusamba.”

Vati mu hasa ku kumbulula?

VI MU NA LILONGESA

Yehova ua tonda tu livuise ndzolela na vavusoko na vavusamba. Vunoni ua tonda naua tu liniunge ku vilika ka vie ku muya ku mutima.

Mpupulule

Vihula vika vi hasa ku tu kuasa ku hilula nga cimo cilika ce ku kuya Yehova ku mutima ni kuahi?
Vati tu hasa ku kuasa vavusoko vuetu na vavusamba, vevuisise omo lia vika ka tue ku linga vimo vilika?
Vati tua tantekeya ngecize Yehova ua tonda tu yoye mu ndzolela na ku vembua?

Cino cilongesa nji na ci manusula lia:

Lingenu Evi

Pangesenu vi mu na lilongesa mu cilongesa cino, mu hilule vilika via tsimana cikuma ku cihela ci mua kala.

Vikuavo:

Vikuavo vi mu hasa ku linga