OSHILESHWA 44
Mbela Kalunga okwa hokwa iituthi ayihe?
Jehova okwa hala tu nyanyukilwe onkalamwenyo, notu dhane iituthi omathimbo gamwe. Ihe mbela iituthi ayihe nomasiku gomafudho okwe yi hokwa ngaa? Otatu ka ulika ngiini kutya otu hole Jehova, ngele tashi ya piituthi nomasiku gomafudho?
1. Omolwashike iituthi oyindji ihaayi nyanyudha Jehova?
Otashi vulika wu ka kale wa kumwa, sho to ka uva kutya iituthi oyindji inayi ikolelela komalongo gOmbiimbeli nenge kutya oyoshipagani. Iituthi mbyoka otashi vulika yi na ekwatathano nomalongelokalunga giifundja. Otashi vulika wo yi na ekwatathano nuumpulile nenge yi ikolelela kedhiladhilo kutya omwenyo ihagu si. Iituthi yimwe oya kwatela mo iidhila nenge anuwa hayi petha aantu elago. (Jesaja 65:11) Jehova ota londodha oshigwana she ta ti: ‘Iyoololii mo muyo. Inamu kala mu na ekwatathano naashoka sha nyata.’ — 2 Aakorinto 6:17. a
2. Jehova oha kala u uvite ngiini kombinga yiituthi mbyoka hayi gandja esimano lya pitilila kaantu?
Jehova ote tu londodha kaatu ye momwigo ‘gwokwiinekela momuntu.’ (Lesha Jeremia 17:5.) Omasiku gamwe gomafudho ohaga dhimbulukiwa nelalakano lyokusimaneka aapangeli nenge omapendafule. Go gamwe oge na ko nasha nokusimaneka omandhindhiliko gontumba gopaigwana, ngaashi epandela nenge okudhana emanguluko lyoshilongo. (1 Johannes 5:21) Omanga gamwe haga humitha komeho omahangano gopapolotika nenge ngoka ga nuninwa okweeta elunduluko moshigwana. Jehova ota ka kala u uvite ngiini, ngele otwa gandja esimano lya pitilila komuntu nenge kehangano lyontumba, unene tuu ndyoka tali humitha komeho iinima kaayi li metsokumwe nehalo Lye?
3. Iinima yini hayi vulu okuningitha iituthi yi kale inaayi hokiwa kuKalunga?
Ombiimbeli oyi indika ‘uunkolwi, uufukedhi nomanwino.’ (1 Petrus 4:3) Miituthi yimwe aantu ohaya kala kaaye na eipangelo, yo ohaya ningi iinima ya nyata. Opo tu kale ookuume kaJehova, otu na okukala kokule niinima mbyoka inaayi yogoka.
ILONGA OSHINDJI
Ilonga nkene to vulu okunyanyudha Jehova, mokuninga omatokolo gopandunge kombinga yomasiku gomafudho nosho wo kombinga yiituthi.
4. Yanda iituthi mbyoka itaayi simanekitha Jehova
Lesha Aaefeso 5:10, e tamu kundathana omapulo taga landula:
-
Oshike tu na okushilipaleka tango, manga inaatu tokola ngele otatu kutha ombinga mesiku lyefudho lyontumba?
-
Omasiku gomafudho geni ogo unene ga simanekwa kaantu moshitopolwa sheni?
-
Mbela sho to tala Jehova okwe ga hokwa ngaa?
Pashiholelwa, mbela owi ipulile ngaa nale kutya Jehova oha dhiladhila ngiini kombinga yomasiku gomavalo? Ombiimbeli inayi popya nando omupiya gumwe gwaJehova a dhana esiku lyevalo lye, ihe oya popya iituthi iyali yomavalo ya dhanwa kaantu mboka ya li ihaaye mu longele. Lesha Genesis 40:20-22 nosho wo Mateus 14:6-10, e tamu kundathana omapulo taga landula:
-
Miituthi mbyoka yomavalo omwa ningwa shike sha faathana?
-
Shi ikolelela komahokololo ngaka gomOmbiimbeli, sho to tala, Jehova oha kala e uvitile ngiini okudhana omasiku gomavalo?
Otashi vulika wu ipule to ti, ‘Jehova oha kala ngaa a panda ngele onda kutha ombinga moshituthi shevalo nenge moshituthi shontumba kaashi li pamanyolo?’ Lesha Eksodus 32:1-8. Opo nduno dhana OKAVIDIO, e tamu kundathana omapulo taga landula.
-
Omolwashike tu na okushilipaleka tango kutya oshituthi shoka tatu ka kutha ombinga musho, osha hokiwa kuJehova?
-
Ongiini tatu vulu oku shi ninga?
Opo wu tseye ngele oshituthi shontumba ohashi yemateke Kalunga, ipula to ti:
-
Mbela oshi ikolelela komalongo ngoka kaage li mOmbiimbeli? Opo wu mone eyamukulo, konga uuyelele wu uve kutya osha ziilila peni.
-
Mbela ohashi gandja esimano lya pitilila kaantu, komahangano nenge komandhindhiliko gopashigwana? Tse ohatu gandja esimano alihe kuJehova noye owala twi inekela kutya ota ka kandula po omaupyakadhi muuyuni.
-
Mbela iinima mbyoka hayi ningwa moshituthi shoka otayi kondjithathana nomithikampango dhOmbiimbeli? Otwa pumbwa okuyanda iinima mbyoka inaayi hokiwa kuKalunga.
5. Kwathela yalwe ya kale ya simaneka iinima mbyoka wi itaala
Otashi vulika shi kale oshidhigu wu tinde okukutha ombinga miituthi mbyoka ihaayi nyanyudha Jehova, ngele yalwe otaye ku thiminike. Ya yelithila etokolo lyoye wa ngungumana nonuukeka. Opo wu mone oshiholelwa shimwe nkene to vulu oku shi ninga, dhana OKAVIDIO.
Lesha Mateus 7:12, e tamu kundathana omapulo taga landula:
-
Shi ikolelela kovelise ndjino, mbela owu na okulombwela aakwanezimo mboka kaaye li moshili kutya kaye na okukutha ombinga moshituthi shontumba?
-
Oshike to vulu okuninga wu shilipaleke aakwanezimo kutya nonando ito ka kutha ombinga moshituthi shono pamwe nayo, owu ya hole nowu na ko nasha nayo?
6. Jehova okwa hala tu kale twa nyanyukwa
Jehova okwa hala tu kale hatu nyanyukilwa pamwe naakwanezimo nosho wo nookuume. Lesha Omuuvithi 8:15, e tamu kundathana epulo tali landula:
-
Ovelise ndjino otayi ulike ngiini kutya Jehova okwa hala tu kale twa nyanyukwa?
Jehova okwa hala oshigwana she shi kale hashi nyanyukilwa pamwe. Dhana OKAVIDIO, wu mone nkene shika hashi kala shi iwetikile piigongi yetu yopashigwana.
Lesha Aagalati 6:10, e tamu kundathana omapulo taga landula:
-
Mbela otwa pumbwa okudhana omasiku gomafudho ngoka haga simanekwa unene kaantu, opo tu ningile yalwe “uuwanawa”?
-
Mbela pataloko lyoye oshini shi li nawa, okugandja sha mesiku lyefudho, molwaashoka wu uvite to thiminikwa wu shi ninge nenge okugandja nehalo ewanawa?
-
Poompito dhimwe, Oonzapo dhaJehova odhindji ohadhi longekidhile oyana uututhi nenge dhi ya pe omagano ethimbo kehe. Ngele owu na aanona, iinima yimwe yini yi ikalekelwa to vulu oku ya ningila?
AANTU YAMWE OHAYA TI: “Kutya nduno esiku lyefudho olya tamekela peni, shono kashi na oshilonga, shampa owala tamu nyanyukilwa pamwe naakwanezimo nosho wo nookuume.”
-
Oto ke mu yamukula ngiini?
OWI ILONGO SHIKE?
Jehova okwa hala tu nyanyukilwe pamwe naakwanezimo nosho wo nookuume. Ihe okwa hala wo tu yande iituthi mbyoka ihaayi mu nyanyudha.
Omapulo geendululo
-
Omapulo geni tatu vulu okwiipula, tu mone ngele oshituthi shontumba ohashi yemateke Jehova?
-
Ongiini tatu vulu okukwathela aakwanezimo nookuume ya uve ko kutya omolwashike ihaatu dhana omasiku gomafudho gontumba?
-
Owu shi shi ngiini kutya Jehova okwa hala tu kale twa nyanyukwa nokukutha ombinga momainyanyudho?
UUYELELE WA GWEDHWA PO
Opu na omasiku gomafudho gamwe ngoka Aakriste ihaaya kutha ombinga mugo.
Tala komatompelo gane kutya omolwashike twi itaala kutya okudhana omavalo ohaku yemateke Kalunga.
Tala okavidio haka, wu mone nkene aanona mboka ye hole Jehova taya vulu oku mu nyanyudha pethimbo lyefudho.
Aakriste yashili oyendji ihaya dhana Okrismesa. Owu uvitile ngiini etokolo lyawo ndyoka?
“Oya mono po oshinima shimwe shi li nawa” (Oshungolangelo, 1 Desemba 2012)
a Tala Eyelitho 5, wu ilonge shoka wu na okuninga moonkalo dhontumba, ngele aantu taya dhimbulukwa omasiku gomafudho.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
