FAKAAKOAGA 44
Talia Oti Kia he Atua e Tau Fakamanatuaga?
Manako a Iehova ki a tautolu ke fiafia e moui mo e fakamanatu ai he falu magaaho. Ka e fakafiafia kia he tau fakamanatuaga mo e tau aho okioki oti a ia? Maeke fēfē a tautolu ke fakakite e fakaalofa ma Iehova he tuaga nei?
1. Ko e ha ne loga e fakamanatuaga ne nakai talia e Iehova?
Liga ofo a koe ke iloa na loga e fakamanatuaga ne nakai fakavē ke he tau fakaakoaga he Tohi Tapu po ke mai he tau taofiaga pouliuli. Ko e tau fakamanatuaga pihia kua liga matutaki ke he lotu fakavai. Liga matutaki fakataulatua po ke fakavē ke he manatu na fai vala he tino ne moui he mole e mate. Falu fakamanatuaga kua fakamatapatu ke he tau agaaga talahau tuai po ke talitonu ke he tau talahauaga monuina (luck). (Isaia 65:11) Hataki e Iehova e tau tagata tapuaki haana: “Vevehe kehe a mutolu, . . . aua foki neke piki atu a mutolu ke he mena kelea.”—2 Korinito 6:17. a
2. Fēfē e logonaaga ha Iehova ke he tau fakamanatuaga ne fakamatalahi teao e tau tagata?
Hataki e Iehova a tautolu ke ua mokulu ke he matahele he “tua ke he tagata.” (Totou Ieremia 17:5.) Falu aho okioki ne fakamatalahi e tau pule po ke tau kautau. Falu ne fakamanatu e tau fakamailoga po ke tutokotaha he motu. (1 Ioane 5:21) Fakamanatu foki he falu e tau fakaholoaga politika po ke tau matakau. Fēfē e logonaaga ha Iehova ka fakamatalahi teao e tautolu e tagata po ke fakatokatokaaga, mua atu ka taute ke fakaohooho e tau manatu ne nakai tatai mo e finagalo Haana?
3. Ko e heigoa e aga ati nakai hako e tau fakamanatuaga?
Nakai talia he Tohi Tapu e “inu lahi ke he uaina, mo e tau tafeau[hi], mo e tau inuaga he kava.” (1 Peteru 4:3) Falu fakamanatuaga ne fakatātā fakahanoa e mahani fakalialia. Ke tumau e kapitiga mo Iehova, lata a tautolu ke fakamamao mai he mahani fakalialia pihia.
KUMIKUMI FAKAHOKULO
Fakaako e puhala ka fakafiafia a Iehova he taute e tau fifiliaga pulotu ke he tau aho okioki mo e tau fakamanatuaga.
4. Tiaki e tau fakamanatuaga ne nakai fakalilifu a Iehova
Totou Efeso 5:10, ti tutala ke he tau hūhū nei:
-
Ko e heigoa ha tautolu kua lata ke iloa mooli to fifili ke fakamanatu e aho okioki?
-
Ko e heigoa e tau aho okioki mahuiga he matakavi ne nofo a koe?
-
Manatu nakai a koe kua fakafiafia he tau aho okioki ia a Iehova?
Ma e fakatai, kua manamanatu nakai a koe ke he manatu he Atua ke he tau fakamanatuaga tūtau? Nakai hagaao e Tohi Tapu ke he tagata ne tapuaki ki a Iehova kua fakamanatu e tūtau, ka e fakamau ai ua e tūtau ne fakamanatu he tau tagata ne nakai fekafekau ki a Ia. Totou Kenese 40:20-22 mo e Mataio 14:6-10. Ti tutala ke he tau hūhū nei:
-
Ko e heigoa ne tatai he tau fakamanatuaga tūtau ua nei?
-
Fakavē ke he tau tala nei he Tohi Tapu, fēfē e logonaaga ha Iehova ke he tau aho fanau he manatu e koe?
Ka e manamanatu agaia a koe, ‘Aoga mooli nakai ki a Iehova he ai fakalataha au ke he aho fanau po ke fakamanatuaga ne nakai felauaki mo e Tohi Tapu?’ Totou Esoto 32:1-8. Ti tā e VITIŌ, mo e tutala ke he tau hūhū nā.
-
Ko e ha kua lata a tautolu ke iloa mooli e tau mena ne talia e Iehova?
-
Taute fēfē ai e tautolu?
Puhala ke iloa e fakamanatuaga ne nakai talia he Atua
-
Fakavē kia ke he tau fakaakoaga ne nakai mai he Tohi Tapu? Ke iloa, kumikumi ke he tupumaiaga.
-
Fakamatalahi teao kia e tau tagata, tau fakatokatokaaga, po ke tau fakamailoga he motu? Mua ue atu a Iehova mai he tau mena oti ia ti falanaki a tautolu ki a ia ke utakehe e tau lekua he lalolagi.
-
Tatai nakai e tau puhala mo e tau gahua ke he tau tuaga he Tohi Tapu? Lata a tautolu ke tumau e meā he tau mahani.
5. Lagomatai e falu ke fakalilifu e tau taofiaga haau
Maeke ke uka ke totoko ka fakaohooho he falu a koe ke fakalataha ke he tau fakamanatuaga ne nakai fiafia a Iehova. Fakamaama e fifiliaga haau he puhala fakauka mo e fakailoilo. Ke kitia e fakafifitakiaga he puhala ke taute aki, tā e VITIŌ.
Totou Mataio 7:12, ti tutala ke he tau hūhū nei:
-
Fakavē ke he kupu nei, lata nakai a koe ke tala age ke he magafaoa nakai tua haau kua nakai lata a lautolu ke fakamanatu e aho okioki?
-
Ko e heigoa haau ka taute ke iloa he magafaoa pete kua nakai fakalataha a koe he fakamanatuaga mo lautolu, ka e fakaalofa mo e loto fakaaue a koe ki a lautolu?
6. Manako a Iehova ke fiafia a tautolu
Manako a Iehova ke fiafia a tautolu mo e magafaoa mo e tau kapitiga ha tautolu. Totou Fakamatalaaga 8:15, ti tutala ke he hūhū nei:
-
Fakakite fēfē he kupu nei kua manako a Iehova ke fiafia a tautolu?
Manako a Iehova ke he tau tagata haana ke fiafia mo e fakalataha auloa. Tā e VITIŌ ke kitia e mena nei he ha tautolu a tau fonoaga he lalolagi katoa.
Totou Kalatia 6:10, ti tutala ke he tau hūhū nei:
-
Lata nakai a tautolu ke fakamanatu e tau aho okioki mahuiga ke taute e “mahani mitaki” ke he falu?
-
Ko e puhala foaki fēfē ka fiafia lahi a koe—he foaki pauaki ni he aho okioki po ke makai ke foaki he ha magaaho?
-
Tokologa e Tau Fakamoli a Iehova ne fa fakatoka e fakaiafiaaga pauaki ma e tau fanau mo e fakaofo foki a lautolu he age e tau mena fakaalofa. Ka fai fanau, ko e heigoa e falu fakafiafiaaga pauaki ka taute e koe ma lautolu?
PEHĒ FALU TAGATA: “Nakai aoga lahi e tupumaiaga he tau aho okioki. Ka ko e magaaho ke fiafia e magafaoa mo e tau kapitiga.”
-
Ko e heigoa haau ka talahau?
MANATU KATOA
Manako a Iehova ki a tautolu ke fiafia e magaaho mo e magafaoa mo e tau kapitiga. Ka e manako foki a ia ke kalo kehe a tautolu he tau fakamanatuaga ne nakai fakafiafia a ia.
Liu Fakamanatu
-
Ko e heigoa e tau hūhū ha tautolu ka hūhū ke iloa ko e ha ne nakai fakafiafia he fakamanatuaga a Iehova?
-
Lagomatai fēfē e tautolu e magafaoa mo e tau kapitiga ke maama e tau fifiliaga ha tautolu ke he tau aho okioki?
-
Iloa fēfē e koe kua manako a Iehova ke fiafia a tautolu?
KUMI FOKI
Manamanatu ke he falu aho okioki pauaki ne nakai fakamanatu he tau Kerisiano.
“Ko e Ha ne Nakai Fakamanatu he Tau Fakamoli a Iehova e Falu Aho Okioki?” (Vala tala he kupega hila)
Kitekite ke he fā e kakano ne talitonu a tautolu kua nakai fakafiafia he fakamanatuaga aho fanau e Atua.
“Ko e Ha ne Nakai Fakamanatu he Tau Fakamoli a Iehova e Tau Aho Fanau?” (Vala tala he kupega hila)
Kitia e puhala ne taute he tau tama ikiiki ne fakaalofa ki a Iehova he falu aho okioki.
Tokologa e Kerisiano ne fifili ke nakai fakamanatu e Kirisimasi. Fēfē e logonaaga ha lautolu ke he fifiliaga ia?
“Fai Mena Mitaki ne Moua e Lautolu” (Vala tala he Kolo Toko)
a Kikite e Tala he Matahiku 5 ke iloa e mena ke taute he tau aho okioki he lalolagi.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
