AN̈KEJAYOʼOYI 44
¿Ikusuʼnɨʼyba Dios ityumpɨy jeʼm sɨn̈aajiyaj?
Jehová ixunba iga tamaymayataʼmiñ y dyaʼ ijooya siiga tasɨn̈aap. ¿Pero ikusuʼnɨʼyba ityumpɨy jeʼm sɨn̈aajiyaj? ¿Juutypɨk wɨap tanakwiñkej iga tantoyba y tanteguet jempɨk jeʼ ijɨɨspa?
1. ¿Tyiʼiga jaʼyan̈ sɨn̈aajiyaj Jehová dyaʼ ikusuʼnɨʼyba?
Wɨapsɨ iga migaʼman̈jakpa iñjoodon̈a iga jaʼyan̈ sɨn̈aajiyaj dyaʼ iniityyaj tumtyi jɨɨxi kun jempɨk in̈kejpa jeʼm Biblia, o tɨgɨykuʼmneyaj kun jeʼm religiónyaj mɨgoyyajpaʼap y kun jeʼm nawadaaji. Jaʼyan̈ mɨgoyayñeyajta, jeʼyukmɨ iwatyajpa sɨn̈aajiyaj dyapɨk wɨtam. Ijɨɨsyajpa iga siiga dyaʼ iwatyajpa wɨap imalnɨgayyaj (Isaías 65:11). Jeʼyukmɨ Jehová ichiʼiba yɨʼp an̈kiʼmayoʼoyi jeʼm iyooxakɨʼɨwiñyaj: «Tsagaŋputtaamɨ [...]. Odoy tsɨ̱cɨ jém d́apɨc wɨ̱» (2 Corintios 6:17). a
2. ¿Tyi ijɨɨspa Jehová jesɨk wattaap tuum sɨn̈aaji iga kujiʼptaap algun i?
Jehová tanɨʼmaʼyba iga odoy tan̈kupɨgayyajiñ «jeʼm ityyajwɨʼɨp yɨʼp naxyukmɨ» iga wɨap tamalwadayyaj (maayɨʼ Jeremías 17:5). Weeñi sɨn̈aajiyaj watyajtaap iga kujiʼpyajtaap jeʼm an̈jagoʼoyiyaj, tun̈gakyaj ikujiʼpyajpa jeʼm bandera o iga dyam in̈jakyajpa jeʼm an̈jagoʼoyi itywɨʼɨp tun̈gak país (1 Juan 5:21). Tun̈gakyaj tɨgɨykuʼmyajpa kun jeʼm política o in̈teeñkamokyajpa jeʼm an̈jagoʼoyiyaj. ¿Juʼutssɨ in̈jaam Jehová siiga tatɨgɨykuʼmpa jempɨk dyaʼ ikusuʼnɨʼyba?
3. ¿Juʼutspɨk sɨn̈aajiyaj dyaʼ ikusuʼnɨʼyba Dios?
Jeʼm Biblia nɨmpa iga jeʼm sɨn̈aajiyaj juuty tsaam uknɨmpa dyaʼ wɨtam (1 Pedro 4:3). Ityyaj jempɨk tsaam pɨɨmi ukyajpa y tsaam imalwatyajpa. Siiga duroj tanamigojatoʼoba Jehová, odoy tanan̈pɨʼtsyajiñ ityam iwatyajpa jeempɨk.
MAAJ TAN̈WƗKUYUJKAIÑ
Tanaʼmiñ juutypɨk wɨap in̈wɨpɨk iñjɨɨxi jesɨk algun i iwatpa tuum sɨn̈aaji y jeempɨgam immaymaywatpa Jehová.
4. Odoy tɨgɨykuʼumɨ kun jeʼm sɨn̈aajiyaj jempɨk Jehová dyaʼ ikusuʼnɨʼyba
Maytyaʼamɨ Efesios 5:10 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Tyi wɨɨ iga tan̈kutɨʼɨyɨytyaʼmiñ jesɨk tampɨktaʼmpa tanjɨɨxi siiga tan̈watpa tuum sɨn̈aaji o dyaʼ?
-
¿Juʼptam sɨn̈aajiyaj wattaap juuty miity?
-
¿Miñɨmpasɨ iga Jehová ikusuʼnɨʼyba?
Oyba minikwaʼktaaji, ¿tyi ijɨɨspa Dios iga kusɨn̈akataap jeʼm cumpleaño? Jeʼm Biblia dyaʼ in̈matpa iga tuum Dios iyooxakɨʼɨwiñ iwat jeʼm icumpleaño, pero ijɨykiʼmpa wɨsteen cumpleaño iwatyajwɨʼɨp jempɨk dyaʼ idyɨk ikuyooxayajpa Jehová. Maytyaʼamɨ Génesis 40:20-22 y Mateo 14:6-10. Okmɨ an̈mattaʼamɨ tyi iñjɨɨstaʼmpa y kutson̈taʼamɨ:
-
¿Tyi nas jesɨk watyajta yɨʼpyaj cumpleaño?
-
Sɨɨ iga tammayñeum yɨʼpyaj nasɨyoʼoyiyaj, ¿miñɨmpasɨ iga Jehová ikusuʼnɨʼyba jeʼm cumpleaño?
Wɨapsɨ iga minikwaʼktaap «¿Ityeguedaap Jehová siiga anɨkpa tuum cumpleaño o an̈watpa tuum sɨn̈aaji dyapɨk in̈kejpa jeʼm Biblia?». Maytyaʼamɨ Éxodo 32:1-8. Okmɨ aʼmtaʼamɨ jeʼm VIDEO y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Tyiʼiga wɨɨ iga tan̈kutɨʼɨyɨytyaʼmiñ tyityam ikusuʼnɨʼyba Jehová?
-
¿Juutypɨk tan̈watpa?
Juutypɨk tanjoodon̈aap siiga Dios ikusuʼnɨʼyba tuum sɨn̈aaji
-
¿Iniity tumtyi jɨɨxi kun jeʼm Biblia? Iga wɨaiñ iñjoodon̈a, kɨʼpin̈ɨ juuty tsukumɨy.
-
¿Ikujiʼppa algun i o algun tyi juʼuts jeʼm bandera? Taɨchtyam tan̈kujiʼptaʼmpa Jehová y tan̈kupɨktaʼmpa iga jeʼ iwɨtsakpa ityumpɨy.
-
Jempɨk wattaap jeem, ¿in̈teeñkamokpa jeʼm Biblia? Juchixkej tan̈kupɨktaʼmiñ jeʼm Dios ian̈kiʼmayoʼoyiyaj.
5. Wɨwaatɨ iga tun̈gakyaj odoy mikujɨyyajiñ
Jesɨk tatɨʼptaap tuum sɨn̈aaji jempɨk Jehová dyaʼ ikusuʼnɨʼyba, wɨapsɨ iga tan̈kaʼ tannɨm «dyaʼ». Kun respeto chokoyan̈maatɨ jempɨk in̈kupɨkpa. Aʼmtaʼamɨ tyi iwat algun i jempɨk iñaskaʼ jeempɨk, aʼmtaʼamɨ jeʼm VIDEO.
Maytyaʼamɨ Mateo 7:12 y an̈mattaʼamɨ tyi iñjɨɨstaʼmpa y kutson̈taʼamɨ:
-
Juʼuts in̈kejpa yɨʼp versículo, ¿wɨɨ iga iññɨʼmaʼyiñ tuum iñfamiliar jempɨk dyaʼ ikuyooxaap Dios iga odoy iwadyiñ tuum sɨn̈aaji?
-
¿Juutypɨk wɨap inikwiñkejay jeʼm iñfamilia iga iñtyoyyajpa mex iga dyaʼ in̈waganasɨn̈ayajpa?
6. Jehová ixunba iga tamaymayanetaʼmiñ
Jehová ikusuʼnɨʼyba iga tawagamaymayataʼmiñ kun tanfamilia y tanamigojyaj. Maytyaʼamɨ Eclesiastés 8:15 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Juutypɨk ikwiñkejpa yɨʼp versículo iga Jehová ixunba iga tamaymayanetaʼmiñ?
Jehová ixunba iga jeʼm iyooxakɨʼɨwiñyaj wagamaymayayajiñ. Aʼmtaʼamɨ jeʼm VIDEO iga wɨaiñ iñaʼmtaʼm iga jeempɨgam naspa jesɨk watyajtaap jeʼm an̈tuʼumaajiyaj internacionales.
Maytyaʼamɨ Gálatas 6:10 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Numaaj kun sɨn̈aaji wɨap tan̈wɨwaday tun̈gakyaj?
-
Juchix maaj mimaymay: ¿jesɨk michioʼyba iga itypa sɨn̈aaji o jesɨk iñyaʼak michioʼyba?
-
Jaʼyan̈ Testigojyaj ixaajchiyajpa imanɨktam algun tyi mex iga dyaʼ sɨn̈ayajpa. Siiga mimanɨgɨytyam, ¿tyityam wɨap in̈wagawattaʼm?
WEEÑI NƗMYAJPA IGA: «Dyaʼ tyi ijoo tyi kusɨn̈akataap. Tan̈waganaityyajiñ tanfamilia y tanamigojyaj».
-
Mich, ¿tyi iñjɨɨspa?
JEMPƗK TAN̈KUYUJKAʼ
Jehová ixunba iga tan̈waganaitytyaʼmiñ tanfamilia y tanamigojyaj. Dyaʼ ixunba iga tatɨgɨykuʼmtaʼmiñ kun sɨn̈aajiyaj dyapɨk ikusuʼnɨʼyba.
¿Iñjɨɨspanam?
-
¿Juʼptam akwagoʼoyi takkutɨʼɨyɨʼyba siiga Jehova ikusuʼnɨʼyba tuum sɨn̈aaji?
-
¿Juutypɨk tanyooxpaʼtpa tanfamilia o tanamigo iga ikutɨʼɨyɨyyajiñ tyiʼiga dyaʼ tanɨkpa weeñi sɨn̈aajiyaj?
-
¿Juutypɨk tanjoodon̈ iga Jehová ixunba iga tamaymayanetaʼmiñ?
JODON̈AAJƗNAM
Maayɨʼ weeñi sɨn̈aajiyaj jempɨk dyaʼ ikusɨn̈akayajpa jeʼm cristianojyaj.
«¿Tyiʼiga jeʼm Jehová itestigojyaj dyaʼ iwatyajpa weeñi sɨn̈aajiyaj?» (Artículo de jw.org)
Kɨʼpin̈ɨ tyiʼiga wɨap tan̈kupɨk iga Dios dyaʼ iwɨixpa jeʼm cumpleaño.
«¿Tyiʼiga jeʼm Jehová itestigojyaj dyaʼ ikusɨn̈akayajpa jeʼm cumpleaño?» (Artículo de jw.org)
Aʼmɨ juutypɨk ikwiñkej respeto tuum traytyipɨxiñ jesɨk jeʼm iwaganakuyujyajpaʼap ikuxikkayaj iga dyaʼ ikusɨn̈akaʼaba jeʼm Navidad.
¿Maymayyaj jeʼm cristianojyaj jempɨk dyaʼ ikusɨn̈akayajpa jeʼm Navidad?
«Ipaʼtyaj jempɨk maaj wɨɨ» (La Atalaya, 1 de diciembre de 2012)
