LECCIÓN 44
¿Tukuy fiestastachu Dios allinpaj qhawan?
Jehovaqa munan kusisqa kausakunata. Chayrayku wakin kutis fiestata ruwanataqa mana juchachanchu. Jinapis, ¿tukuy fiestastachu Dios allinpaj qhawan? Ima fiestata ruwaspapis, ¿imaynatataj rikuchisunman Jehovata munakusqanchejta? Chay imasta kaypi yachakusun.
1. ¿Imaraykutaj Jehová ashkha fiestasta mana allinpajchu qhawan?
Ashkha fiestastaqa llulla yachachiykunaman jina runas ruwanku. Chayrayku chay fiestasqa mana Bibliaj nisqanman jinachu kashan. Wakin fiestastaqa llulla religiones ruwanku, chaykunataj layqerioswan chajrusqa kashan. Chantapis runasqa wakin fiestasta ruwanku alma mana wañusqanta creesqankurayku, llulla yachachiykunapi creesqankurayku, suertepi creesqankurayku ima (Isaías 65:11). Chayrayku Jehovaqa payta yupaychajkunaman kayta nin: ‘Paykunamanta tʼaqakuychej. Amaña chʼichipaj qhawasqa imasta llankhaychejchu’, nispa (2 Corintios 6:17). a
2. ¿Jehová allinpajchu qhawan runasta jatunchaj fiestasta?
Jehová Diosqa mana munanchu ‘runasllapi atienekunanchejta’, imaraykuchus runallapi atienekoyqa uj trampa jina (Jeremías 17:5 leey). Wakin fiestastaqa ruwanku kamachejkunata, soldadosta ima jatunchanankupaj. Waj fiestastataj ruwanku banderata chayri chayman rijchʼakoj imasta jatunchanankupaj chayri uj suyuta jatunchanankupaj (1 Juan 5:21). Wakin fiestastaj politicawan chayri chayman rijchʼakoj imaswan chhapusqa. Sichus Diosman churanakoj runasta chayri organizacionesta jatunchasunman chay, ¿imaynataj Dios kashanman?
3. ¿Uj fiestapi imasta ruwasqankutaj Jehovapaj mana allinchu?
Bibliaqa juchachan “machaykunapi, millay fiestaspi, machana fiestaspi” puriyta (1 Pedro 4:3). Wakin fiestaspi runasqa machaykuytawan pʼenqay imasta ruwanku. Jehová Diospa amigosnillanpuni kanapajqa tukuy chay millay imasmanta karunchakunanchej tiyan.
ASTAWAN YACHAKUNA
Kaypi yachakusun Jehovata kusichiyta munaspaqa uj fiestaman riytachus manachus sumajta ajllanata.
4. Jehovata pisipaj qhawachej fiestasmanta karunchakuna
Efesios 5:10 leeriychej, chantá yachakojta tapuriy:
-
Uj fiestata ruwanatachus manachus ajllashaspa, ¿imapitaj ñaupajta piensarinanchej tiyan?
-
Tiyakunki chaypi, ¿ima fiestastataj runas ruwanku?
-
¿Chay fiestasta allinpajchu Dios qhawanman, ima niwajtaj?
Chay fiestasmanta ujnenqa diachakus chayri cumpleaños. ¿Imatataj Dios yuyanman diachakusmanta? Bibliaqa mana ninchu Diospa kamachisnin diachakusta ruwasqankuta. Jinapis willawanchej Diosta mana yupaychaj iskay runas diachakusta ruwasqankuta. Génesis 40:20-22; Mateo 14:6-10 leeriychej, chantá yachakojta tapuriy:
-
¿Imataj iskaynin diachakuspi pasasqa?
-
Kay versiculosta leerisqanchejman jina, ¿allinpajchu Dios qhawanman diachakusta ruwayta?
Ichapis qanqa nishanki diachakuta ruwayta chayri waj fiestasman riyta Biblia mana juchachasqanta. Éxodo 32:1-8 leeriychej, chantá VIDEOTA qhawariychej. Chaymantataj yachakojta tapuriy:
-
Imatachus ruwanata ajllashaspa, ¿imapirajtaj ñaupajta piensarina tiyan?
-
¿Imaynatá chayta ruwasunman?
Ima fiestastachus Dios chejnisqanta yachanapaj
-
Uj fiesta Bibliaj nisqanman churanakusqantachus manachus yachanapajqa imaynatachus chay fiesta rikhurisqanta maskʼasunman.
-
Uj fiesta runasta, organizacionesta, banderata chayri chayman rijchʼakoj imasta jatunchananpaj kajtenqa yuyarikuna Diosllata jatunchayta munasqanchejta. Paylla llakiykunata chinkachiyta atin.
-
Uj fiestapi Bibliaj juchachasqan imasta ruwakonqa chayqa, yuyarikuna llimphus kananchej kasqanta.
5. Respetowan willarina imapichus creesqanchejta
Jehovaj chejnisqan fiestaman invitawajtinchejqa mana niyta atillanchejchu “mana” nispa. Astawanraj rinatapuni niwajtinchej. Chay kutispeqa pacienciawan respetowantaj sutʼincharisunman imajtinchus mana riyta atisqanchejta. Ajinapi rikukoj hermana imatachus ruwasqanta yachanapaj VIDEOTA qhawariychej.
Mateo 7:12 leeriychej, chantá yachakojta tapuriy:
-
Kay versículo nisqanman jina, ¿allinchu kanman mana creyente familiaresninchejman ninanchej manaña fiestasninkuta ruwanankuta?
-
Familiaresninchejwan mana uj fiestata ruwaspapis, ¿imastataj ruwasunman paykunata munakusqanchejta rikuchinapaj?
6. Jehovaqa kusisqa kananchejta munan
Jehovaqa munan familianchejwan amigosninchejwanpis khuska kaspa kusirikunanchejta. Eclesiastés 8:15 leeriychej, chantá yachakojta tapuriy:
-
Kay versiculopi leesqanchejman jina, ¿Jehová munajchu kasqa kusisqa kanata?
Jehová Diosqa munan kamachisnin khuska kaspa kusirikunankuta. Chaytaj sutʼi rikukun jatuchaj tantakuykunasninchejpi. VIDEOTA qhawariychej.
Gálatas 6:10 leeriychej, chantá yachakojta tapuriy:
-
¿Wajkunapaj allin kajta ruwayta munaspa fiestatapunichu ruwananchej tiyan?
-
¿Fiesta diapi tanqasqa jinalla regalota qospachu astawan kusikunki, chayri ima diallapis qanpuni qoyta munasqaykirayku qospachu?
-
Ashkha testigosqa wakin kutis wawasninkupaj imallatapis ruwaripunku. Chay kutistaj regalotapis jaywarinku. Wawasniyoj kanki chay, ¿imastataj paykunapaj ruwaripuyta munawaj?
WAKIN RUNAS NINKU: “Amigosninchejwan familiaresninchejwan khuska kayqa aswan sumaj, imaynatachus uj fiesta rikhurisqanta yachanamanta nisqaqa”, nispa.
-
¿Imatá qan niwaj?
¿IMASTÁ YACHAKUNCHEJ?
Kaypi yachakunchej Jehovaqa familianchejwan amigosninchejwan kusirikunata munasqanta, chejnisqan fiestastataj mana ruwanata.
Yuyarikunapaj
-
¿Imaynatá yachasunman uj fiestata Dios allinpajchus manachus qhawasqanta?
-
Uj fiestata mana ruwasqanchejta, ¿imaynatá familiaresninchejman, amigosninchejman sutʼinchasunman?
-
¿Jehová munajchu kasqa kusisqa kanata, familiaresninchejwan amigosninchejwanpis kusirikunata?
ASTAWAN YACHAKUNAYKIPAJ
¿Ima fiestastataj cristianos mana ruwankuchu? Chayta yachanaykipaj kayta leeriy.
¿Imaraykutaj diachakusta ruwayta Jehová mana allinpajchu qhawan? Chayta yachanaykipaj kayta leeriy.
¿Imaynatá Jehovata munakoj wawas payta kusichinkuman fiestas kajtin? Chayta yachanaykipaj kay videota qhawariy.
¿Imaraykutaj ashkha cristianos mana Navidadta ruwankuchu? Chayta yachanaykipaj kayta leeriy.
“Navidadmanta nisqa, ¿imataj aswan sumaj?” (La Atalaya, 1 de diciembre de 2012)
a Fiesta diaspi imatachus ruwanaykita yachanaykipaj kay libroj tukukuyninpi “Sutʼinchaykuna” nisqapi 5 kaj sutʼinchayninta leeriy.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
