YAĆHACHICUY 44
¿Ima ninmi Jehová fiestacunapi?
Jehová cushisha cawsacunanchictam munan, ayveces lulachwanmi fiestacunacta cushicunanchicpä. Pero, ¿llapan fiestacunactachun Dios allinpä lican? ¿Imanuypam licachichwan Diosta cuyaśhanchicta ñatac pay piensaśhanta respetaśhanchicta?
1. ¿Imapïmi mana allinchu Jehovapä waquin fiestacuna?
Nunacunapa fiesta lulaśhancuna Diostam piñachin, Bibliaćhu yaćhachicuynincunawan manam tincunchu. Diosta mana lisi nunacunam chay fiestacunata unaypiña lulapäcun, waquin fiestacunaca taytacha-mamachacunacta adorananpämi, ñatac waquin fiestacunacta lulapäcun wañuśha nunacunapa almancunapä nilcul. Waquin costumbrecunactapis imaymana creenciawan suertiyü cananpä (Isaías 65:11). Chaymi Jehová siervuncunacta nin: “Paycunap ćhawpinpi japächaculcay mana allincäta juc-läduman” chapicuy (2 Corintios 6:17). a
2. ¿Jehovapä allinchun canman nunacunata o naciuncunata alawaptinchic?
Jehovami Bibliaćhu nimanchic: “Nunamasillanman chalapacücá” yan’alpämi (liguicuy Jeremías 17:5). Chaymi guerracunaćhu wañú nunacunata alawapäcun ñatac naciunninta o banderanta alawananpä fiestachaculcaśhanman amam meticuśhunchu (1 Juan 5:21). Waquin fiestacunactapis lulapäcunmi político nunacunata apoyananpä, malcacunaćhu autoridäcunatapis apoyapäcunmi. Chay fiestacunaman meticuptinchic, ¿imanuyćha sintin’a Jehová?
3. Juc fiestaćhu, ¿imacuna lulaymi Jehovata piñachinman?
Bibliaca nimanchicmi, ‘mana upiananchicpä shincananchiccama ñatac mansebacuy anla fiestacunacta’ manam lulaśhunchu (1 Pedro 4:3). Waquin fiestacunaćhu nunacuna upiapäcun shincanancamam, chayćhumi pin’ayta lulapäcun. Jehovapa amigun cayta munal’a, aman cay anla fiestacunata lulaśhunchu.
MASTA YAĆHAYCUŚHUN
Yaćhaśhun nunacuna fiestacunacta lulaśhancunaman aman meticuśhunchu, chaynupam Jehovata cushichiśhun.
4. Jehovapa mana munaśhan fiestacunapi aśhucunanchicmi
Liguiśhun Efesios 5:10 ñatac limaśhun chaypi:
-
Ima fiestactapis fiestachacunapä decidilcul, ¿imactam yalpananchic?
-
¿Ima fiestacunactam malcayquićhu lulapäcun?
-
Chay fiestacunapi, ¿ima ninćha Jehová?
¿Imanuytam Dios lican cumpleañucunata? Bibliaćhu manam ninchu Jehovapa siervuncuna fiestachacuśhanta cumpleañunćhu, pero Bibliaćhu niyanmi ishcay nuna mana Diosta adoracuna lulapäcuśhanta cumpleañunta. Liguiśhun Génesis 40:20-22 ñatac Mateo 14:6-10. Cada textucta liguicul limaśhun chaypi:
-
¿Imam pasala cay ishcay nunacunapa cumpleañunćhu?
-
Liguiśhanchicnü, ¿ima ninmi Jehová cumpleañucunapi?
Cumpleañunchicta lulaptinchic o juc mana allin fiestacunaman liptinchic, ¿imanuyćha sienten Jehová? Liguiśhun Éxodo 32:1-8. Chaypi’a licaśhun VIDEUCTA ñatac limaśhun chaypi:
-
¿Imapïmi yaćhananchic Jehovata ima fiestacuna piñachiśhanta?
-
¿Imactam lulachwan chayta yaćhanapä?
¿Imanuypam yaćhachwan juc fiesta cushichinmanchun o manachun Jehovata?
-
¿Cay fiestaca Bibliaca yaćhachiśhanwan contrachun cayan? Chaypi allinta yaćhay imanuypam licalimula chay fiestaca.
-
¿Cay fiestacunawan nunacunatachun o naciuncunatachun alawapäcun? Ya’anchic Jehovallactam confiacunchic ñatac ya’anchic alcayanchic payllactam llapan problemacunacta allichananpä.
-
¿Cay fiestacunaćhu mana allintachun lulapäcun? Ya’anchic munanchic Diosta cäsucuytam.
5. Respetullawan willaycuśhun creencianchiccunacta
Jehovapa mana munaśhan fiestaman invitamaptinchic, ayveces manam nï sasam, chaynü captin pacienciallawan, respetullawanmi willaycuśhun creencianchicta entindinanpä. Juc hermana lulaśhanta yaćhananchicpä, licaśhun VIDEUCTA.
Liguiśhun Mateo 7:12 ñatac limaśhun chaypi:
-
Cay texto nishannü, ¿allinchun canman juc familianchic mana testigo captin ama fiestacta lulaychu nishanchic?
-
¿Imactam lulachwan paycunacta cuyaśhanchicta licachinanchicpä?
6. Jehová munan cushisha cananchictam
Jehová munan amigunchiccunawan, familianchiccunawan cusca cushisha cananchictam. Liguiśhun Eclesiastés 8:15 ñatac limaśhun chaypi:
-
Cay textuta liguiśhanchicnü, ¿Jehová munanchun cushisha cananchicta?
Jehová munan siervuncuna cusca cushisha capäcunantam. Jaycunacta licanchic jatun utunacuyninchicćhumi licaśhun VIDEUCTA.
Liguiśhun Gálatas 6:10 ñatac limaśhun chaypi:
-
¿Fiestactalachun lulananchic nunamasinchicwan cushisha cananchicpä?
-
¿Imanuypam regalucta uycuchwan: śhun’unchicpichun o obligaduchun?
-
Achca testigucunam utunaculcan wawincuna awsapäcunanpä, micapäcunanpä o regalucta uycunanpäpis. Wawiquicuna captin, ¿imactam lulanquiman paycuna allicta cushiculcananpä?
WAQUINCUNA NIŚHUNQUIMANMI: “Familianchiccunawan cusca cananchicpä fiestacta lulaptinchic manam Dios piñacunchu”.
-
Am, ¿ima ninquim?
IMACTAM YAĆHALUNCHIC
Jehová munanmi familianchiccunawan, amigunchiccunawan cushisha cananchicta, pero pay manam munanchu ćhiniśhan fiestacunacta lulananchicta.
Yalpaśhun
-
¿Imanuypam yaćhachwan ima fiestacuna mana allin caśhanta?
-
¿Imanuypam nichwan familianchiccunacta, lisinacuśhanchiccunacta waquin fiestacuna mana allin caśhanta?
-
¿Imanuypam yaćhanchic Jehová munaśhanta cushisha cananchicta?
MASTA YAĆHANAYQUIPÄ
Diosta sirvïcunaca ima fiestacunactam mana lulananchicchu, chayta yaćhanayquipä liguiy.
“¿Por qué los testigos de Jehová no celebran ciertas fiestas?” (Artículo de jw.org)
¿Imapïmi Dios mana munanchu cumpleañucta lulananchicta? Chayta yaćhanayquipä liguiy.
“¿Por qué los testigos de Jehová no celebran los cumpleaños?” (Artículo de jw.org)
¿Imanuypam Jehovata cuyä urucunaca cushichinman payta fiestacunaćhu? Licay videucta.
Diosta sirvïcunaca manam Navidad fiestacta lulapäcunchu. Chayta mana lulalpis cushisham cawsaculcan, liguiy.
“Encontraron algo mejor” (La Atalaya, 1 de diciembre de 2012)
