YACHANA PARTI 44
Diosca tucui istagunatachu gustan
Jehovaga ñucanchi cushilla causangahua, imasaibi shuc istata ranauchun munan. Chasna acpihuas, Diosca tucui istata, tucui ista punzhagunata alitachu ricun. Imata rashata pai imasa yuyashcata balichinchi.
1. Imahuata Jehovaga tucui istagunata mana alita ricun
Callari timpuibi, cunan timpuibi tiac istagunaga Bibliaibi mana mandashca chan. Chita yachasha, canga manzharinguichari. Maican istagunaga mana sirtu religiongunahuan, brujuguna rashcagunahuan chapurishca manaun. Chasnallata, huañushcaguna causasha catinaun nisha quirichinaun. Shuc istaguna randiga, tapiamanda, suertemanda yuyaigunata charinaun (Isaias 65:11). Chiraicu, Jehovaga paita sirviccunata caita nin: “Paigunamanda anchurichi [...]. Ima iridsatas ama llangaichichu” (2 Corintios 6:17). a
2. Jehovaga runagunata yapacta balichina istata imasata ricun
Jehovaga rimaitucunchi, “huañuglla runagunaibi” ama quirichichu. Caiga, tuglla cuinta man (Jeremias 17:5ta leipai). Maican istagunaga, mandaccunata, ricsiushca runagunata balichingahua man. Shuc istaguna randiga, banderata balichingahua, llacta lugaryashca punzhata yuyaringahua manaun (1 Juan 5:21). Shuc istagunaga, politicogunata o shuc organizaciongunata yanapangahua man. Diosta balichina randi, shuc runata o shuc organizacionda yapacta balichicpiga, Jehova imasashi sintirinma.
3. Shuc ista imasaibishi mana ali anma
Bibliaga, ʻyapacta tragota upisha, machasha nusparina istagunata ranaʼ mana ali chan nin (1 Pedro 4:3, TNM). Maican istagunaibiga, runaguna machasha, mana alita rasha, yuyai illac shina tucunaun. Jehovahua amigo tucunata munashaga, ucha ranagunamanda caruyana manchi.
CAIMANDA MASTA YACHAI
Istagunamanda can imata rana ashcata ricushun. Can alita rasha, Jehovata cushiyachinata ushangui.
4. Jehovata mana balichic istagunama ama richu
Romanos 12:2ta leichi, huasha cai tapuigunamanda cuintanacuichi:
-
Shuc istama chara mana riushallata, imaibita yuyana anchi.
-
Can causashca llactaibi, ima istagunata tian.
-
Jehovaga chi istagunata gustanzhu.
Jehovaga cumpleañota istamanda imata yuyashcata tapurishcanguichu. Bibliaga, maican Diosta sirvic runa cumpleañota istashcata mana cuintanzhu. Pero Bibliaibiga ishcai cumpleañogunamandami cuintan. Chi cumpleañogunataga Jehovata mana adorac runaguna istanaura. Genesis 40:20-22 y Mateo 14:6-10ta leichi. Huasha, cai tapuigunamanda cuintanacuichi:
-
Cai ishcai cumpleaño istaibiga, imata pasara.
-
Cai versiculogunata leishca huasha, Jehova cumpleaño istagunamanda imashinata ricun.
Casna acpihuas, can tapuringuima: “Ñuca cumpleaño istata racpi, o Bibliaibi mana rimashca istama ricpiga, Jehova imashinashi sintirinma”. Exodo 32:1-8ta leichi. Chimandas VIDEOTA ricuichi, huasha cai tapuigunamanda cuintanacuichi:
-
Imahuata Jehova munashcata rasha pactachina anchi.
-
Chita imasata rashun.
Jehova maican istata gustashcata imashinata yachashun
-
Bibliaga cai istata ranaga mana ali chan ninzhu. Cai istata rana maimanda llucshishcata yachai.
-
Cai istaga, runagunata, organizaciongunata, banderata, escudota yapactachu balichin. Ñucanchiga Jehovata imamandas mas yalita balichinchi. Cai munduibi tiac turmintugunata, Jehovalla tucuita alichingaraushcata quirinchi.
-
Bibliaga chi istaibi rashcaguna mana ali ashcatachu nin. Uchamanda caruyasha, alita rasha causana anchi.
5. Shuccuna can quirishcata balichinauchun cungailla yachachi
Jehova mana gustashca istama shuccuna acu nicpi, “mana” ninaga sinzhi man. Imahua chi istama can mana ringaraushcata mana piñarisha, respetohuan rimai. Shuc runa casna pasashcata yachangahua, cai VIDEOTA ricuichi.
Mateo 7:12ta leichi, huasha cai tapuigunamanda cuintanacuichi:
-
Cai versiculo nishca shina, mana quiric aillugunata cai istata mana rana changui nisha rimana changui.
-
Chi istagunama mana rishahuas, imasata camba ailluta respetashcata, llaquishcata ricuchinata ushangui.
6. Jehovaga ñucanchi cushi anatami munan
Jehovaga ñucanchi ailluhuan, ñucanchi amigogunahuan cushi pasachunmi munan. Eclesiastes 8:15ta leichi, huasha cai tapuimanda cuintanacuichi:
-
Cai Bibliamanda textoga, Jehova ñucanchi cushi ana munashcata, imasata ricuchin.
Jehovaga paita adoraccuna gustu, cushilla, asisha pasanauchunmi munan. Ñucanchi jatun asambleagunaibi, huauqui paniguna chasna cushilla pasashcata yachangahua, cai VIDEOTA ricuichi.
Galatas 6:10ta leichi, huasha cai tapuigunamanda cuintanacuichi:
-
Shuccunata alita rasha yanapangahua, istagunata rana chanchi.
-
Regalota cumbirangahua, istagunallaibichu cuna anchi o shungumanda amu munashcaibichu cuna anchi.
-
Ashca testigogunami cungaimanda paiguna churigunaraicu istagunata ranaun. Paigunata regalota cumbirasha, ashcata cushiyachinaun. Can huahuagunata charishaga, imagunatata gustu cumbiranata ushangui.
MAICANGUNAGA CASNAMI NINAUN: “Shuc ista maimanda shamushca, mana imas chan. Amigogunahuan, aillugunahuan ali gustu pasana mas balishca an”.
-
Canga imatata ninguima.
IMATA YACHASHCANGUI
Jehovaga aillugunahuan, amigogunahuan ali cushilla pasachunmi munan. Chasna acpihuas, pai mana gustashca istagunata rachun mana munanzhu.
Yachashcata cuintai
-
Jehova shuc ista gustashcata mana gustashcata yachangahua, imatata tapurina anchi.
-
Shuc istama mana ringaraushcata yachachingahua, ñucanchi aillugunata, amigogunata imasata intindichinata ushanchi.
-
Jehova ñucanchi cushi, gustu causachun munashcata, imasata yachanchi.
CANLLATA MASTA YACHAI
Jesusta caticcuna mana rashca istagunamanda leipai.
“Testigo de Jehovagunaga imahuata maican istagunata mana ranaun” (jw.org internet pistuibi)
Diosca cumpleañogunata ranata mana munanzhu. Chimanda, chuscu yuyaigunata yachai.
“Testigo de Jehovagunaga imahuata cumpleañogunata mana ranaun” (jw.org internet pistuibi)
Jehovata llaquic huahuaguna istagunama mana rishcamanda imashina paita cushiyachishcata ricui.
Ashca huaranga Jesusta caticcunami, Navidad istata mana ranaun. Chita rashaga, cushichu sintirinaun.
“Yapa balishcata tupashcauna” (La Atalaya, 1 de diciembre de 2012)
