ЛЕКЦИЈА 44
Сар дикхела о Девел ко прославе хем ко празникија?
О Јехова мангела те уживина ко живото хем ко адава вклучимо тано понекогаш те славина нешто. Ама, дали са о прославе хем о празникија тане угодна леске? Сар шај ко асавке да буќа те сикава кај аменге важно сар дикхела о Јехова?
1. Соске бут прославе хем празникија нане угодна е Јеховаске?
Шај ка изненадине тут ако дознајнеа кај бут прославе хем празникија на темелинена пе ки Библија или иси лен паганско потекло. Несаве таро адала прославе хем празникија поврзиме тане е ховавне религијаја, иси лен нешто спиритистичко или темелинена пе ко сикљојбе кај е мануше иси ле бесмртно душа. Несаве прославе хем празникија керена пе таро суеверие или те шај те анен бахталипе (Исаија 65:11). Адалеске о Јехова предупрединела пле слуген: „Одвојнен тумен... хем повише ма пипинен ништо сој мелало“ (2. Коринќаните 6:17). a
2. Со мислинела о Јехова башо прославе хем празникија кола со дена претерано чест е манушенге?
О Јехова предупрединела амен те на чхива амари „доверба ко мануша“. (Читин Еремија 17:5.) Несаве прославе хем празникија дена чест е владетеленге или е војниконге. А ко јавера прославе хем празникија славинена пе национална симболија или о диве кеда јекх држава ули независно (1. Јованово 5:21). А несаве палем, славинена политичка организацие или организацие кола со боринена пе башо правија е манушенгере. Сар би осетинела пе о Јехова ако даја претерано чест јекхе манушеске или организацијаке, посебно околенге со ширинена идее сој тане против лескири волја?
3. Сар понашинена пе о мануша ко несаве прославе хем празникија?
И Библија осудинела о претерано пијбе, о распуштена забаве хем о натпреварија пијбаске (1. Петрово 4:3). Ко несаве прославе хем празникија о мануша понашинена пе бизи контрола хем керена неморална буќа. Те шај те ачхова е Јеховаскере амала амен мора те цида амен таро асавко морално мелалипе.
ДОЗНАЈН ПОВИШЕ
Дознајн сар шај те кере бахтало е Јехова аѓаар со ка ане мудра одлуке башо прославе хем празникија.
4. Ма учествујн ко прославе или празникија со на мангела о Јехова
Читин Ефешаните 5:10, а пало адава керен лафи башо акала пучиба:
-
Со мора те испитина англедер те ана одлука дали ка учествујна ки несави прослава или празнико?
-
Саве прославе или празникија тане популарна ко тхан коте со живинеа?
-
Со мислинеа, дали ола тане угодна е Јеховаске?
На пример, дали некогаш пучљан тут со мислинела о Девел башо адава те славинел пе о бијандо диве? Ки Библија на пишинела кај несаво слуга е Јеховаскоро славинѓа пло бијандо диве. Ама, ки лате пишинела кај дуј мануша кола со на служинена сине е Јеховаске славинѓе пумаро бијандо диве. Читин 1. Мојсеева 40:20-22 хем Матеј 14:6-10, а пало адава керен лафи башо акала пучиба:
-
Со иси лен заедничко акала дуј прославе башо бијандо диве?
-
Спрема акала библиска извештаија, со мислинеа, сар о Јехова дикхела ко адава те славинел пе о бијандо диве?
Сепак, шај пучеа тут: „Дали е Јеховаске чаче тано добором важно дали ме ка џав ки јекх прослава башо бијандо диве или ки јекх јавер прослава која тани против лескере начелија?“ Читин 2. Мојсеева 32:1-8, а пало адава дикх о ВИДЕОКЛИПИ хем керен лафи башо акала пучиба:
-
Соске тано важно те џана кола прославе хем празникија мангела о Јехова а кола на?
-
Со мислинеа, сар шај те дознајна адава?
Сар шај те дознајна кола прославе или празникија на мангела о Девел?
-
Дали темелинена пе ко сикљојба со нане библиска? Те шај те дознајне адава испитин о потекло.
-
Дали дена чест е манушенге, е организациенге или национална симболенге? Амен сикаваја чест само е Јеховаске хем иси амен доверба кај ов ка решинел о проблемија ко свето.
-
Дали адава со керела пе ки ленде тано против е Девлескере начелија? Амен ваљани те ачхова морално чиста.
5. Поможин е јаверенге те поштујнен тле верувања
Шај те овел аменге пхаро кеда о јавера керена аменге притисок те учествујна ко несаве прославе или празникија кола со на мангела о Јехова. Ама, ко асавке ситуацие ов стрпливо хем тактично објаснин тле одлуке. Те шај те дикхе јекх пример сар шај те кере адава дикх о ВИДЕОКЛИПИ.
Читин Матеј 7:12, а пало адава керен лафи башо акала пучиба:
-
Спрема акава стихо, дали ваљани те вакере околенге тари тли фамилија кола со на служинена е Јеховаске, кај на ваљани те славинен несаво празнико?
-
Сар шај те сикаве тле фамилијаке кај, иако на славинеа ленцар, сепак мангеа лен хем ценинеа лен?
6. О Јехова мангела те ова бахтале
О Јехова мангела те уживина ко шуже моментија амаре фамилијаја хем амаре амаленцар. Читин Проповедник 8:15, а пало адава керен лафи башо акава пучибе:
-
Сар акава стихо сикавела кај о Јехова мангела те ова бахтале?
О Јехова мангела лескоро народо те овел бахтало хем те уживинел кеда тано заедно. Дикх о ВИДЕОКЛИПИ кова со сикавела сар адава дикхјола пе ко амаре меѓународна конгресија.
Читин Галатите 6:10, а пало адава керен лафи башо акала пучиба:
-
Дали ваљани те славина о популарна празникија те шај „те кера шукарипе“ е јаверенге?
-
Со би керела тут побахтало, ако поклонинеа некаске нешто адалеске со адава очекујнела пе тутар ко несаво одредимо диве, или ако кереа адава спонтано адалеске со мангеа?
-
Бут Јеховаскере сведокија понекогаш организиринена несави забава пумаре чхавенге хем изненадинена лен аѓаар со дена лен поклонија. Ако иси тут чхаве, сар шај те кере лен бахтале?
НЕСАВЕ ШАЈ ВАКЕРЕНА: „Нане важно о потекло тари несави прослава или празнико. Важно тано со тегани сием заедно е фамилијаја хем е амаленцар“.
-
Со ка вакере ту?
СО СИКЛИЛЕМ
О Јехова мангела те уживина кеда сием заедно амаре фамилијаја хем амаре амаленцар. Ама, ов на мангела те учествујна ко прославе или празникија кола со нане угодна леске.
Сар ка одговорине?
-
Кола пучиба ка поможинен аменге те дознајна дали јекх прослава или празнико тано угодно е Јеховаске?
-
Сар шај те поможина е јаверенге те хаљовен соске на учествујнаја ко несаве прославе или празникија?
-
Котар џанаја кај о Јехова мангела те ова бахтале хем те уживина ко живото?
ИСТРАЖИН
Дикх сар о тикне чхаве кола со мангена е Јехова керена ле радосно џикоте иси празникија.
Милиоња христијања одлучинѓе те на славинен Божико. Дали жалинена баши адаја одлука?
„Нешто поубаво од Божиќ“ (Стражарска кула таро 1 декември 2012)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
