LESOGNE 44
Teàn’Andrianagnahare Iaby vao Ze Kila Fete?
Teà i Jehovah hankamamy o fiaignagneo tikagne sady mba hanao fete ka kindraike. Faie mampifale aze iaby vao ze kila fete? Akore ty ampisehoantikagne fa te hampifale i Jehovah amy ty fete ataontikagne tika?
1. Nagnino ro maro ty fete tsy tea i Jehovah?
Va’e ho gaga rehe fa tsy boake amy ty Soratse Masigne ty ankamaroa o feteo fa boake amy ty fanompoan-tsampy ndra ty fivavahan-diso. Va’e misy ifandrambesa’e amy ty demonia ka i fete rey ndra boake amy ty fampianaragne tihoe tsy mete mate ty fagnahy o ndatio. Ty fete ila’e ka boake amy ty finoanoam-poagne ndra boake amy ty finoagne tihoe misy o vintagneo. (Isaia 65:11) Mampitao ty mpanompo’e areke ty Jehovah mba ‘tsy hikasike i raha maloto rey sasa.’—2 Korintianina 6:17. a
2. Akore ty fihevera i Jehovah i fete fagnomezam-boninahitse o ndatio rey?
Mampitao antikagne ty Jehovah mba tsy ‘hatoky o ndatio.’ (Vakio ty Jeremia 17:5.) Ty fete ila’e magnomey voninahitse o mpitondrao ndra o maramilao. Misy ka ty fete mankalaza ty fahaleovan-tegna i firenenay, le mampipetake drapeau amy ty tragno’e. (1 Jaona 5:21) Ty ila’e ka manohagne ty fikambanagne ara-politike ndra ara-tsosialy. Mateteke mifanohetse amy ty zoton’arofo i Jehovah ty raha atao i ndaty rey ndra i fitondragne rey. Ho fale vao ty Jehovah naho magnomey voninahitse iareo tikagne?
3. Ino amy ty raha atao o ndatio amy ty fete ila’e ro mampiseho tie tena tsy soa i fetey?
Rarà ty Baiboly ty “finoman-toake maro, ty fete baranahigne vaho ty fifaninanagne minon-toake.” (1 Petera 4:3) Amy ty fete ila’e, le tena tsy mahafehe tegna o ndatio sady raty findesam-batagne. Toko’e hagnalavitse ze raha rezay areke tikagne naho te hinamagne amy i Jehovah lognandro.
ANDAO HANDINEKE TY PITSOPITSO’E
Hodinehentikagne ato tie, ino ty toko’e hatao’o mba hampifale i Jehovah ty fanapahan-kevetse rambese’o naho fa misy fete.
4. Ko manao ty fete tsy tea i Jehovah
Vakio ty Efesianina 5:10, sady iharò midineke ty fagnonteneagne retoa:
-
Ino ty raha toko’e ho fantarentikagne hey naho fa hanapa-kevetse tie hanao ty fete raike sa tsy hanao?
-
Inogne iaby ty fete fanoe ty ndaty amy ty tane misy anareo ey?
-
Naho ty heve’o, tea i Jehovah vao i fete rey?
Fa nieretserete’o vao ohatse tie akore ty fihevera i Jehovah o aniveriserao? Tsy rehafe ty Baiboly tie misy mpanompo i Jehovah nanao aniverisera. Ndaty tsy mpanompo i Jehovah roe ty rehafe’e ao tie nanao aniverisera. Vakio ty Genesisy 40:20-22 naho ty Matio 14:6-10, sady iharò midineke ty fagnonteneagne retoa:
-
Ino ty itoviza o fankalazagne aniverisera rehoe?
-
Naho ty heve’o, akore ty fihevera i Jehovah o aniveriserao naho henteagne o tantara rehoe?
Va’e mbe hieretseretse avao rehe tie: ‘Tena tsy tea i Jehovah vao naho mandrambe anjara amo o aniveriserao raho ndra fete hafa tsy mifagnarake amy ty Baiboly?’ Vakio ty Eksodosy 32:1-8. Naho fa avy eo le alefaso i VIDEO oy, sady iharò midineke ty fagnonteneagne retoa.
-
Nagnino ro toko’e ho fantarentikagne soa tie ino ty raha mampifale i Jehovah?
-
Ino ty hagnampe antikagne amy izay?
Akore ty ahafantaragne fa tsy mampifale i Jehovah ty fete raike?
-
Fampianaragne tsy mioregne amy ty Baiboly vao ty nifotora i fetey? Dineho ty niatomboha’e mba hahaia’o izay.
-
Magnomey voninahitse ndaty, fikambanagne ndra mareke amantaragne o firenenao vao i fetey? I Jehovah raike avao ro toko’e homeantikagne voninahitse sady atokisantikagne tie i reke avao ro mahavita mamaha ty olagne mahazo o ndatio.
-
Mifagnarake amy ty fitsipy ty Baiboly vao ty raha anoegne amy i fetey ndra ty fombafomba ama’e? Toko’e halio avao ty feo ty fieretseretantikagne.
5. Ampeo ty hafa mba hagnaja ty raha inoa’o
Misy fotoagne va’e ho sarotse ty mandietse naho fa misy ndaty manere antikagne hanao ty fete tsy tea i Jehovah. Mikezaha areke mba ho soa fagnahy sady hanam-paharetagne naho fa magnazava ty fanapahan-keve’o amy iareo. Intoy misy ohatse raike hagnampe antikagne amy ty fanoagne izay. Alefaso i VIDEO oy.
Vakio ty Matio 7:12, sady iharò midineke ty fagnonteneagne retoa:
-
Naho henteagne o andinin-teny iohoe, mete vao naho mirehake amy ty keleia’o tsy vavolombelogne rehe tie tsy toko’e hankalaza fete iareo?
-
Ino ty azo’o atao, amy izay ty keleia’o hahatsapa tie tea’o avao iareo ndra tie tsy miarake manao fete amy iareo rehe?
6. Tea i Jehovah hifalefale tikagne
Tea i Jehovah hiarake hifale amy ty keleiantikagne naho ty namantikagne tika. Vakio ty Mpitoriteny 8:15, sady iharò midineke ty fagnonteneagne toy:
-
Naho henteagne o andinin-teny iohoe, ino ty mampiseho fa tea i Jehovah hifalefale tikagne?
Tea i Jehovah hiarake hifale ty vahoa’e. Alefaso i VIDEO oy mba hahatreava’o fa izay ty raha miseho naho fa misy havoriambey iraisam-pirenena.
Vakio ty Galatianina 6:10, sady iharò midineke ty fagnonteneagne retoa:
-
Toko’e hankalaza fete marom-panao vao tikagne mba ‘hanoagne soa’ amy ty hafa?
-
Ino ty raha tena mahafale azo: Tihoe tsy maintsy magnomey raha hoahy ty hafa naho fa fete vao, sa afake magnomey avao rehe ndra ombia ndra ombia ty tea’o hanoagne izay?
-
Maro ty Vavolombelo i Jehovah nanao raha miambake kede hoahy ty ana’e kindraike ndra nanao fagnomezagne hoahy iareo amy ty fotoagne tsy ampoize’e. Naho managn’anake areke rehe, inogne iaby ty raha miambake azo’o atao hoahy iareo?
MISY TY MIREHAKE TIE: “Mete iaby naho fa fete ndra boake aia ndra boake aia ty nifotora’e. Io ty mba fotoagne mahafale iharoagne amy ty keleiagne naho amy ty namagne.”
-
Akore ty havale’o izay?
FAMINTIGNAGNE
Tea i Jehovah hiarake hifale amy ty keleiantikagne naho amy ty namantikagne tika. Faie misy fete tsy toko’e hataontikagne satria tsy tea’e.
Fameregnagne
-
Inogne iaby ty fagnonteneagne toko’e hoeretseretentikagne mba hahafantarantikagne tie tea i Jehovah vao ty fete raike sa tsy tea’e?
-
Ino ty azontikagne atao amy ty keleiantikagne naho amy ty namantikagne, amy izay iareo magnaja ty fanapahan-keventikagne miomba ty fete raike?
-
Ino ty mampiseho fa tea i Jehovah hifalefale tikagne?
FAGNAZAVAGNE FAGNAMPE’E
Ho trea’o ato ty fete ila’e tsy anoe ty tena Kristiana.
“Nagnino ro Misy Fete Ila’e Tsy Anoe ty Vavolombelo i Jehovah?” (Lahatsoratse amy jw.org ao)
Misy porofo efatse ty ato mampiseho tie tsy mampifale i Jehovah o aniveriserao.
“Nagnino o Vavolombelo i Jehovah-o ro Tsy Manao Aniverisera?” (Lahatsoratse amy jw.org ao)
Ino ty natao ty tanora raike toy naho fa nitsikihe ty mpiara-mianatse ama’e reke satria tsy nanao Krismasy?
Kristiana maro ty mifily ty tsy hanao Krismasy. Mate antoke vao iareo fa tsy manao izay?
“Nahatrea Raha Tena Soa Iareo” (Fitalakesan-davitse 1 Desambra 2012)
a Henteo ty Fagnazavagne 5 mba hahafantara’o tie ino ty toko’e hatao’o naho misy ndaty mankalaza i fete rey.
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
