AZizọs atughemhị mọ abutelhedom mọ odị “k/abuọ aḅirini phọ.” (Jọn 15:19) Iphẹn phọ remạ ghan mọ bidị kotọl dọl asạm, iduọn phọ pọ ko/ḍighom aani itooghị imirighan r’araaghạm. Ogbạ agey, re/dugh ghan orọl asạm. Kotue ni otuạn iphẹn phọ ugilaạm iyira. Ika kụ idị yira kotue otọl dọl asạm kụ oḅạr aZihova Enhaạn phọ?

1. Abugey aKristẹn omiịn ika itooghị omhạr awe?

Akristẹn rolọgh ghan ni eegu buọ itooghị phọ. Yira roḍighi ghan ipẹ aZizọs aghaạph bọ kosogh ‘Iisogh ilọ aSiza ongọ Siza,’ iduọn phọ pọ, yira ronaghanhạn ghan ni iilhogh ekpisi phọ yira odi bọ, idiphọ okpẹ iisogh ongọ agomẹt. (Mạk 12:17) ABaibul phọ atughemhị mọ itooghị omhạr awe edi loor esi dị aZihova kụ amheera mọ bidị erọl. (Rom 13:1) Esi iduọn phọ, yira omeeraam mọ iikpọ itooghị omhạr awe emoọgh ni esi dị ekpọ ukpe. Kụ yira rogon ni dị Enhaạn kasighẹ Omhạr phọ odị asiemhiom eekunha iiḅaghamhị omhạr awe.

2. Yira koḍeenhaan ika mọ yira odi ni dọl asạm?

Idiphọ aZizọs, yira ro/ḍighom aani ghan itooghị imirighan. Mem dị awe omhiịn iniin iiḍaạny dị aZizọs aḍighi kụ owạ oḍighi odị odaạm emạ, odị o/mheera. (Jọn 6:15) Eeghe kụ iḍighi? Odị aḅẹm mọ, “Edaạm emạ [itooghị] phọ amị ke/Iọ aḅirini phọ ophọn.” (Jọn 18:36) Idiphọ abumatuạn aZizọs, yira roḍeenhaan ghan mọ yira odi ni dọl asạm esi ibadị areten. Esi omaạm, yira ro/kị ghan ee eghạm. (Ibạl Micah 4:3.) Yira rolọgh ghan ni eegu elhegh eelhe phọ—idiphọ alagbạ—kuolọ yira ro/ngọ ghan bidị eghuan dị kongọ Enhaạn. (1 Jọn 5:21) Kụ yira ro/ḍighan ghan kẹn obobọ ro/be ghan koghị esi abuọ itooghị phọ obobọ oye dị rawạ otooghị. Esi iphẹn phọ r’inhọn areten, yira roḍeenhaan ghan mọ yira okạr ri oḅạr itooghị phọ Enhaạn, eḍighi bọ Omhạr phọ odị.

 OLHEGHERI OBUGHẸ

3. Abugey aKristẹn rotọl ghan dọl asạm

AZizọs r’abumatuạn phọ odị mophighi ni eḍeenhaan ungọ iyira. Ibạl Rom 13:1, 5-7 r’1 Pita 2:13, 14. Ipẹ reten, ipegh VIDIO phọ kụ eeḅeghiọn sipuru phọ edaphạn bọ siẹn.

• Uḍighi ika kụ yira kolọgh bọ eegu buọ itooghị phọ?

• Ighẹn kụ iniin areten dị yira kotue oḍeenhaan mọ yira osooromhi ni loor ongọ bidị?

Mem eghạm, iniin areelhe roḅẹm ghan ni mọ bunọ u/ḍigh gạ, kuolọ rologhonhaạn ghan ni ḍighaạgh buphẹ robe bọ. Remạ ghan eeghe orọl adọl asạm? Ibạl Jọn 17:16. Ipẹ reten, ipegh VIDIO phọ kụ eeḅeghiọn ḍipuru phọ edaphạn bọ siẹn.

• Remạ ghan eeghe orọl adọl asạm?

Kokaạph ika eḍighi maạr dị abuọ itooghị phọ owạ mọ ḍighi iyaạr dị egbạgh olhogh Enhaạn? Ibạl Iiḍighi 5:28, 29. Ipẹ reten, ipegh VIDIO phọ kụ eeḅeghiọn sipuru phọ edaphạn bọ siẹn.

• Eḍighi maạr dị olhogh dị awe olhọgh agbạgh olhogh Enhaạn, oghẹn kụ akpẹ dị yira kodạph?

• Nạ atue ni aatughiạn simem dị kewạ mọ onyọ aKristẹn ku/naghanhạn itooghị awe?

 4. Tọl dọl asạm esi iitughiạn r’eḍighinhom araraạr

Ibạl 1 Jọn 5:21. Ipẹ reten, ipegh VIDIO phọ kụ eeḅeghiọn sipuru phọ edaphạn bọ siẹn.

• Siphẹ avidio phọ, eeghe kụ iḍighi kụ Ayenge asopha bọ mọ onọ ka/ḍighom aani ekụ imirighan itooghị obobọ iiḍighi areelhe phọ, idiphọ oghuenhi alagbạ phọ?

• Nạ ragbi mọ osopha phọ odị aḍeenhaan ni osụ olhoghi?

Ighẹn inhọn asidọl kụ ketue edẹgh epogh dọl asạm mọ ayira? Ipegh VIDIO phọ, kụ eeḅeghiọn sipuru phọ edaphạn bọ siẹn.

• Ika kụ idị yira kotue otọl dọl asạm mem dị areelhe ropegh reepheegh?

• Ika kụ idị yira kotue otọl dọl asạm ghalhamọ osopha abuọ itooghị phọ utir ri iyira?

• Ika kụ idị araraạr iinhaghạn phọ r’abuphẹ yira rooḍikuan ghan bọ kotue otir dọl asạm mọ ayira?

 OGHAẠPH OOKARAGH

Akristẹn roḍighi ghan oomo ipẹ bidị kotue bọ orọl adọl asạm esi iitughiạn, ikpo-onhụ, ḅilhẹ r’eḍighinhom araraạr mem dị egbolhomaam itooghị imirighan.

Ooḅula

• Eeghe iyaạr kụ edị yira kotue ongọ itooghị omhạr awe?

• Uḍighi ika kụ yira ro/ḍighom aani ghan bọ itooghị imirighan?

• Ighẹn asidọl kụ ketue edẹgh epogh dọl asạm mọ ayira?