Gyisɛsɩ ihilehileli kɛɛ yɩ adʋwavʋlɔ yɩ “bɛ́dɩ tanɩ oyuwadɩ eyi yɩ dɩyɛ.” (Dwɔɔnʋ 15:19) Eyi kile kɛɛ belékyina ɔfʋã bela wɔ oyuwadɩ manlɩwulɛ ndwokɔ nɩɩ kʋnɛ nu. Nɔhʋanlɛ nu nɩ, kɛ mmɩlɩ munwala yɛ ɩyɛ mɛlɛkɛ kɛɛ yelékyina ɔfʋã bela a. Ebiye a eyi ti bɛkɛzɩlɩ yɛ. Kɛ yɛkɛyɛ na yɛágyinanlɩ ɔfʋã bela na yɛahɔlɩ ɔzʋlɔ yɛali nɔhʋanlɛ yɛama Gyehova Nyamɩnlɩ a?

1. Kɛ nɔhʋanlɛ Kilisinyiamaa bobu enii yɩ aɣanɩ bese a?

Kilisinyiamaa bu aɣanɩ yɩ. Kɛmɔ Gyisɛsɩ ɩhanlɩ kɛɛ “mɔɔ ɩdɩ Siiza dɩyɛ nɩ, boduwá bɛma Siiza” nɩ, ɔzɔ la yɛ yɛyɛ a. Meti yedi mmɛla mɔɔ ɩwɔ manlɩ yi nu nɩ zʋ, dɩkɛɛ ndwuliyɛ mɔɔ yekoduwa. (Maakɩ 12:17) Bayɩbʋlʋ yɩ ikilehile kɛɛ enii yɩ aɣanɩ idii tumi iluwakɛɛ Gyehova yɛ ɩma ɔhʋanɩ bɛ kɛɛ belí tumi a. (Wulomimaa 13:1) Meti yezi kɛɛ bɛlɛ tumi dɩyɛ, naasʋ̃ bo tumi ɩádʋ Nyamɩnlɩ yɩ dɩyɛ. Yɛ anyɩ ɩla kɛɛ Nyamɩnlɩ nɩɩ yɩ sʋlɔ Bulombunlililɛ yɩ ɩkɛyɩ adasamaa yɛ ɔhawʋ wɔ ɛkɛnɩ.

2. Kɛ ɩkɛyɛ na yɛahile kɛɛ yégyĩ ɔfʋã bela a?

Kɛmɔ Gyisɛsɩ ɩyɛlɩ nɩ, yɛáva yɛ nwʋ yewula manlɩwulɛ ndwokɔ nu. Mmɩlɩ mɔ mmenii nɩ bɔnwʋnlɩ nnwʋánlɩ nninyeni mɔɔ Gyisɛsɩ ɩyɛlɩ nɩ, bɔwɔlɩ mmɔdɩnɩ kɛɛ bɛkɛyɛ yɩ bo bulombunli wɔ azɩlɛ yɩ zʋ. Naasʋ̃ ɩáma ɔhʋanɩ bɛ. (Dwɔɔnʋ 6:15) Mɩnla ti a? Iluwakɛɛ, aɣinzi nɩ ɩhanlɩ kɛɛ, “mu Bulombunlililɛ nɩ íni oyuwadɩ eyi nu.” (Dwɔɔnʋ 18:36) Kɛ Gyisɛsɩ yɩ adʋwavʋlɔ nɩ, yɛda yɩ ali kɛɛ yégyĩ ɔfʋã bela wɔ ahʋanɩ sʋ̃maa nu. Kɛ ndianwʋ nɩ, yɛáhɔ kʋnɛ. (Kɩnga Mika 4:3.) Yebu manlɩ ndwɩyɛlɛ azʋlɔtʋ dɩkɛɛ flagɩ, naasʋ̃ yɛázʋ̃mɩ bɛ. (1 Dwɔɔnʋ 5:21) Na yɛádɩndɛ yetiyia anzɛnyɩɩ yɛágyina manlɩwulɛ okuwu be mɛda. Ɔzɔ la sʋ̃ yɛ sɛ bo nu be ɩpɩlɩɩ tumililɛ a, yɛádɩndɛ yetiyia yɩ na yɛágyina yɩ mɛda. Yeduwa ahʋanɩ eyimmɔ nɩɩ mvʋlɔ zʋ yɛda yɩ ali kɛɛ yedi nɔhʋanlɛ yɛma Nyamɩnlɩ aɣanɩ, mɔɔ mɛyɩ yɛ lɛ yi Bulombunlililɛ yɩ nɩ.

 SUMÁ SƲ̃MAA

3. Nɔhʋanlɛ Kilisinyiamaa bɛágyina ɔfʋã bela

Gyisɛsɩ nɩɩ yɩ adʋwavʋlɔ yɩ yɛlɩ ndianwʋ manlɩ yɛ. Kɩnga Wulomimaa 13:1, 5-7 nɩɩ 1 Pita 2:13, 14. Akʋ̃, yɩ́ VIDIYO nɩ na bozunzú ndwokɔɣizialɛ mɔɔ ili ɛkɛnɩ nɩ nwʋ.

• Mɩnla ti mɔɔ ɩsɛ kɛɛ yebu adumivʋlɔ a?

• Mɩnla ɔhʋanɩ zʋ yɛ yɛda yɩ ali kɛɛ yɛkã yɛ nwʋ azɩ yɛma bɛ a?

Sɛ kʋnɛ be isi a, ɩyɛ a manlɩ be ɩyɛ yɩ nwʋ kɛɛ ígyĩ ɔfʋã bela, naasʋ̃ ɔkɔhɔ numɔ nɩ, nɩ mɛyɩ yɛ ɩsɩzaa sɩnɩ ikua numɔ a. Meti sɛ bɛkã kɛɛ abiye ígyĩ ɔfʋã bela a, mɩnla paa yɛ ikile a? Kɩnga Dwɔɔnʋ 17:16. Akʋ̃, yɩ́ VIDIYO nɩ na bozunzú odwokɔɣizialɛ mɔɔ ili ɛkɛnɩ nɩ nwʋ.

• Mɩnla yɛ ɔfʋã bela mɔɔ yɛágyina nɩ ikile a?

Na sɛ aɣanɩ mbanimbani bɛkã kɛɛ yɛyɛ́ dɩyɛ be mɔɔ itiyia Nyamɩnlɩ mmɛla sʋ̃ ɛ? Kɩnga Egyima 5:28, 29. Akʋ̃, yɩ́ VIDIYO nɩ na bozunzú ndwokɔɣizialɛ mɔɔ ili ɛkɛnɩ nɩ nwʋ.

• Sɛ ɩba yɩ kɛɛ enii hyɩhyɛ mmɛla na ɩ nɩɩ Nyamɩnlɩ yɩ dɩyɛ iáyiyia a, aninyia yɛ ɩsɛ kɛɛ yetiye yɩ a?

• Mɩnla bʋwabɩlɛ yɛ ɩlɛ́ma Kilisinyianii be ikediye manlɩ mbanimbani a?

 4. Áma ekyina ɔfʋã bela wɔ adwɩnɩ nɩɩ nyɛlɩyɛ nu

Kɩnga 1 Dwɔɔnʋ 5:21. Akʋ̃, yɩ́ VIDIYO nɩ na bozunzú ndwokɔɣizialɛ mɔɔ ili ɛkɛnɩ nɩ nwʋ.

• Wɔ vidiyo yi nu nɩ, mɩnla ti mɔɔ Ayenge izili pɔkɔ kɛɛ ɩlɛ́fa yɩ nwʋ ɩkɔwɔ manlɩwulɛ okuwu anzɛnyɩɩ ilésema flagɩ yɩ a?

• Asʋ̃ ekila a, izili pɔkɔ baaba a?

Mɩnla bʋwabɩlɛ mvʋlɔ yɛ ɩkɔhʋla ikodwe ɔfʋã bela mɔɔ yɛágyina nɩ ikehila a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.

• Sɛ ɛɣɛlɛlilɛ be ɩkɔlɩɩ ɔzʋlɔ wɔ manlɩ azʋlɔtʋ be bɛ avinli a, kɛ yɛkɛyɛ na yɛágyinanlɩ ɔfʋã bela a?

• Sɛ manlɩwulɛmaa si pɔkɔ be na ɩákɔ bʋwɔ ɩma yɛ po a, kɛ yɛkɛyɛ na yɛágyinanlɩ ɔfʋã bela a?

• Sɛ yɛta yetiye manlɩwulɛ nwʋ amanɩyɛwɔlɛ wɔ TV nɩɩ ɣilediyo zʋ anzɛnyɩɩ yɛ nɩɩ mmenii mɔɔ bɛta bɛkã manlɩwulɛ ndwokɔ bɔ a, mɩnla ti mɔɔ ɩkɔhʋla ɩkɛyɛ sɩ kɛɛ yelékyina ɔfʋã bela a?

 YƖ DƆKƆWƆLƐ

Kilisinyiamaa bɔ mmɔdɩnɩ duwa mɔɔ bɔdwɩnɩ nwʋ, bo ndwokɔhanlɛ nɩɩ bɛ nyɛlɩyɛ zʋ bekile kɛɛ bɛágyina ɔfʋã bela wɔ manlɩwulɛ ndwokɔ nu.

Kɛ Okowuwa Ekeze a?

• Mɩnla asɛdɩ yɛ ɩsɛ kɛɛ yɛyɛ yɛma enii yɩ aɣanɩ a?

• Mɩnla ti mɔɔ yɛágyina ɔfʋã bela wɔ manlɩwulɛ ndwokɔ nu a?

• Mɩnla bʋwabɩlɛ yɛ ɩkɔhʋla ikodwe ɔfʋã bela mɔɔ yɛágyina nɩ ikehila a?