Zezi seli i sɔnnzɔnfuɛ’m be kɛ ‘nán be yo mɛn nunfuɛ.’ (Zan 15:19) I sɔ’n kle kɛ e faman e wun e wlaman mɛn’n nun politiki’n nin alɛ’m be nun. Ɔ ju wie’n, kɛ ɔ ko yo naan y’a kle kɛ e timan mɛn’n nunfuɛ’n ɔ timan pɔpɔ. Asa’n, kɛ mɔ e faman e wun e wlaman mɛn’n nun ninnge’m be nun’n ti’n, sran wie’m be kwla yo e finfin. ?É yó sɛ naan y’a kle kɛ e timan mɛn’n nunfuɛ naan Zoova i klun w’a jɔ e wun?

1. ?Wafa sɛ yɛ Klisifuɛ mun be bu awa mun-ɔn?

Klisifuɛ mun be ɲin yi awa mun. Kɛ nga Zezi fa kannin’n sa’n ‘e fa ninnge nga be ti Sezaa liɛ’n e fa mɛn i.’ Yɛle kɛ e di mmla nga awa kpɛ be’n be su. I wie yɛle kɛ e su lapo. (Marki 12:17) Biblu’n se kɛ mɛn siefuɛ nga be o lɛ’n, Ɲanmiɛn ti yɛ be o lɛ-ɔ. (Rɔmunfuɛ Mun 13:1) Ɔ maan e wun i wlɛ kɛ kwlalɛ nga mɛn siefuɛ’m be le i’n, ɔ juman Ɲanmiɛn liɛ’n nun kaan sa. E lafi su kɛ Ɲanmiɛn Sielɛ’n yɛ ɔ́ wá yí klɔ sran’m be su afɛ’n niɔn.

2. ?Wafa sɛ yɛ e kwla kle kɛ e timan mɛn’n nunfuɛ-ɔ?

Kɛ Zezi sa’n e yoman politiki. Cɛn kun mɔ Zezi yoli abonuan sa wie mun’n, sran’m be waan bé síe i famiɛn asiɛ’n su wa. Sanngɛ w’a kplinman su. (Zan 6:15) ?Ngue ti yɛ w’a kplinman su-ɔ? Afin i bɔbɔ seli kɛ: “Min Famiɛn Dilɛ’n finman klɔ sran mun.” (Zan 18:36) Kɛ Zezi sa’n, ninnge kpanngban nun’n e kle kɛ e timan mɛn’n nunfuɛ. I wie yɛle kɛ e kunman alɛ. (Kanngan Mise 4:3 nun.) E ɲin yi nvle’n i nzɔliɛ ninnge kɛ flanga sa’n, sanngɛ e manmanman be. (1 Zan 5:21) E jranman politikifuɛ annzɛ politiki anuannzɛ wie fi sin. Ninnge kwlaa sɔ’m be nun’n, e kle kɛ e jran Ɲanmiɛn Sielɛ’n i sin.

 SI NDƐ’N NUN KPA EKUN

3. Klisifuɛ kpa’m be faman be wun be wlaman politiki nun

Zezi nin i sɔnnzɔnfuɛ’m be kleli e like ng’ɔ fata kɛ e yo’n. An kanngan Rɔmunfuɛ Mun 13:1, 5-7 nin 1 Piɛli 2:13, 14 nun. I sin’n, an bo VIDEO’N yɛ an koko kosan yɛ’m be su yalɛ.

• ?Ngue ti yɛ ɔ fata kɛ e ɲin yi mɛn siefuɛ mun-ɔn?

• ?Wafa sɛ yɛ e kwla kle kɛ e ɲin yi be-ɔ?

Ɔ ju wie’n nvle wie’m be waan be kunman alɛ’n wie. Sanngɛ be suan be nga be su kun alɛ’n be bue nɲɔn’m be bo. ?Kɛ be se kɛ be faman be wun be wlaman politiki nun’n i bo’n yɛle benin? An kanngan Zan 17:16 nun. I sin’n, an bo VIDEO’N yɛ an koko kosan yɛ’n i su yalɛ.

• ?Kɛ be se kɛ e timan mɛn’n nunfuɛ’n i bo’n yɛle benin?

?Yɛ sɛ mɛn siefuɛ’m be se e kɛ e yo like wie m’ɔ fɔn Ɲanmiɛn mmla’n nin? An kanngan Sa Nga Be Yoli’n 5:28, 29 nun. I sin’n an bo VIDEO’N yɛ an koko kosan yɛ’m be su yalɛ.

• ?Sɛ klɔ sran’m be mmla’n ɔ fɔn Ɲanmiɛn liɛ’n, mmla benin yɛ ɔ fata kɛ e di su-ɔ?

• ?Kɛ a niɛn i sa’n, sa benin nun yɛ Klisifuɛ’m be su yoman like nga mɛn siefuɛ’m be se be kɛ be yo’n niɔn?

 4. Maan akunndan nga a bu’n ɔ nin ɔ ayeliɛ’n be kle kɛ a timan mɛn’n nunfuɛ

An kanngan 1 Zan 5:21 nun. I sin’n, an bo VIDEO’N yɛ an koko kosan yɛ’m be su yalɛ.

• ?Video’n nun’n, ngue ti yɛ Ayenge w’a fɛmɛn i wun w’a wlaman politiki anuannzɛ wie nun, annzɛ w’a manmanman flanga’n niɔn?

• ?Kɛ a niɛn i sa’n ajalɛ kpa yɛ ɔ fɛli i lɛ-ɔ?

?Sa benin mun yɛ sɛ y’a nianman e wun su’n, be kwla yo naan y’a fa e wun y’a wla mɛn’n nun ninnge’m be nun-ɔn? An bo VIDEO’N, i sin’n an koko kosan yɛ’m be su yalɛ.

• ?Kɛ nvlenvle’m be si akplowa ngowa kanlɛ ninnge wie’m be nun’n, wafa sɛ yɛ e kwla kle kɛ e jranman be nun wie fi sin-ɔn?

• ?Sɛ ajalɛ nga politikifuɛ’m be fa’n ɔ ti e liɛ su annzɛ ɔ timan e liɛ su’n, wafa sɛ yɛ e kwla kle kɛ e jranman be nun wie fi sin-ɔn?

• ?Wafa sɛ yɛ sɛ y’a nianman e wun su’n ndɛ nga be kɛn i televiziɔn nun, annzɛ zronali’m be nun annzɛ ndɛ nga e wiengu’m be kan’n, ɔ kwla yo naan y’a fa e wun y’a wla politiki nun-ɔn?

 NDƐ’N I KPƆLƐ BOLƐ

Klisifuɛ’m be mian be ɲin kpa naan akunndan nga be bu’n, ɔ nin ndɛ nga be kan’n ɔ nin be ayeliɛ’n w’a kle kɛ be yoman politiki.

Ndɛ’n i nun flanlɛ

• ?Wafa sɛ yɛ ɔ fata kɛ e bu mɛn siefuɛ mun-ɔn?

• ?Ngue ti yɛ e yoman politiki-ɔ?

• ?Sa benin mun yɛ sɛ y’a nianman e wun su’n, be kwla yo naan y’a fa e wun y’a wla mɛn’n nun ninnge’m be nun-ɔn?